السلام عليكم ورحمة الله وبركاته
خواتي عضوات المنتدى حبيت اكتب لكم قصة ولادتي اللي يمكن تكون مؤلمة اشوي بس الحمدلله على كل حال الله صبرني وعدت المراحل الصعبه على خير والله يجازيني ان شاءالله على صبري الجنه…
في البدايه حملي كان مثل اي حمل عادي وشعوري كان مثل شعور اي وحده تنتظر اول مولود لها على احر من الجمر وكانت الدنيا مو شايلتها من الفرحه وفي يوم من الايام ياني الطلق ورحت المستشفى ولحد الولاده كل شي كان عادي ولحظة ماولدت طلعو الياهل ابسرعه وحسيت انهم قاعدين يخبونه عني ودووه على الميزان واسمع السسترات مستغربين بس مو قادرة استوعب شيقولون من التعب واشوفهم كل وحده تنادي الثانيه ومتجمعين على ولدي انا لحظتها مت من الخوف وكنت اقول حق سستر واقفه على راسي اشفيه الياهل ليش خاشينه ابيه قوليلهم اييبونه ابا اشوفه وتقولهم وهم مب ماعطينها ويه اخر شي يابوه واهني وقت الصدمه العوده يابولي ولدي وكان مشوه من ناحيه الخشم والفم وكان مصاب بالشفه الارنبيه وشق في سقف الحلق(اللهاة) طبعا انا لحظتها انشل تفكيري اول شي فكرت فيه زوجي شو بيكون اشعوره لما يشوف اول ولد له بهالحاله وهوه اللي كان يترياه …
خذوه من عندي مابسته ولا بينت اي شعور وانا لحد اللحين متحسفه اني مابسته على راسه وكنت متضايقه ,طبعا انا حزتها خفت وايد خصوصا يوم خبوه عني وهذا الشي ادى انه مشيمتي ترتفع وماقدرو يطلعونها وكانت كل دكتورة اتيي اتحوس فيني وتدخل يدها وكنت احس بالم فظييييع وقمت اصيح بصوت عالي خلاص انهرت وماعاد قادرة اتحمل واضطرو انه يسوون لي عمليه تنظيف وبعدين لما طلعوني من العمليه كنت دايخه من البنج بس كنت اشوف امي وخالتي وزوجي وابوي كلهم اييون يطلون علي ويروحون بعدين لما وعيت عدل من البنج كانو كل هلي واهل زوجي موجودين طبعا انا كنت طول الوقت اصيح مو مصدقه وكان الشيطان يوسوسلي ليش انا بالذات يصيرلي جي وليش وليش وليش والناس شوبيقولون لاتستغربون من كلامي انا مو جي تفكيري بس هذا من اثر الصدمه وكانو كل الاهل يهدوني ويقولون لي هاي كتبة الله ولازم مانعترض بس كنت من اشوف زوجي اصيح لاني احسه مخنوق ومايبا يبينلي عشان مايضايقني زود بس هاي الشعور كان يقتلني كنت احس من اعيونه انه تعباااان وايد من الصدمه بس كاتم بقلبه …
المهم بعدين قعدت احن عليهم يبولي ولدي وييبولي ولدي والسسترات كل شوي يقولون لي بعد اشوي وماييبونه بعدين قالولي مابنييبه اليوم وبعد رجعت اصيح كانو حاطينه تحت الملاحظة ويشوفون اكله وتنفسه وكل شي اوكي او لا وثاني يوم يابولي اياه بس انا تقبلت الواقع وقلت الحمدلله على كل حال وناس يتمنون ظفر ياهل الله مورازقهم …
يوم بيرخصوني كنت فرحانه انه بنرد البيت واصدموني بالخبر انه بس انا اللي بترخص ولدي بيتم في المستشفى مدة اسبوع ويوم سمعت هالخبر انفجرت من الصيااح من الظهر لي يوم مارخصوه كنهم اشلعو قطعه من قلبي وخلوها عندهم والله ماجذب عليكم انه الجناح كله درو بسالفتي من الصياح وكلمن كان اييني ويهون علي…
طبعا رحت البيت وفي السيارة ماوقفت من الصياح وريلي يقولي تبين نرجع ناخذه ويصير فيه شي موزين لاسمح الله اذا تبين اللحين بوديج تاخذينه وكان يهون علي مسكين بشتى الطرق وانا يومها كان معورني قلبي اني بدخل البيت بدون ولدي كاني لاربيت ولاشي صج كانت ايام مؤلمه وكنت كل يوم اروحله واشربه الحليب بايدي الصبح والمغرب كنت اشفط له حليب صدري واوديه له بس للاسف كان مايقدر يرضع من صدري لانه فمه كان مفتوح معا خشمه وماكان يقدر يمص هذا الشي اثر فيني واييدوانا كنت مخططه ارضعه سنتين من صدري كنت لما اشوف وحده ترضع ولدها قلبي واييد يعورني.
