الوسم: classroom

شحالكم يميع.. مبروك عليكم اجازة الاحد..

اعتذر للأخت mn~RAK عن تأخري في طرح الموضوع

موضوع الموضوع: Classroom Managment

راح اطرح لكم افكار من تجربتي في عالم التدريس اللامنتهي (حاليا فقط)

كلنا نعرف اهمية ال managment في كلاساتنا… من غيره الامور
تتلخبط و التدريس يستوي ارف و الوقت تحسبينه طويييييييييييييييييييل…

المهم ال butter

نشوف الصور في البداية وعقب نعطي التفاصيل.. يلا circle time

بسم الله الرحمن الرحيم

نبدا سالفتنا

1. Classroom Rules
خصصي حصة تتكلمين فيها عن القوانين.. وليش اهيا مهمة في اي مكان بالعالم
(الشارع, الملعب, المول, الحديقة, واخيرن
المدرسة) اسأليهم اذا للكلاس بعد قوانين او لا.. وشو
ممكن تكون واقترحي عليهم في النهاية تسوون لستة بقوانين تناسب
الكلاس.. والنقاط اللي بيطلعون ابها اطبعيها على big chart
وعلقيها بالفصل عندكم.. ودايما استخدميها كمرجع لي حد خالف ال rules

(بتقولين اوكيه اول يومين بيمشون عالقوانين..
وعقب! بعدين صراحة بيني و بينكم القوانين تراها ملل!! شو الحل؟ ,, بنشوف عقب
.. خلكم معاية)

2. Grouping System
الطلاب ايون من صف 1 2 3 معظم شغلهم فردي.. واغلب الحصة تسمعين
من هذا (مس هذا سوا و هذا قاللي.. الين ماييج الصرع
بسم الله علينا و عليكم)
المهم يا الوقت اللي يتعلمون فيه الشغل الجماعي

-كيف ارتب كلاسي؟
رتبي الصف الى مجموعات واعطيهم اسامي. ومانصحج تختارين فرق كرة او من هالسوالف
(لان في النهاية بيظاربون و بيعايرون بعض وانتي تبين تفكين عمرج
من الصدعة من الاساس)

في كلاسنا عندنا 4 مجموعات (A B C D) وكل مجموعة لون
(ترا الاطفال يحتاجون يشوفون الوان الربيع كلها بالكلاس- معلومة سمعتها و عيبتني)

– كيف نختار الطلاب لكل مجموعة؟
اول اسبوع خل الطلاب رواحهم ينظمون عمارهم في المجموعات-
(وكوني لهم بالمرصاد ههه) بجذا اقصد ادرسي الوضع.
في حالتي لاحظت انه التقسيمات يات جي:
* الطلاب الهاديين متكودين (خييه كلمة جديمة) على الينب
* الطلاب ال hyperactive حلالهم ال group اللي في نهاية الكلاس
لانه في مساحة اكبر.. وتعرفون عاد..
* الطلاب اللي مستواهم ظعيف او اللي يبون يعزلون عمارهم عن اجواء
الدراسية يلسوا في كورنر ورا مجموعة ثانية
* والطلاب الشطار مع بعض ودوم يخلصون من وقت وفي منهم شطار ع شطانة
من يخلص راح لعوز غيره!

– ( والحل؟)
ابدي الحين قسمي الطلاب:

* كل طالب شاطر خلية group leader لمجموعة
( في بعض الاحيان تختارين الليدر عحسب الشخصية- أو اذا في واحد مأذنج
دوم وبس يبا attention عطيه هالمهمة)

* الطلاب الهايبر اكتف وزعيهم على المجموعات.. وحطيهم دوم بالوسط بين اثنين (مانصحج تعطينهم كورنر)

* واذا في اثنين تحسينهم لي تجابلوا تطلع شرارة (سوالف و حشرة والخ)
يلسيهم بطريقة انه كل واحد مايجابل الثاني (عاطين ظهورهم لبعض مثلن)
ولا تيلسينهم وسط بين اثنين او في مركز المجموعة

* وزعي الطلاب الباجين بس تاكدي كل مجموعة فيها مستويات مختلفة
(قوي متوسط ضعيف) لان عقب يوم بتسوين pair work يكون عادي
(قوي + ضعيف) او (متوسط + ضعيف) لكن (ضعيف + ضعيف)
ماينفع..

– (الحين كيف ممكن اخلي ال group work system
فعال على طول السنة؟)ممكن توصلين مرحلة يكون فيها نظام الجماعي
صار روتين- واذا نحن كبار نمل من الروتين! فشو الحل؟
اخترعي rewarding system ي يناسب كلاسج ويناسبج

3. Rewarding Chart

في كلاسنا اخترنا نظام ال points
( سرقت الفكرة من سوبر ناني )- الطلاب يحصلون points
للاسباب التالية:
* يمشون على ال rules اللي حطيناها
قبل (وبجذي عرفتي كيف تخلينهم يتابعون قوانين الكلاس)
* يوصلج شغلهم كامل (واجبات+اوراق عمل + بوسترات الخ)
* المجموعة تتناقش و تخلص شغلها جماعيا وفي الوقت المحدد
* طلاب يساعدون بعض في task ( تحملي من copying نبهي قبل
ان المساعدة مب بالنقل)
* الكل محافظ على وظيفته: group leaders+
line leaders+ teacher helpers+ cleaning staff etc.

