السلام عليكم ورحمة الله وبركاته …
هذا أول موضوع لي بقسم الطبخ مع اني احب اطبخ وايد لكن عمري ما نزلت موضوع وان شاء الله ما يكون اخر المواضيع
اليوم العيال قالوا نبى تغيري لنا العشا فدشيت المنتدى أدور ع أكلة يديدة ودشيت موضوع أم خليفة
فيتوتشيني الفريدو من ايد ام خليفه يمييييييييييييييييييييييي
https://forum.uaewomen.net/showthread.php?t=888907
عجبتني الوصفة وطبقتها والصراحة لذيذة قليلة عليها
المقادير مثل ما كتبتها أختي ام خليفة
المقادير نحتاج :
ملح + فلفل اسود + زنجبيل + زعتر مجفف + ريحان + زيت زيتون + حبة ماجي صدر دجاج منزوع العظم
هي استعملت دجاج جاهز الي هو شيش طاووق
أما عني قطعت صدر الدجاج مربعات وبهرته ببهار عربي وفلفل احمر بودرة وفلفل اسود وملح وحطيت عليه شوية طحين عادي وشوية طحين ارز وقليته
باقي المقادير
بصل مفروم + ثوم مفروم + كزبرة مفرومه + مشروم تقطيع اختياري ( انا استغنيت عن المشروم لان العيال ما يحبونه وضفت زنجبيل اخر مفروم
وهاي صورة الدجاج بعد ما قليته وقطعته والبصل والثوم والزنجبيل والكزبرة
المعكرونه نسلقها بماي مضاف له شوية زيت زيتون وملح
عقب نقلي البصل بزيت الزيتون مع الثوم والزنجبيل
ونحط عليه الفلفل الاسود والماجي والزعتر والريحان وعقب نحط الدياي
وهني نخلط الصلصة الي هي عبارة عن كريمة مخفوقة علبة صغيرة وملعقتين مايونيز وملعقتين جبن كرافت ونصبهم ع البصل والدياي
وعقب نحط المعكرونه والكزبرة ونحركهم شوي ع النار والي يحس الخلطة ناقصة ملح ممكن يضيف عليها
الصراحة لذيذة قليلة عليها جربوها وما راح تندمون
وتسلم لي ام خليفة ع الوصفة
والسموحة