الوسم: look

بصراحة يا بنات انا اتابع الموقع من زمان و اشوف شلون البنات ما شاء الله ينزلون و اشوف وقفتكم
معاهم ، و تشجعت أشارك معاكم و اتمنى انكم تشاركوني و نشجع بعض ..

بكلمكم عن نفسي و قصتي مع الوزن

مشكلتي مع الوزن بدت و انا صغيرة و استمرت معاي للحين و حاولت انزل و جربت كل انواع الرجيم
لكن باعتباري دلوعة العائلة فالكل كان يحاول يغششني و يعطيني حلاوة او اكلة احبها
بعدين اضعف و نرجع مثل قبل هههههههههههههههه

من و انا في المدرسة كنت دبدوبة الصف و في معاي بنات يشجعوني فما حسيت اني متعقدة هههههه

لكن في كل مناسبة احس اني غير عن الموجودين ودي البس مثلهم كنت اتقيد بنوع معين من الثياب
و ما انكر تطلع حلوة يسالوني عنها و كشختي باينة لكن بينج و بين نفسج ودج تحسين انج رشيقة و خفيفة دخلت الجامعة و حاولت انزل و فعلا نزلت 10 كيلو لكن مع ضغط التخرج رجعتهم

انا من النوع اذا اعصب او يكون عندي سترس على طول المطبخ و خبركم ضغط الدراسة ما يقصر
و انا الحين متخرجة لكن ما دريت ان قعدة البيت ممكن تزيد الوزن اكثر و تخلي الوحدة كسولة اكثر

و كل سنة اقول هالسنة انا بضعف و تمر السنة و انا مثل ما انا او زايدة ، طبعا النفسية تتعب حتى لو سمعتي مدح من الناس لكن تعرفين ان فيج شي ناقص ، الشي الثاني محد ينكر ان السمنة تأثيرها مب زين على الصحة في المستقبل ، ثالثا انا ودي البس مثل باقي البنات ياما مرت موضة و راحت لانها ما تناسبني ما اقدر البسها ..

فقررت اني اشترك بالمنتدى و انا واثقة انكم بتوقفون معاي ..

الحين بكتب لكم شاللي ناوية عليه و ابي رايكم ،

شاركت بالمنتدى بهالنك على اساس ان ما تصير 2024 الا و انا بادية خطوة التغيير للأحسن ان شاء الله

بحاول اغير مو بس من اكلي ، لاء راح يكون التغيير في كل شي نفسيا و جسديا

راح يكون تقريري مصور نهاية كل يوم ان شاء الله

و الحين بقول لكم عن الرجيم اللي بمشي عليه :

الريوق : هو 2 توست + جبن لايت ، او بياض بيض + عصير برتقال
الغداء : سمك ، دجاج ، لحم مشوي + سلطة
العشاء : فواكه

وبين الوجبات خيار + الماء تقريبا لترين كل يوم
و الرياضة : مشي نص ساعة على التريد ميل + تمارين البطن 50 مرة + اثقال اليد 3 كيلو

هدفي :

انا وزني الحين 109.9 بالضبط ( مستحية و انا اكتبه )

هدفي اول شي ابي اكسر الـ 100 خاطري اشوف رقمين على الميزان حتى لو 99 هههههههه

و حلمي اني اوصل 60 طبعا راح يكون نزولي على مراحل و اول مرحلة هي الرقمين و بعدين ان شاء الله بالخمسة كيلو في الشهر حلووين ..

و ان شاء الله ببدا باجر ، و ابي دعواتكم ( الحمدلله اليوم عندنا مطر يعني بداية خير )

مسامحة طولت عليكم لكن حبيت يكون كل شي واضح من البداية و أي سؤال انا حاضرة
و هذي هدية مني لكم

الزين قألوآ من من قديِم علآمات
عين و مبسمْو الجسم و الرشآقة
لَكن كِسْر هالقآعدة [ المتينات ]
هن ملح هن سكـر لذيذٍ مذاقهـ