الصغار من عمر 6 شهور لين 5 سنوات ؟؟؟ شو تأكلونهم في السفر ..؟؟ من المطاعم ؟؟
تأخذون معاكم أكل معلب ؟؟ والا شو تسوون ؟؟؟!!!
تعالوا معايه براويكم ..
كيف أعد عدت الاكل ومعدات النظافة وادوات الطبخ للأطفال في السفر .
وخصوصا انا من هواه السفر يعنى في السنه نسافر 4 مرات تقريبا
وفيه أسأله ممكن تخطر على بالكم مثل :
كل هالاغراض تأخذينها معاج ووايد ؟ وهي اشياء عاديه ممكن تتوفر في كل بلد ؟؟
1- علشان تكون الرحله مرتبه وما يضيع الوقت في البحت عن مستلزمات الاطفال أخذ كل اللى احتاجه من البيت
2- لانه فيه منتجات معينه موجودة عدنا ومتعودين على استخدامها لما نسافر ما نحصل نفس المنتج بالضبط .
3- توفير في السعر مثلا ممكن اشترى كل الاغراض من الجمعيه بـ 200 درهم واذا اشتريت نفس الاغراض من اوربا يمكن تكلفى 200 يورو .. هههه
4- اكون متأكدة من الاكل اللى ما خذتنها معايه حلال .
في الفنادق تتوفر وجبه الفطور مجانا (بوفيه) ؟؟ فليش نشل اغراض الفطور ؟
1- فيه فنادق او شقق فندقيه ما توفر وجبة الفطور.
2- ودائما بوفيه الفطور في الفنادق يغلق على الساعه 10 او 10.30 ومش دائما الاطفال يقومون الصبح من وقت علشان يلحقون على الفطور .
3- فيه فنادق تقدم وجبات فطور غير متنوعه ( كورن فلكس + فواكهه + روب ) فقط .. حتى بيض ما يحطون .
وشو عن الاشياء الطازجه ..؟؟
وتبقى الاشياء الطازجه اروح السوبر ماركت هناك واشتريها مثل ..
(البيض + الجبن + الروب + الخبر + الفواكهه + الخضروات)
واللى راح تكون ملاحظتها .. هل نحنا رايحين نستانس ونغير جو ؟؟
والا رايحين نطبخ ونغسل وانظف؟؟
خواتي انا ما اسافر الا معايه خدامه لانه اولادي صغار (الله يحفظهم)..
وانا وزوجى نحب السفر مع الاولاد
وفي نفس الوقت هم أمانه في اعناقنا يعنى لازم نوفر الهم كل متطلباتهم في السفر
مش معقوله راح اسافر معاهم استانس واغير جو
واقعد ااكلهم فاست فووود واكل المطاعم الغش ..
وامشى الحال ما احب هالاسلوب ..
اهم شي النظافه والترتيب والاكل الصحي .. وطبعا بدون ما اتعب حالي هههههه
فأغلب الوقت الخدامه تتم في الفندق .. واتسوي السيرفس .. ونحنا نطلع مع اليهال
وفي الاوقات اللى ما عندها شغل نطلعها معانا .. وما نقصر فيها ..
**********************************************
اولا نقوم بتحضير شنطه خاصه فقط لهذي الاغراض ..
وطبعاً بعد ما نحط الاغراض لازم وزنها ما يتعدى 32 كيلو ..
بسم الله الرحمن الرحيم نبدأ
وجبه الفطور ..
