حبيت في هالموضوع اني اشاركم تجربتي مع تأخر الحمل بكل تفاصيلها، والهدف بس اني اعطي أمل لكل وحده تتنظر فلذة كبدها، لكل وحده عايشه في كآبه وهم، لكل وحدة فاقدة الامل انها تشل طفل في حضنها.
أنا كملت قرابة 4 سنوات وانا انتظر الضنا، بتقولون في ناس صبروا اكثر، أنا اقولكم صح بس اي انسانه دخلت الحياة الزوجية بتنتظر طفل يكمل لهم هالقفص الجميل، ويملي عليهم حياتهم من أول سنة، لأن في النهاية الهدف من الزواج هو بناء اسرة.
الموضوع مب هيُن، لأنج من بعد اول 6 اشهر من زواجج بيبدا الكل يسأل، ما حملتي؟؟ ما صار حمل؟؟ قولي أول سنة يمكن الاسئلة تكون أقل، بس من تدخلين ثاني سنه، الهجوم يبدا عليج من كل صوب. أهلج وأهله، للحين كلماتهم أتذكرها، للحين نظراتهم أتذكرها، قمت أتجنب اسير تجمعات، لأن أول سؤال ينسأل ما حملتي؟ وتصيرين انتي الحدث في المكان، وطبعاً بعدين تتوالى الاسئلة الاخرى اللي هي، ما فحصتو؟ ليش؟ روحو عند الدكتوره الفلانيه احسن والثانيه تقولج لا الدكتور الفلاني احسن، وتبدا القصص عن صديقاتهم تنذكر، فلانه راحت اهني حملت من اول شهر وفلانه راحت هناك وحملت، المهم يدخلونج في دوامه انتي في غنى عنها، ولا اللي اتيج واتقولج انتي تدعين لربج عشان تحملين؟ حتى في علاقتي بيني وبين ربي تدخلتو !!
في هالاربع سنوات كرهت وايد ناس كنت احبهم، صحيح بتقولون هم يخافون ع مصلحتج، بس اي وحده تمر بنفس وضعي بتعرف الشعور الحقيقي اللي وحدة تحس فيه لما تسمع كل هالكلام، أوردي أنا ليل ونهار شاغل بالي هالموضوع، مع العلم اني موظفة، يعني شاغله وقتي بس هالموضوع ما يروح عن بالي، لأن باختصار الناس اللي حواليج يذكرونج فيه 24 ساعه ولأن وين ما تروحين تشوفين الاطفال جدام عيونج، يعني باختصار ما تقدرين ما تفكرين فيه.
بعد سنة تقريباً، اتخذت قراري وقلت لزوجي خل نفحص ونشوف، أنا راجعت عند الدكتورة فاطمة نوح اللي في الشارجة، فحصتني وقالت الحمدلله كل شي طبيعي بس داومي ع الرياضه عشان المبايض تتنشط زياده وداومي ع الاكل الصحي،ورفضت تعطيني اي منشط لأن توني سنة بس ع الزواج، وهو لما فحص قاله الدكتور مافيك اي مشكله.
كملت سنة ثانية وللحين الوضع نفسه، ما تغير شي ابداً، نصحوني اني اسير عند حرمة عشان تمسحني، يمكن الرحم متحرك ولاشي، المهم خذت اجازة من دوامي و رحت اسبوع كامل عند وحدة تمسح، الحرمة قالت لي عندج كسل في المبايض، و عطتني دوا اخذه مع المسح، وكان طعمه فضيع، وطبعاً كلكم تعرفون المسح كيف يعور ويضايق بس قلت بتحمل وان شاء الله بعد ما اخلص الكورس بحمل، وقالت لي خلاص مبايضج تمام الحين وبتحملين، وربي بعد ما كتب لي الحمل.
