مرررحبا بنات وحريمات …
شحالكن جميعا؟
اليوم يايبة لكن ألذ جوكلت مافن ممكن تذوقونه ،،
choc brownie muffins
بتنافسون كوستا وستاربكس ونيرو وكل كافيهات العالم هع ،،
يالنسبالي احب ادور الوصفات من مصاادرها الأصلية ،، كتب او مجلات اومواقع متخصصة ،، مب من المنتدياات العربية وخرابيطها ،، واللي اغلبهم يتفلسفون وهم ما يعرفون الفرق بين المافن والكب كيك !!!
المافن حبيباتي هو نوع من أنواع الخبز السريع .. أو (َQuick Breads) يعني اللي ما يحتاج تضيفين له خميرة وتتركينه لين ما يتخمر ،، وقديما في بريطانيا كانو يسوونه على شكل أقراص !! ،، وعقب طوروه لشكله الحالي ،، اللي هو شرات الكب كيك ..
ويفرق عن الكب كيك انه عجينته أثقل ،، وكمية السكر أقل ،، عشان جي مناسب جدا للريوق ..
وبعد تكون له شرات القشره متشققة وناشفة شوي ،،
المهم،، احس اني بديت اتفلسف هههه ،،
هذي صورة المقااادير والطريقة فالكتاب ..
المقادير
المقادير موجودة فالكتاب بالجرام ،، فحطيتلكم اياها بشكل تقريبي ..
300 ج طحين ذاتي التخمير ،، تقريبا 2 و 2/5 كوب
35 جم ككاو بودرة ،، تقريبا 5 ملاعق طعام
75 ج سكر الكاستر ،، حوالي 1/3 كوب
60 ج زبدة
125 مل نوتيلا .. حوالي نص كوب
بيضة
180 مل حليب ،، حوالي ثلاث ارباع كوب
125 مل ساور كريم.. حوالي نص كوب
والاضافات ،، ممكن تحطونهم وممكن لا ،، انا ما حطيتهم
95 جم جوكلت شبس
75 جم فستق مكسر او مطحون خشن مب بودرة ..
الطريقة ولا اسهل ..
اخلطي المواد الجافة كلها ويا بعض .. ( الطحين والسكر والككاو)
وبعدين اخلطي المواد السائلة مع بعض ( الحليب والزبدة والبيض والنوتيلا والساور كريم) ،، انا خلطتهم بالشوكه ،، ما تحتاجين الخلاط ابدا
الحين ضيفي السوائل فوق المواد الجافة واخلطي بملعقة عادية لين يمتزجون ،، ولا تكثرين خلط واايد
بيظهر عندج خليط ثجيل ،، مثل جي
صبي خليط المافن في القوالب ،، انا استخدمت قالب الميني كب كيك ،،،
ودخليه الفرن بدرجة حرارة 170 ،،
اذا استخدمتي قالب المافن الكبير بتاخذ حوالي 20 دقيقه
واذا استخدمتي قالب الكب كيك العادي بتاخذ حوالي 15 دقيقة ..
واذا استخدمتي قالب الميني كب كيك (شراتي) بتاخذ 10 دقايق تقريبا ،،
طبعا قبل ما تطلعينها تأكدي من النضج بعود اسنان او طرف سكين ..
وتراااااااااااااااااا
هذي الصينية جهزت ،،
وتمتعو بألذ جوكلت مافن ،،،
ممكن تقدمينه ويا القهوة او الكابتشينو ،، وبالعاااافية مقدما لكل اللي بتجربه
