هنا حبيت اكتب لكم مشكلتي بالكامل واتمنى الي تدش تساعدني . صرت بحالة كأبة كثير حزينة يمكن انتوا تشوفوها عادية او بالاحرى سخيفة بس انا كثير مهمة لي . الله يسلمكم انا وحدة احس اني منحوسة مالي حظ ابدا . نبدا شكليأ , انا متينة وزني 83 وطولي 156 انتو جي احكموا اذا متينة ولا وييهي مب موحد تحت عيوني سواد وحول فمي سواد ورقبتي وايدي كبيرة وخشنة وسمرة وريولي سمرة ويابسة وو شو اقول بعد
ودراسيا فاشلة بمعنى الكلمة والله فاشلة حتى انا دوم احاول اني احضر الدروس بس شو اسوي يمكن بكم من مادة فاحلة بس الباقي لاتعليق غبية وانا صراحة احاول اشد حيلي بس مافي فايدة ابد ابد مافي فايدة وبعد عندي اخت بنفس مدرستي وانا دوم ادعي ربي ان ربي يعلق قلوب معلماتي فيني وانهم يعزوني احب شعور ان معلمة تعزني بس للاسف انا ادري ان المعلمة تعز المتميزات وانا طبعا مو منهم اكيد وتصدقون اغار من اختي وايد لانها احلى مني وكل ما أحد يمدحها انا احس ان قلبي يحترق والله وحتى في مرة وحدة تقولي اختج جميلة طيب انا ؟ محد يمدحني ابد ليش ؟ يمكن تحسوني سخيفة مادري بس ,, حتى احيانا اختي تقعد تقولي الابلة تقعد تناظر فيني (كانها تقولي ان هاي الابلة معجبة فيني) وانا انقهر شو اسوي حتى اهلي قبل كل مايشوفوني يقولون لي انحفي طيب انتوا شدخلكم بس ابلعها غصة واسكت بس في مرة سكتتهم والحين مايقولون لي طبعا مش اخواتي الا خالاتي المهم والله حاسة ان مافيني شي زين ابدا ,, كل ماشوف وحدة اقول ياليت عندي جسمها ولا ياليت عندي بياضها وعقب اقول ليش ماكون انا الناس الي يتمنون ها الشي فيهم الا وانا الي اتمنى ؟؟ والله احس قلبي يحترق شو اسوي بتقولون لي اضعف انا ماقدر ياخي لو اسوي رياضة ماشي فايدة واني امتنع من الاكل ماقدر اوكي واذا ضعفت والسواد ؟؟؟..وحتى اني دوم اتمنى معلمات يمدحوني مدري ليه بس رغبة دفينة فيني .. وكل ماتمنى شي احس انه يحصل للي حولي مدري ليش ؟؟ مثلا ان المعلمات يمدحوني الا واشوف المعلمة تقول لطالبة ثانية الاسبوع الي طاف انتي كذا معلمة تمدحك وتقول عنك جي وجي وانا يالله ابلع غصتي واتمنى واقول ياليتني مكاانها ,, شو اسوي بالله شو اسوي بس تعبت تعبببببت ادعولي بس ..ساعدوني قولوا لي تجاربكم مع الدعاء مع اني اسوي كل شي بس مايستجاب . استغفر الله بس مادري ليش انا والله تعبت حتى احس قلبي يعورني لاجمال وذكاء ولاشطارة ولاذوق وحتى اهلي دوم ينادوني بكلمة بما معناها(ماعندي ذوق وماعرف اتأنق واختي يقولون لها ذويقة ) وحتى عندي اخ دوم يدلع اختي ويقول هاي احلاكم علما ان عندي اختين بس كبيرات وانا واختي هاي الصغيرات شوي يعني بالمراهقة دوم يدلعها ويقول هاي احلاكم وجي وانا من هناك ابلع غصتي ولما استفرد بنفسي ايلس اصيح حتى بالاعراس يقولون لها ماشاءالله حلوة طالعة وانا واقفة جدامها ولاتعليق مايقولون لي شي ؟؟؟؟!ولامجاملة حتى !! ولاتخافون ماحقدت لاختي مهما كان هاي اختي واحبها فديتها والله ,, بس اقولكم عن مشاعري انتو جد حطوا نفسكم بمكاني شو تحسون ؟؟ ولو سمحتوا كل وحدة تحط رد تجاوب مابتنقهر لو هي مكاني , ؟