بعد خمسه ايام رخصوه وفرحت وانا راجعه البيت معاه والاهل كانو كلهم منتظريني عند الباب ومن اهني ابتدت الرحله صرت ادور في النت عن اطباء متخصصين في هاي العلاج وكنت ادور عن مرض ولدي وشو اسبابه وكنت ابي اعرف كل اصغيره وكبيره في هاي الشي الحمدلله في يوم من الايام كنت موديته عيادة خاصه كان فيه التهاب في اعيونه وكان في العياده دكتور عراقي فلما شاف ولدي وشاف حالته عطاني اسم دكتورين في الامارات فلما رجعت بحثت عنهم في النت واحد ماحصلت عنه معلومات اما الثاني لقيت بعض من المعلومات عنه وقلت حق عمتيه تقول لريلها اييبلي معلومات عن الثاني لانه عمتي متزوجه اماراتي فيابلي رقمه وياب في اي مستشفى يشتغل فسيده اتصلنا وخذنا موعد وسرنا الامارات وكان اسم الدكتور عبد الباقي الخطيب عراقي الجنسيه متخصص في مجال الجراحه التجميليه ويشتغل في مستشفى زايد العسكري في بوظبي وسرنا حق الدكتور وشافه وطمنا على حالته وقالنا لا تخافون هو مسوي عمليات وايد في هالمجال انا من اول ماشفت الدكتور ارتحت له لاني سرت في البحرين حق كمن دكتور مادشو قلبي كلش …
المهم حدد لنا موعد حق العمليه والحمدلله الدكتور سواا العمليه حق ولدي والحمدلله كانت ناجحه بس الله لا يرويكم حالتي يوم خذوه مني وكان صايم من الساعه 2 فليل وكان يصيح يوعان وكان قلبي يتقطع كل مااسمع صوته كنت مسكتته باللهايه كل مايصيح ابي اقوله لااله الا الله تخنقني العبرة وبس دموعي تنزل ماقدر انطق بولا كلمه كنت كاتمه الصيحه عشان ولدي مايحس اني متضايقه وبعدين خذوه مني وطلعوني برع طبعا لما طلعت من جناح العمليات كانو هلي كلهم منتظريني فلما شفتهم ماقدرت استحمل فصحت بصوت قوي وكانو كلهم يصيحون ابوي قام حضني وقعدني يمه وقالي خلي ايمانج بالله قوي وادعيله فغطيت ويهي وقعدت اصيح وعطاني ابوي اكتاب ديني وقعدت اقرا فيه مدة العمليه كانت 3 ساعات ونص مادري شلون صبرت فيها بس الحمدلله الله كان معاي كنت كل اشوي اروح يم باب العمليا واسال كل واحد يطلع منه عن ولدي الحمدلله كانو يطمنوني بعدين نادوني عشان اشوفه دشيت له وصج شكله كان يعور القلب وكان ويه منفخ وحاطين له الاوكسجين وكان يون بصوووت اضعيف من التعب انا تعبت نفسا وايد بس فرحت بعد لانه ولدي طلع من العمليه والحمدلله خبرني الدكتور انها كانت صعبه لانه المسافه بين الشفه والشفه الثانيه وايد اكبيرة بس انجحت ولله الحمد…
طبعا حالة ولدي يبالها اربع عمليات على الاقل اول عمليه افتكيت منها كانت في تاريخ 27 -7 -2017 والعمليه الثانيه تاريخ 15-3 -2017 ادعولي الله يسهل على ولدي ويطلعه من العمليه الثانيه سالم يااارب …
هاااااااااااذي قصتنا انا معا ولدي الحمدلله عدى الكثير ومابقى الا القليل وارد واقول في البدايه وفي النهاااايه الحمدلله على كل حال اللهم اني لا اسالك رد القضاء وانما اسالك اللطف فيه .
ان شاااااااءالله بحط لكم اصور ولدي قبل وبعد العمليه قريــــــــــــــــــــــــــــــبابس خل اتعلم شلون يضيفون الصور .gif "12 (43)")
[/FONT][/SIZE][/SIZE][/CENTER][/RIGHT][/SIZE][/COLOR][/COLOR][/COLOR]
المشاركة الأصلية كتبت بواسطة دار_الزين 
.gif "44 (24)")
.gif "55 (10)")
.gif "44 (21)")
.gif "12 (98)")
.gif "12 (100)")