وطبعا العكس_ المجموعة تنقص اذا عضو من المجموعة خالف
قوانين كلاسكم من (تاخير, حشرة, اهمال واجب, الخ) بتحصلين في
النهاية المجموعة كلها تحاول انها ما تخسر points فبتشوفينهم
يواجعون بعض (ليش ماحليت الواجب, وليش متاخر و ليش وليش)
وايد اشيا حلوة راح تسمعينها (وكلهم راح يشجعون بعض)

طبعا لا تنسين القروب اللي يكمل خمس نقاط يحصل هدايا..

وللحديث بقية …..

4. Classroom Jobs

مهم جداتحسسين الطالب بالمسؤولية واهمية التزامه..
وزعي وظايف على الطلاب
بالاضافة للgroup leaders راح تعينين line leaders
, teacher helpers, paper monitor,
desk monitor, cleaning staff الخ

*وحاولي تعينين الطالب حسب شخصيته و ميوله
(قيادي, نظامي, الخ)
بالنسبة لي ال hyperactive عينتهم كــcleaning staff

*واللي يحبون ال attention او الشخصية القيادية عينتهم ك teacher helpers او
group leaders

*الهاديين واللي احتكاكهم بسيط مع البقية في الكلاس يكونون paper monitors
وهجذا.

*واذا عندج طالب يرفع الضغط و مسوي عمره ال boss خليه ال president-
وخذيه على برد وعطيه مسؤولياته وقوليله تتوقعين منه يكون قيادي
و منظم للكلاس وانه قدوة لغيره ومن هالكلام الملون
(جذا حولتي طاقته السلبية الى ايجابية) ولكن عيني vice president
يكون طالب متفوق و نظامي يساعده

(انا كان عندي طالب مخرب عليه اجواء التدريس بشكل فظيع,
كرهت حياتي بسبته ولكن مع النظام هذا
وبعد ماعطيته مسؤولية الطلاب الباجين’ اصطلب و تم يحاول يثبت لي انه
قد المسؤولية وكنت وايد احب ادرس الكلاس هذالاني مستانسة
عليه وماشاء الله تحسن مستواه من ضعيف ل متوسط والحين تخرج من صف خامس
ودوم اتوله عليه وافكر اسأل عنه)

نختصر هنا اهم الاشياء ل classroom managment :
1. تعليم الطلاب الانضباط بوضع قوانين للصف
2. تعزيز روح المشاركة بين الطلاب من خلال العمل الجماعي
3. تحفيز الطلاب من خلال rewarding the good behaviours
4. اعطاء الطالب الفرصة لتحمل المسؤولية بالزامه بوظائف صفية

وعندي لكم هدية العيد poster راح يساعدج في مهمتج النبيلة

Download

اطبعيه على big chart وفي ال circle time خبري طلابج انه راح تسوون
مدينة خاصة فيكم في الكلاس. وخليهم يقترحون عليج
شو يسمونها و اقروا ال chart والخ وفي النهاية خلي كل واحد
يكتب اسمه أو يوقع داخل smily face (اونه خلاص اعتمد انه جزء من هالمدينة اليديدة)

واللي عندها افكار ثانية Please do share

ودمتم سالمين,

ممكن.. بس نظام الجماعة مع صف اول احس يمكنه شششششوي صعب
تعرفين لان الطالب خاصة في هالعمر يحسب نفسه هو ال center of the things
يمكن تحصلينهم وايد يظاربون و وايد يتشكون اذا عطيتهم group task بس جربي و خبرينا بالنتايج

بس ممكن ينفع معاهم وايد ال rewrading system
وانه تحطين لهم rules وتكافئينهم عليهم.. لان هالمرحلة بذات الاطفال يحتاجون instructions بزيادة

بالنسبة لل rewarding charts
خخخ.. حركة بسيطة وغير مكلفة
اتيبين اوراق ملونة وتسوين لها lamonation وعقب
اتلزقينهم عطوفة اب two sided tape وبس.. وحطي عدد الصفوف
اللي عندج. واذا عندج كلاسات اكثر صغري حجم الورقة. واستخدمي ماركر
السبورة لاضافة البوينتس وعادي ينمسح بسبب التغليف

وبالنسبة للمهام انا كنت استخدم ال busy bees chart
لكن عقب غيرت لان عطيت كل واحد مهمة
فاحسن تسويلهم بطاقات يعلقونها فكلاسج وقبل لا يظهرون من الكلاس
يردونها في ال box واذا عندج ريادة صف عوديهم انه هذي وظايفهم
على طول اليوم وفي الحصص الثانية بعد

بالنسبة لصعوبة الامر و عدد الطلاب
هو في البداية صعب.. لانج راح تشرحين للمجموعة نفس الشي بس كذا مرة
لكن كل الماتيريالز عندج فليش ماتستغلينهم فشي راح يعطيج اجواء تدريسية مريحة لج و لطلابج
انا كان عندي 60 طالب في 3 كلاسات ومشى معاهم النظام
بس كنت مركزة على كلاس اكثر لانه كان وايد مشاغب وكنت معطاية ريادتهم
بس والله تحول من أسوأ كلاس ل أحسن كلاس .. ادب ونظام وتدريس ولا اريح

بس انتي كيف عندج 150! جم كلاس ادرسين؟ واي المراحل؟ وجم طالب في كل صف؟