حليب المراعي
حليب بالفراولة
قشطه + عسل
فول مدمس
كورن فليكس (اي نوع اولادك يفضلونه)
بلاليط (هيل + زعفران+ سكر)
شاى لاتيه ( لي انا )
حليب رينبو + شاي ليبتون ( لي انا ولزوجي)
وجبة الغداء او العشاء
أرز
معكرونه
اندومي
تونه معلبه
معجون طماطم
ماجي + ملح
زيت طبخ + زيت زيتون
دقوس ( لي انا طبعا)
أغراض الـ baby
بسكويت
حليب أطفال
أكل جاهز (حبوب)
Bibs ورقي استعمال مره وحده
ترمس لحفظ الماء الحار
بامبرز + كلينكس مبلل لتنظيف
جهاز تعقيم المراضع + مراضع + فرشاه لتنظيف المراضع (نسيت اصورها)
معدات الطبخ
جدر على حسب الحجم اللى تحتاجينة + مقلاة (لقلي البيض او للفول)
كنكه كبيرة لعمل الشاي بالحليب (لي ولزوجي)
دله كهربائية لتسخين الماء (ما احب استخدم اللى موجود في الفندق)
خلاط لهرس أكل الاطفال مناسب للأطفال من عمر 6 -12 شهر
مقص + سكين + شوكه او ملعقه خشبية + مفك للعلب المعدنية
cooker كهربائي احسه احسن عن جدر الكهرباء (لانه ممكن احط المقلاه او الجدر او الكنكه عليه)
أدوات النظافه
كلينكيس
مناديل ديتول المبلله
ديتول لتنظيف الحمامات
دواني الحنون لملابس الاطفال
صابون سائل لغسيل المراضع والصحون
صابون بودة لغسيل الملابس الداخليه للأطفال
اسفنج لغسيل الصحون + فوطه + اسفنجه لمسح الاسطح
اكياس بلاستيكيه لرمى المهملات والبامبرز من الغرفه اول بأول
كأس بلاستيكى كبير حق التشطيف لان اكثر الفنادق ما فيه شطاف عند المرحاض (الله يعزكم)
الادوية
جهاز لقياس الحراره
دواء خافض للحرارة
دواء مضاد للحساسة عن التعرض لقرص
لزقات + كلينكس طبي معقم للجروح
جهاز التبخير والادوية الخاصه فيه (للأطفال اللى يعانون من الربو)
واي ادوية أخرى قد تحتاجينها لأطفالك
او للكبار مثل الاستربسل والمضادات الحيوية الخاصه بالاحتقان وادوية الضغط وجهاز الضغط ..الخ
وفي انتظار أرائكم واقتراحاتكم .. علشان يكون السفر مريح وبدون عناء .. بإذن الله تعالى
ما خليتي شي ….
كفيتي و وفيتي ….
بس تدرين في ناس ما اتحب تاخذ اي شي من اللى ذكرتيه … و عندهم اطفال بعد
بصراحة أنا ما عندي خبرة في أدوات الطبخ ودايما أنساها في السفر
يعطيج العافية
من الأشياء اللي خذيتها وفادتني اكياس ماجي اللي بالكبسه وبخلطة البرياني حلوة للسفر وتعطي العيش ريحه وطعم يدوخ وخاصة في ايام كنا نشتري الدياي من برع (مطاعم هندية)والعيش اسويه انا …وبعد من ضمن الأغراض خذت بروش صغير لتنظيف السيارة كنا مأجرين سيارة وطبعا ياكلون فيها الصغارية فكنت اخمها اول بأول …وباقي الأشياء اللي ذكرتيها كلها مهمة وضرورية وحلوة انها بالصور ….لي عودة للموضوع ونتريا منج المزيد …
وتقريبا نفس الاشياء الي اشلها
لان عيالي وريلي ما يحبون اي اكل
بس حبيت ازيد التمر
واذا دولة باردة حلو تشلين شوربة بعد
والتلبينة بعد
الفراش الي ينفرش للاكل استخدام مرة وحدة
ومخمة صغيرة
ويمر ودخون *_^
وياهم للبيبي في السفر وانا منهم ، تلقينا نترس الشنطة
بكل شي وآخر شي نفكر ناخذه هو الأشياء المهمة للبيبي
تسلميييييييييين فديتج
