أختي وتفكيرها السلبي

السلام عليكم

أختي أكبر عني وجريب تدخل 30 سنه
ما تقدم لها حد والعلم عند رب العالمين …
أنا سنوات معدوده وادخل 30 مع انه شكلي ما يوحي باني كبيره ..
أختي عصبية وأي شي ينرفزها .. موضوع تأخر زواجها مسيطر عليها واضح من كلامها دووم تردد بالله افتك وافتك .. مع انه نحن نعيش عيشه الحمد لله طبيعيه حالنا حال باقي البنات الحمد لله صحه وعافية ودوام وراتب بس الوالدة نعتمده اعتماد كلي علينا عندي إخوان ما أقول أنهم مقصرين بس سوالف الجمعية وأغراض البيت هم بالأساس أمي ما رتبهم ع هل الشي كانت هي تروح تشتري ونحن كبرنا وعودتنا ع هل الشي …
الي مستوي اللحين من فتره كل ما تنرفز تقول بالله افتك وافتك جدام الوالدة من كلامها تحسس انه الوالدة هي الي ما تبغيها تتزوج وكم مره عقت كلام انه أنتو تبوني اخدمكم طول عمري مع انه نحن نتشارك في المسوؤليات ..
الوالدة آخر مره تضايقت من كلامها لانه كأنها تحسس أمي أنها هي السبب مع انه أمي عمرها ما خشت عنا خبر خاطب بالعكس لكن أختي مب راضيه تفهم انه محد دق باب بيتنا من زمان …
ولا راضيه تقتنع انه وايد بنات مثلنا مب متزوجات وحالتهم أسوء وايد ..
هي تعاقبنا في البيت لدرجه أنا محتاجه شي ضروري باجر طالعتنا بنظره احتقار وأسلوب كرييه وانه نعم شوو … لا طلبت تسلفني ولا طلبت منها شي مب ضروري آخر شي طلبت من أخويه يوصلني ع دوامي بأجر لانه سيارتي في القراج …

تقرا سورة البقرة يوميا وتستغفر لكن للأسف شو فائدة القرايه !!
إذا ما طبقت كلام الله اقل شي تحاسب جدام أمي لانه الأم اقل كلمه تجرحها
خبروني كيف أتصرف وياها .. اللحين رجعت تسألني ما كلمتها ..
عاملتها وسألتها باحترام وكم تجاهلت أسلوبها وصراخها وعصبيتها لكن ماشي فايده ..
كتبت اهنيه لانه اعرف أختي ما بترتاح لين تعرس وتجرب المسؤوليه الكبيرة إذا ع العرس كلنا نبا لكن هو الأمر بيد رب العالمين والحمد لله

من اللحين أخبركم هي مب من النوع الي يتفاهم
عشان جذي لاحد يقول لي أكلمها ..
أنا ممكن أخلي الوالدة تكلمها

الله يهديها
الزواج مب كل شي في هالدنيا

ربي يريح بالها ويرزقكن جميعاً بالأزواج الصالحين .اللهم آمين . أختي أنا ما راضية عن تصرف أختج مع الوالدة ولكن يمكن أختج عندها ضعوط في الدوام وزادت هذه الفترة , نقطة ثانية الأخت الكبيرة الغير متزوجة الناس يحسوسها أنها هي السبب في عدم زواج خواتها اللي أصغر منها ! بكل بساطة يمكن فيه ناس تقول لها بكل غباء: أتزوجي علشان خواتج إيهن نصيبهن ويتزوجن ! وما دمتي ما تزوجتي محد بيخطب خواتج !!! كأنه الموضوع بيدها !( هذا الكلام مع الأسف حاصل وسمعته أنا شخصياً في يوم من الأيام وسمعته بنات غيري ) , يمكن حاسة بالضغوط من كل جانب وعدم الإهتمام وأنها بس تعطي وتعطي ومحد حاس فيها , ويمكن شايفة كل اللي قريبات منها وحواليها من نفس عمرها وأصغر تزوجن , كل هذه الأسباب ممكنة فأنتوا حسسوها بأهميتها في حياتكم وبحبكم لها , مرات هدية بسيطة لها وقع كبير في النفس ما كنا نتصوره . يمكن هي محتاجة تغير ,يعني تسافر مع حد من أهلها أو حتى حتى تروح مكان تغير فيه جو .لو عندها وقت فراغ شجعوها تمليه بالهوايات أو حفظ القرآن أو تكملة دراسة عليا أو دراسة أو تعلم شي تحبه .
إذا عندها حد قريب منها جداً مثل قربة أو صديقة وشفتي أنها إنسانة واعية وحكيمة وأنه ممكن تطلبي منها المساعدة بحيث أنها تتكلم مع أختج , أطلبي منها تساعدج بدون ما تخبر أختج .

رمسيها رضى الله من رضى الوالديين ..
قولي لها كيف تبين يتحقق الي ف بالج وانتي جي تصارخين وتضايجين ب امي ..
و الزواج حبيبتي قسمه ونصيب يمكن يكوون خير لها ..
وصدقها الاخت الي ردت عليج الزواج مب كل شي فالحياه ..
الله يصلح حالها ويهدييييها ان شاء آلله انصحييها دوم وان شاء الله تستفيد ..

الله يهديها ويصلحها كل شي يهون الا الوالده مسكينه شو بيدها تسوي الزواج قسمة ونصيب بعدين والله ياما في ناس مزوجين لكن حياتهم الله لايراويج كلها أرزاق من رب العالمين واختج يمكن مضغوطة وتحس بمسؤوليه كبيره عليها مب شرط حد يكملها اذا ماتتفاهم لو مثلا حد يهديها هديه كتاب حلو مثل لا تحزن للعريفي وفي كتب كثيره يعني حاولوا تهدونها من نواحي ثانيه غير الكلام شريط حلو يتكلم عن الوالدين وبرهم يعني جذي
عسى ربي يرزقكم بالزوج الصاالح ويرزق كل بنت تحلم بهالشي

فديت الوالده

والزواج قسمه ونصيب
ربي يرزق كل بنت بالريل الصالح يارب