ع نهاية السنة الثانية، نصحتني صديقتي اني أروح عند دكتوره نهلة اللي في دبي، لأن هيه كانت متأخره سنتين في الحمل والحمدلله الله عطاها على ايدها، عند نهلة قالت لي انتي فيج كسل في المبايض ولما شافت فحص زوجي قالت له انت فيك لزوجة ف السائل المنوي، والحمل مستحيل يتم لأن اللزوجة عالية، أنا اهني فرحت لأني حسيت اني عرفت المشكله وين، بدت معانا بكورسات الكلوميد حقي وهو عطته دوا يخفف اللزوجة، والحمدلله كانت تصير عندي بويضات ممتازة وهو اللزوجة خفت عنه وايد ،وتقول لنا هالشهر الحمل لازم يصير 100% بإرادة الله، جربنا الكلوميد 3 شهور، بس الله بعد ما كتب لي الحمل.
دخلنا في السنة الثالثة، والكلام يزيد من صوب أهلي وأهله، قمت آخذ موقف وأرد برد قاسي ع كل حد يسألني، أحس نفسيتي وايد تعبت، بعض من الناس بدت تفهم اني اضايج وما احب حد يفتح هالموضوع معاي، بس في الكثير اللي يطنش مشاعرج ويتفلسف عليج، الحمدلله كنت أصيح بس عند ربي، حتى أمي ما شافت دموعي، ليش اشتكي لحد مدام اللي بإيده تفريج همي موجود؟ والحمدلله كنت صابرة ومحتسبة الاجر عند الله.
كنت اسوي وايد سيرج في النت، عن تجارب البنات وهاالاشيا، وكنت كل مره اجرب عشبه ولا خلطة بس بعد ماشي فايدة، لين ما أهل زوجي غصبوني اني اسوي الحجامة، وانا من النوع اللي يخاف من هالاشيا، بس قلت عشان يسكتون خل اسوي، وسويت الحجامة وبعد الله ما كتب لي الحمل.
قمت أشك في نفسي، يعني مسح ومسحوني وحجامة تحجمت وكلوميد وخذت، المشكله شو عيل؟؟ ومن وين ؟؟ قام الكل يقول أكيد عين صابتكم، لازم تروحون عند مطوع. وطبعاً كالعادة بس عشان يسكتون عنا، سرنا. قال المطوع لزوجي انت سليم بس حرمتك فيها عين، خل تستمر ع الرقية والبقرة وماي زمزم والحجامة. الحمدلله انا تقريبا ما يمر اسبوع الا واكون قارية البقرة، والاستغفار دايماً شغاله عليه، حتى زوجي يستغفر دايماً وسبحان الله الله ما كتب لنا الحمل بعد.
آخر شي قررت وقلت لزوجي خلاص بنسافر برع، بس يا ع بالي مركز دبي للاخصاب، فقلت له ليش ما انجرب عندهم قبل بعدين بنفكر في السفر،بس شرطي الاول والوحيد ان محد من أهلي ولا أهله يعروفون بالسالفه، لان قبل اي مكان كنت اروح اخبر الكل فاتذكرت رسولنا لما قال (اقضوا حوائجكم بالكتمان) فاتفقنا ان الامر يتم سر بيني وبينه، هو رشح لي دكتور وليد، بس انا فضلت دكتورة لاني برتاح اكثر من جميع النواحي، طبعاً صليت استخارة في البداية واخترت الدكتورة حنا واتوكلت على الله، من دخلنا عند الدكتوره ردت سوت لنا كل الفحوصات من اول ويديد، الحمدلله من ناحيتي انا كل شي سليم بس زوجي ومشكلة اللزوجة، فقررت انه تعطيه دوا وبعدين نبدا بعملية التلقيح، بس انا وزوجي رفضنا التلقيح وفضلنا الانابيب، والدكتوره تقول ان زوجتك صغيرة خلنا ع التلقيح أحسن، بس ما ادري ليش انا وهو كنا مصرين ع الانابيب، لين الحمدلله اقتنعت الدكتوره.
