السلام عليكم ورحمة الله وبركاته
مرحبا خوااتي
شحاالكن ؟
عساكن الا بخيير
اليووووم انا يايه اشكيلكم همي ويا اميييه
انا الله يسلمكم قبل سنه وشي كان وزني فوق ال 95 يعني كنت درام ديزل
كل شي فيني كان اووفر يعني من ناحية الزنود والكرش والارداف وكل شي
وكل ربيعاتي كانوا يقولولي والله يا فلانه انتي ملامحج حلوة ماشاءالله بس المتن ظالمنج
وهالكلام وايد كان يقهرني بس فنفس الوقت كان دافع لي اني اضعف !!
من جي انا عزمت اني اضعف اول مادشيت الجامعة
لاني شفت اني اروم اتحكم ف وقتي واكلي وكل شي واشوف البنات ويازين كشختهن خاصة الضعااف قوم بو الاسكيني وهالحركات اووف كنت اموت حرررة يوم اشوفهن والله
ومن نفسي يوم كنت اشوف متينه تلبس هالسوالف اقول ف خاطري لا مب شي عالمتان احلا عالضعاف او المليانات هذا وانا كنت متينه
ف قررت اني اضعف باي طريقة كانت
واول خطوة هي اني اشتريت المشاية لاني ماقدر اطلع كل يوم من البيت حق المشي وجي
المهم خواتي انا ويا العزيمة والرياضة والرجيم وصلت من 95 لين 75 ف اربع شهووور
والصراحة كانت صدمة للكل وانجااااااز بالنسبة لي
يعني انا من استويت كنت متينه ومرة وحدة طلعلتهم بحلة يديدة
بس بعدني كنت متينه شوي يعني فيني ارداف بس من فووق استويت سلللللق
لاني طويلة بس انا وزني تحت يعني من صوب الخصر وكل شي اوكي ضعفت لكن تميت من تحت متينه شوووي
والحين كملت مشوار الرجيم عقب ماوقفت سنه لاني سافرت ورديت وجي لهيت يعني
ف الحين استوا وزني 65 بالضبط
وكل اللي كانوا يعرفوني فالثنوية انصدموووا مني ومن شكلي
وكل حد من ربيعاتي يقولي ان الحين انا وايد احلا وارتب وشكلي تغير مليون درجة
وانا من نفسي والله مقتنعه بشكلي واحس اني مرتاحة
وزود ابا اضعف لان الدكتورة قالتلي ان وزني المثالي 59 لان طولي 167 تقريبن
بس انا ابا اوصل لبدايت الستينات واوقف خلاص
المهم خوااتي المشكلة ان عقب هالانجاز كله
احصل امييييه تتشكى مني ومن ضعفي
معني والله بعدني اعتبر مربربة !! انا الحين مليااانه شوي
اليوم يتني تصييييييييح صيااااااااااااااح انا خفت على بالي شي مستوي
اخر شي تقولي بنتي دخيلج ودري الريااااضة طعي كيف غاادية !
قلتلها اميه شوبلاني مافيني شي والله ! تقولي لاااااااا ضعفتي واخسفيتي
والحريم شافوج فالعرس قالوا بلاها بنت فلانه جي غادية ومتغيره وجي
المهم تمت اتصيييح عاد لاتلومونها لاني انا بنتها الوحيدة من جي اميه وايد تتحسس من كلام الناس
بس خواتي والله في فرق بين نظرة الحريم الكبار ونظرة البنات اللي ف عمري
يعني بعض الحريم يحبن المربربات والمتان ويشوفونهم احلى
وفي حريم العكس ،، يعني اذوواااق !!
يعني شرات قوم اميه وخالاتي يوم يدورن بنات حق شبابهم اول شي لازم تكون مليانه
بس الصراحة اخواني وعيال عمي اول سوال يسالونه عن البنت اذا كانت ضعيفه ولا متينه
يعني كل واحد وذوقه ونظرته وشو اللي يعيبه
ف اميه تمشي على كلام ربيعاتها ويتني حلفتني قالتلي والله ما تسوين رجيم ولا تضعفين
الحين كيف افهمها بنات خبرووني الله يخليكم
انا حلمي مثل حلم اي بنت ،، يكون جسمها طرر ومنيكان
يعني الفرق بين الحين وبين الهدف والله بس 5 كيلو
حاسبتنهن انا ،،
والحين امي تحلفني وتصيح تقولي لا تضعفين
وحالفة الا تاكلني شرات قبل
كيف اقنعها واغير نظرتهاا ،، !!