السلام عليكم ………. اشحالكن خواتي عساكن بخير
بغيت مشورتكن في سالفه وان شاء الله تساعدوني فيها لأنها محيرتني.gif "12 (8)")
تحيدون موضوعي عن خيانة زوجي؟؟؟ اللي ما قرته، هذا الرابط:
https://forum.uaewomen.net/showthread.php?t=428228
أنا تميت ساكتة والله لبداية الشهر عن الموضوع وأشوف أعداد البنات اللي يرمسن ريلي زادوا وقلت لازم أشوف له حل.gif "12 (9)")
تاريخ 1 مايو ريلي كان متضايج ما أدري من شو… وما رضى يقول لي لأن هو في طبع اذا تضايج ما يرمس إلا بعد فترة اذا بغى طبعا….. ومرات ما يقول خير شر.gif "12 (15)")
انزين الحين انت متضايج انا أشلي ما ترمسني
أنا في هاليوم قلت يمكن ضغط الدوام ورحت أرقد………شفته فتح اللاب وقلتله انت تعبان ارقد باجر دوامك الصبح جان يقول برقد بعد شوي
شوي إلا اسمع صوت فصوص التليفون.gif "13 (1)")
وعرفت انه يطرش مسج…… وشوي تليفونه هز يعني استقبل مسج وتم على هالحاله تقريبا 5 او 6 مسجات
جان أنش وصكرت غطا اللاب .gif "12 (22)")
وهو انصدم طبعا وشليته وحطيته عند راسي….. هو من الصدمه تم ساكت لأني انا مب جذي أصلا …..gif "12 (32)")
… تم يطالعني وعيونه كلها استغراب
وأنا حاطه راسي عالمخده قلتله عندك التليفون يكفيك عسب تعبر عن شعورك بكلام الحب والغزل
رد علي بدون ما يصد صوبي وقال: شوه!!!!؟؟؟؟؟
أنا غمضت عيوني بس ما أقص عليكم ان قلبي تم يدق من الخوف.gif "12 (46)")
وأنا لما نشيت وشليت لابتوبه ما فكرت ولا شي ……….. ما أدري شو اللي صارلي وقمت فجاة
المهم……. تمينا ما نرمس بعض بس أنا كنت أجهزله ثيابه لما يسبح واجهز الغدا أو العشى وطبعا ما كان ياكل ويتم الأكل ليوم الثاني مكانه
وهو يعرفني أنا ما أحب آكل بروحي …… عيل كيف وهو زعلان!!!!
المهم…. أنا تميت أتجرب منه مع انه هو الغلطان بس أشوفه يوم الثاني يرد شرات أول يعني مبوز….وقبل اسبوع طلبت الأكل اللي يحبه ووصلت البيت وهو كان توه بيسير يرقد جان أقوله الغدا…. قال بعدين باكل…. بس ما كل منه شي وانا بعد تميت يوعانه طول اليوم.gif "13 (26)")
يعني من بداية الشهر لليوم لا عدا ولا عشى …. بس أتريق وانا فالدوام كرواسون ولا فطيرة صغيرة
تاريخ 3 مايو طرشلي مسج كاتب فيه ان اخوه العود عرف فسالفتنا…. أنا انصدمت طبعا كيف عرف وانا ما قلت لحد شي مووووووول وأخوه مب ويانا فالبيت….. قلتله هو بس خمن لأنك تحب تقعد عالنت وليش ما نكرت!!!
هيه ما قلتلكم ان ريلي قطع رقمه من ثاني يوم ولما اتصل في اخوه يعطيه الرقم اليديد اخوه سأله ليش وريلي قال ان بنات يتصلون ومافيني عالمشاكل
والظاهر هني اخوه قاله اكيد من النت …… وريلي وعد أخوه انه ما يفرط فيني وتأسفله ووعده ما يعيد هالغلطة وندمان على هالشي………… طبعا هذا كله طرشلي بالمسج
انا طرشتله مسج كاتبه فيه ان الانسان من معصوم من الغلط وأهم شي انك تعلمت شي …. وأنا نسيت الموضوع
يوم السبت اللي طاف خذتله باقة ورد .gif "12 (55)")
ودشيت الغرفه شفته عالفراش…… وكلمته عن سكوته وووووالخ…. بعد تم ساكت وقلتله قول شي اذا أنا غلطت عاتبني… قال: ما عندي شي أقوله واللي سويتيه من حقك…. تخيلوا يرمس وما يحط عيني فعينه
انزززززززززززززززززين الزبده ……………..
لليوم مب رايم يحط عينه فعيني
لليوم لا غدا ولا عشى
لليوم عايشين مع بعض كأنا ما نعرف بعض
لليوم … لليوم … لليوم ….. معاناه
أنا قلتله قبل مبارحه ننسى اللي صار ونبدأ من أول ويديد.gif "13 (41)")
…. قال اوكي وأكدلي انه مب زعلان
أصلا ليش يزعل؟؟؟ أنا شو سويتله؟؟؟ المهم من حقه حتى يزعل لأني كنت أفتش تليفونه وأنبش لابتوبه والحين حلفت ووعدت بيني وبين نفسي ما أعيدها وقلتله هالرمسه اني سويت هذا كله عسب ما أظلمك وأتصرف بتصرف أندم عليه عقب
بس الحين شو الحل كيف أخليه يرد شرات أول؟؟؟؟ والله هو حاس بالذنب وأحسه يبغي يرمسني بس مب قادر…. مستحي ولا شو؟؟ ما أدري.gif "12 (29)")
أنا شو أسوي عسب أخليه يسولف ويضحك؟؟؟؟
حياتنا موووووووووووووول أبيض وأسود مو شي
انصحوني…. بطريقه أخليه ينسى انه غلط …… وأنا نسيت كل شي والله وأنا أدري ان هو يحبني وايد …..يبغي يرمسني بس حاس انه ظلمني وايد
ساعدوني أرجوكم
لا تقولون اعزميه…. لاني عرضت عليه بس قال انه تعبان… وقلتله هالويكند بنسير السينما بعد وصل لي نفس الرد
أترياكم