قبل ما نبدا بالانابيب، أصريت ع زوجي ان نسير العمره، والحمدلله الله يسرها لنا، وقلت له الهدف ان ندعي ف هالارض المباركة الطيبة أن عمليتنا تتيسر، وانها اتم على خير، هذي مب أول مره انا اروح فيها العمره معاه، بس دايما يكون بالي مشغول بالصوغة والهدايا والشوبينق، بس هالمره كانت غير، أبداً ما سويت شوبينق وكنت اغلبية وقتي في الحرم أو في المصلى، وخصوصاً في الثلث الاخير من الليل،والله كنت أسجد وأصيح لربي واشكي له عن اللي في قلبي والحمدلله ارتاح بعدها.
بدينا في اجراءات العملية، بيني وبينكم ما كنت اعرف شو انابيب، بس اللي اعرفه اني ابي توأم، من جي أصريت ع الانابيب، فبديت بكورسات الابر، انا من النوع اللي ما يتحمل شي، فالابر كانت هم بالنسبة لي، الابر لازم اخذهم في بطني كل يوم ابرتين، ولازم بعد قرابة الاسبوع اروح ويجيكون اذا البويضات تكونت ولا لأ، وبعدين تبدين بابر من نوع ثاني، المهم لين يشوفون ان عدد البويضات صار تمام، يحددون لج موعد عملية سحب البويضات، طبعاً كنا نروح مواعيدنا ومحد يعرف عنا، حتى العملية سويتها ومحد درى عني، في نفس يوم العملية كنت وايد خايفه لأني أول مره ادش غرفة العمليات ومن دون حد من اهلي، فكنت اشوف البنات معاهم اهلهم وكنت اصيح بس الحمدلله دخلوني وخدروني وعدت ع خير. بعد ما خلصت العملية قالت لي الدكتوره سحبنا عدد من البويضات والحمدلله تمام بس الحيوانات المنوية تحتاج منشطات زيادة. المهم اتصلو فيني بعد يومين قالو تعالي للعملية ترجيع الاجنة، عندي جنين واحد حالته ممتازة والثاني جيدة فقالت الدكتوره برجع واحد بس فأنا رفضت وجبرتها ترجع الاثنين، في يوم الترجيع كنت وايد متوترة وخايفه لأن بدون تخدير، واحس اني وايد لعوزت الدكتوره وهيه تحملتني يمكن لصغر سني، فبعد ما خلصت حسيت من ويهها ان الحمل ما بيصير،لأني وايد توترت، بس بعدين قلت ف خاطري انا ييت اهني بعد ما صليت استخارة، ومستحيل ربي يخليني اتعب كل هالتعب بروحي واخر شي ما احمل، قالت لي بعد 10 ايام سوي تحليل الحمل وشوفي النتيجة. يا بنات في هالعشر ايام ما يلست طول الوقت ع السرير وما تحركت، لا بالعكس كنت اروح الدوام وارد واطلع اروح مولات يعني تحركت، وكنت كل يوم اقرى البقرة واستغفر واتصدق بنية الذرية الصالحة، وطبعاً في قيام الليل كنت ايلس بين ايد ربي واقوله من البدايه انا شو سويت للحين واصيح واحس براحة غريبه بعد ما اخلص، وزوجي كان الحمدلله يدعي من خاطره. فهالعشر ايام حسيت بكل آلآم الدورة، وحسيت انها خلاص بتنزل علي، وقلت حق ريلي شكلة الله ما بيعطينا الحمل هالمره بعد، وقمت اسوي سيرج فالنت عن وين احسن مكان اسافر للعلاج، بس لما خلصت العشر ايام ما تحمست اني يمكن اكون حامل لأني قريت من تجارب البنات ان بسبب المنشطات عادي الدوره ما تنزل الا بعد اسبوعين، بس رحت سويت تحليل دم والحمدلله الحمدلله الحمدلله النتيجة كانت ايجابية.
السر مو في الدكتورة، ولا في المكان، لأني لما اتصلت للدكتوره وخبرتها ان النتيجية ايجابية استغربت وايد وانصدمت وقالت لي أكيد دعيتي وايد في العمره، يعني هيه ابداً ما كانت متوقعة بنجاح العملية، السر هو اني اتجهت لربي بقلب وتوكلت عليه، ودعيته وصحت عنده واشتكيت له، وانا كنت اروح مواعيدي في دبي للاخصاب، كنت اسمع وايد يتكلمون ويقولون هاي المره الثانيه أو الثالثه لهم من تجربة الانابيب وما صار الحمل، بس كنت اقول اذا الله يبي يعطيني بيعطيني، وكنت متوكلة عليه والحمدلله ما خاب من توكل عليه، يمكن هو أخر لي الحمل عشان احس بقيمته الحقيقه.
