السلام عليكم خواتي وخاصة معلمات رياض الأطفال.. حابة اطرح عليكم موضوع ما ادري اذا بيلقى تفاعل والا يمكن يكون موضوع ماله اهمية بالنسبة لبعض المعلمات..
المهم.. انا مدرسة يديدة تعينت هالسنة في روضة حكومية.. طبعا مثل اي وحده مستانسة ومب مصدقة واخيرا بعد سنين تم تعييني
..طبعا من اول اسبوع كان عندنا اجتماع مع المديرة وادارة الروضة
.. وباختصار الهدف من الاجتماع (كل معلمة تزين وترتب صفها) قلنا مب مشكلة هذا شي طبيعي بس مثل ما تعرفون وايد اشيا لازم نوفرها في الصف..وبعد ما حددولنا الاشياء اللي لازم نوفرها من اقلام ودفاتر وملفات والوان وعجين وجلاد وبوسترات وبطاقات وحبر حق الطابعة واوراق وآآآآآآه ماتمت شجرة والسبة هالاوراق اللي نستخدمها في الروضة وووووووو (طبعا ماراح نخلص) المهم حسبنا وطلع علينا تقريبا في حدود الالف وخمسمئة درهم.. وطلبنا من الادارة يساعدونا و بظرابة وطلعة روح عطو كل مدرسة 500 درهم فقط ..حق طول السنة.. قلنا الحمدلله نعمة ..(والمبلغ راح حق الحبر والاوراق)!!!! وانتو تعرفون كيف الاطفال ماشاء الله عليهم يحافظون على الادوات من اول شهر اختفت كل الادوات يعني من اول ويديد نروح ونشتري .. يالله مب مشكلة..
بس الله يخليكم يا ادارة الروضة وفرو لنا الة تصوير عودة لان اللي في الصفوف ماتنفع حق التطبيقات وخاصة في كل صف 20 طفل وفي اليوم الواحد نصور في حدود 4 او 5 تطبيقات لكل طفل .. احسبو 5 في 20 يعني 100 ورقة وين بتتحمل هذه الطابعة الصغيرة، وكل يومين نشتري حبر يديد والله حرام…قالو اذا تبون صورو في الادارة وكل ورقتين او ثلاث بريال!!
يعني بفلوس ماشي تصوير ببلاش..قلنا اذا السالفة جي والله المكتبات ارحم وارخص والله يعينا على مشاوير المكتبات اليومية…
وترتيب الاركان وما ادراكم ما ترتيب الاركان …قبل كل وحدة لازم نروح السوق ونشتري اغراض لركن التعبير الفني والتمثيل والبحث والاكتشاف مثلا اذا عندنا وحدة الحيوانات يعني نحول الركن لحديقة حيوانات او زريبة!
وفي كل ركن نحط اشياء تتعلق بالوحدة وتقريبا في كل صف 7 اركان!!! يالله قلنا مب مشكلة فرينا العيال عند الريل وحواطة في السوق ندور اغرض تتعلق بالوحدة لان الروضة مافيها اغراض وطالبين من الوزارة ولييييييييييييين الحيييييين الوزارة ماوفرت شي…!!!!!
وانا كنت حابة اخذ كتب لأطفالي وطلعت غالية شوي وكلمت الادارة عشان يساعدوني بمبلغ بسيط والباقي انا بدفعه ..طبعا مستحيييييل يدفعون وقالو لي الحل بسيط سوي لهم ملزمات!! ااااخ بعد ردينا لسالفة التصوير والاوراق والله لاعت جبود اليهال من الاوراق خاطرهم في كتب..! بس لا حياة لمن تنادي.
وبعد فترة لاحظت تقريبا كل شهر تينا الفراشة وفي ايدها ظرف شو السالفة ؟؟
ماشي والله بس ادفعي عشان بنشتري هدية حق فلانة مربية..ياريت لو وحدة ماشاء الله كل شهرين وحدة مربية…
والشهر الثاني ادفي والله حق الورد بنروح المكان الفلاني زيارة ( يعني لازم باقة فخمه)!! طبعا هي سمعة الروضة…
والشهر الثالث ادفعي والله عيدية بنروح المركز الفلاني نوزع عليهم العيدية…
والشهر الرابع ادفعي حق …. وحق….. وحق!!!
والاحلى في الموضوع لازم توقعين عشان الادارة تعرف منو دفع ومنو ما دفع..
يعني باختصار يامدرسات حطو مبلغ من راتبكم حق المجاملات وسمعة الروضة!!!
القهر اني اشوف كل يوم الادارة تغير في الاثاث وورق الجدران.. والله اني لين الحين ما شفت روضة ولا مدرسة تتحدى روضتنا في الديكوريشن..كانكم داشين محل اثاث مب روضة! يعني الحينة رمتو تسون ورق جدران في الادارة ب 7000 والا اكثر مب رايمين تشترون باقة ورد وتتشحتون من المدرسات؟؟؟؟؟؟؟؟؟
واللي معوّر راسي
معقولة الوزارة مافيها ميزانية توفر اوراق وحبر!! كل شي توفره المعلمة من راتبها؟؟ويحليلها المعلمة بتصرف عالروضة والا على عيالها…
والا انتو شو رايكم يا مدرسات… والله اني اعرف في ادارات تبارك الرحمن مب مقصرين مايخلون المعلمات يصرفون ريال من راتبهم كل شي هم يوفرونه من ميزانية الوزارة!!
ودمتم لخدمة وطننا الغالي