لانهتمين لرمسه الناس
انتي حبي نفسج بتشوفين الناس تحبج
لاتوصلين لعقلج رسايل سلبيه عن نفسسج حبيبتي
ولا تهتميين للمظهرر وااايد اهم شي الجوهرر حبوووبه
وحطي ف بالج ان ربج خلقج في احسن تقويم وكل انسان في ميزه تحليه مب شرط الشكل
شوفيي اخلاااقققج حياتي
ماعليه حبوبه ساعدي عمرررج اول باول
سوي جدول رللجييم
وادعي ربج وكل ماضايقوج الناس سوي طاف وابتسمي ف ويههم لاتخلينهم يوصلوون في انهم يجرحوونج برمستهم وقولي اهم شي انا راضيه عن نفسي ^.^
انآ مآ آعرف انصح حد وجي
بس يعني مآحبيت اطلع بدون ما اقول شي =)
ممم
انا اجوف انج يعني تجوفين كل شي بسلبيه ، . . " تفآئلوآ بالخير تجدوه " !
و الحمدلله ربنآ خلقنا فـ احسن تقويم
و بخصوص الوزن لاتقوليين ما اقدر تقدرين تضعفيين ان شالله ، انتي بس قوي ارادتج !
و السسواد عآدي بسيطه اللي اعرفه شي كريمات تبييض و جي !
و ششدي حيلج فـ درآسستج !
لاتخلين هالاشياء البسيطه و كلا النآس يأثر فيج و يحطمج !
ان شآء الله ربي يوفقج
بالتوفييج حبيبتي =)
زين انا شو اقول عن نفسي
انا انحس منك واستغفر الله على هذي الكلمة
بتموتين لو تعرفين قصصي
وانا سمراء ولون وجهي مب موحد وقاعدة احاول اعالجة لي زمان وللحين مافي نتيجة
وصحيح خلصت جامعة الحمد لله بس ماتوفقت في العمل والكل كان يسميني غبية
وعندي مشاكل نفسية خير الله وعندي وعندي
وقاطعت كل صديقاتي عشان تعليقاتهم علي وغيره مني
تخيلي في الدوام كانوا رياييل يدعون لي بالتوفيق
اه بس
اختي هذا نصيب
صح فضفضي بس
خليكي قنوعة وانسي
وبخصوص اللون في كريمات يمكن تساعد خبري امك يمكن تتفهم
وبخصوص الدراسة اختي اعتبريها تسلية ومعرفه وبس وحاولي شوفي اي مادة تحبينها وتميزي فيها وخلي الباقي معلومات حلو تنجحين فيها يعني لا تذبحين نفسك
واختي مب ضروري كل الناس تحبك
بالعكس انتي الحين تعتبرين احسن من اختك حتى لانك تتحملين اشياء كثيرة
واختي كل شي له علاج
تعرفين اني قاطعت صديقات لي عشان كانن يعلقن على لوني
يمكن تقولين اني تافه
ولكن كله الا احترام الذات
في بنت اعرفها شكلها مو حلوة بس إلى حلو فيها طريقت كلمها مع الناس وسولفها ما تملين منها مول.كل إلى يعرفها يحبها ما في حد ما يحبها .
اما ع مستوى الدرسه كل وحدة هي و قدراتها بس إلى في إيدج ممكن تغيرينه هو انت من نا حيه الشخصيه.