في الاربع سنوات اللي مرو، خواتي كلهم الاصغر عني تزوجو، وما شاءالله عليهم كلهم حملو من اول سنة، صحيح ان هالشي كان يأثر في نفسيتي، بس كلما اتذكر ( ان الله مع الصابرين )، انسى كل شي، كنت اروح اشتري لعيالهم وعيال حمياتي ثياب والعاب، واحس اني اشتريهم حقي، والحين يا اليوم اللي الله اكرمني فيه وبشتري حق عيالي بإذنه تعالى.
من بعد هالموضوع ابي كل وحده فيكم تبذل السبب بس ما تخلي التعلق يكون فيه، وأوصيكم بقيام الليل والدعاء لأن بالدعاء تتغير الاقدار، والصدقة والاستغفار وقراءة البقرة، سورة البقرة بعد ما تتعودين ع قرائتها ما بتاخذ من وقتج وايد، لأنها خفيفه وايد ع القلب والروح.
أتمنى منكم حبايبي تدعون ان الله يثبت لي حملي، وأن الله يرزق كل محرومة تتمنى شوفة الضنا، واسمحولي ع الاطالة.
اختكم نورة
الحمدلله رب العالمين اللهم بارك
الله يثبت لج حملج ويرزقج بتوأم سليم معافى ويقوّمج بالسلامة
مشكورة اختى على سرد قصتج
الله يتملج اختي على خير
و الله اهلج و غير اهلج بياكلونج و بيرمسون عنج ف موضوع العيال و خلاص الوحده من تتزوج سبحان الله لا ارادي تفكر فالاطفال ، انا اول ما عرست حملت و نزلت توأم بسبب الظروف و المشاكل و للحين الله ما كتب لي احمل مره ثانيه و قاعده اعالج .
صح الوحده تبا تستانس و تكشخ و تطلع مع ريلها بس الوناسه مب دوم ترا اكيد تبون حد يكمل وناستكم انا قبل و الله ما كنت افكر فالعيال خير شر و اقول اول سنه مابا و حتى بحمل كل ١٠ سنين بس سبحان الله من حملت 
ماعرف شقولج 
ربي يحفظهم لج و يحفظج لهم
ويجعله ذرية طيبة اللهم امين
لا تنسينى من صالح دعواتج بظهر الغيب ان ربى يكرمنى الذرية
تمنيت لو ان قصتك اكتملت بانك ربيتي توم
, ارقي نفسك اختي ترى العين حق
وانصحك نصيحة اخت لاختها لا تودرين العبادات الي كنتي تسوينها , بالاول يمكن كنتي تسوينها لأجل تحملين , اتمنى تستمري عليها هالمره حمدا وشكرا لله واسأليه دوم يتمم لك على خير ويبارك لك فيهم ويجعلهم ذرية صالحة
لكن بغيت اقول شي بخاطري, صحيح ان الأطفال نعمه والكل يتمناها , لكن هم بعد مسئولية جدا كبيرررررررة , بسببهم بتفقدين أشياء واااااااايد حلوه كنتي تسوينها قبل
الهدوء بالبيت يصير شي مستحيل !! البيت الي دوم نظيف !! الطلعات الهادية والتمشايه و و و ما تتهنين على شي حتى وقت الغدا ما تعرفين تاكلين اللقمه ههههههه
والنوم يصير حلم 
, أشياء واااااااااايد بتفقدينها بحياتك , طبعا انا اتكلم عن الأم الي تربي عيالها بروحها , مب عن الي ترميهم للخدامه 
الحمد لله عندي ولد وبنت وحاليا حامل بشهري الخامس ما شا الله تبارك الله , يجيني وقت احس عمري ابا انفجر منهم خلاااااااااص