شكرا
شو هالأفكآر
حطي في بآلج شي كل شي خلقه ربي جميل
وخآصه الإنسآن ، خلقنآ في أحسن تقويم
بس الفرق إن وحدة تهتم بعمرهآ والثآنيه لآ
يعني انتي مشآكلج بالشكل جدآ بسيطة
السمنة مآفي ششي اسمه مآ أقدر
اسعي للشي عسب تحصلين مرآدج
دشي الجيم ول سويلج نظآم غذآئي عند دكتور متخصص بيسآعدج عليه
السوآد ششي كريمآت وسيري عيآدآت الجلدية ول المستشفى وخبريهم مشكلتج
انتي بعدج صغيره وتقدرين تغيرين شكلج وتتغيرين 180 درجة
بس يبآلج إرآدة قوووية
وسمنة رقبتج نآتج عن سمنتج الزآيدة
فعلآ وزنج وآآآآآآيد فرق عن طوولج
وهآي سمنة مفرررطة
لآ تزعلين مني بس حبيت إنج تتحركين لأن لآزم تهتمين بصحتج قبل لآ تهتمين بشكلج
ثآنيآ الدرآسة
النآس قدرآت
انتي سوي اللي عليج وأهم شي انتبهي لشرح المعلمآت وحطي في بآلج إن هالشي مش وآجب عليج
كثر مآ هو اكتسآب للخبرة وتكون معلومة لج ممكن تفيدج
ولآ تقآرنين مآ بينج ومآ بين أي شخص سوآء إختج ول ربيعتج
حآولي تهتمين بعمرج وبسس
واطردي هالأفكآر السلبية اللي ف رآسج
ومثل مآ قآلولج البنآت لو انتي مآ حبيتي روحج ، حتى النآس اللي حوآليج مآ رآح يحبونج ^^
ولآ تترين رضآ النآس عليج ، أهم شي انتي رآضية عن روحج
وربي يوفقج
ومثل ما قالت الأخت ما عليج من كلام الناس وخلييج واثقه من عمرج..
وبقولج انتي اكييد فيج جمال بس اهتمي فعمرج سوي رجييم وسوي رياضه لا تقولين ما اقدر ..تقدرين الغاليه..
وبالنسبه لويهج وجسمج الغاليه ابدأي من الحين سوييلج كورسات خلطات لجسمج وويهج وبتشوفين النتيحه اهم شي الاستمراااار حتى انتي لو بشرتج سمرة تقدرين تخلينها ناعمه وصافيه وموحده بالاهتمام انا وايد شفت بنات سمر ومتان بس انهم انيقات ووتهتم بعمرها وببشرتها وعلى سالفة مدح المعلمات انتي اذا مب شاطرة فدروسج خلييج وحده متفاعله مع الانشطه المدرسيه ودوم خليج مبادرة بعمل النشاطات الصفيه والا صفيه حبيبتي اهتمي بعمرج واايد بتشوفين شكثر انتي حللوة وثيابج يالغاليه اذا ما تعرفين تنسقينها عادي دوم استشيري اخواتج ولا امج وخليهم يساعدوج باللي يناسبج نصيحه حبيبتي امسكي ورقه وقلم واكتبي هدفج لهالسنه خلي سنة 2024 سنة التغيير الكبرى فحياتج يعني هالسنع بستوي رشيقه وبستوي انيقه وبستوي متفاعله وبستوي جميله وحطي لج اهداف للآخرة مثلا بحفظ كم سورة من القرآن وبقرا مثلا طول السنه 10 كتب مفيده وانتي واللي تحبينه ،،،
بس بقولج شي شفتي هالكلام كله اللي كتبته اول شي تبدين فيه انج تدعين لعمرج يوميا صلي ركعتين قيام وادعي فيهم دعاااء شديد اهم شي تكونيين واثقه ان الله بيستجيب حتى لو بعد سنين … انتي تمي ادعي وادعي واستغفري بنية الاشياء اللي تبينها وااايد وطبعا مع العمل بالاسباب يعني لو دعيتي ان ربي يخليج رشيقه ابدأي سوي رجييم ورياضه اهم شي الرياضه بدونها ما ينفع..
وسوري الغاليه عالاطاله بس حبيت اساعدج ودي لو اقدر اساعدج عمليا واشوف وياج النتايج وامسك بايدج اشجعج يا حلللوة ..
المشاركة الأصلية كتبت بواسطة بسمة ألم 
