+++ بعض النصائح لتربية طفلك +++

السلام عليكم والرحمة

اشحالكن خواتيه؟

بصراحة لاحظت وايد من الأمهات ما يعرفون الأسلوب الصح للتربية..

يتبعون أسلوب التخويف والضرب..

وهذا أكبر غلط…

عندي لكم بعض الأساليب اللي خلت ولديه ولله الحمد طفل ذكي ما شاء الله ونبيه ومتفتح ويقول الصدق..

الخطأ الأول..

في البداية.. ابتعدي عن أسلوب التخويف.. خاصة لو كان ولد..

بيكبر الولد وبيكبر الخوف معاه.. باجر يوم بيعرس من اللي بيدافع عن البيت لو هو خواف.. حرمته؟

شي وحدة كانت مروعة ولدي وقايلة له إذا ما رقدت الحرامي بياكلك.. بصراحة تضايقت وااااااايد.. لأني أنا ما أحب أخوف ولدي.. فليش هي تروعه..

كيف شليت عنه الخوف.. كلمته بأسلوب راقي.. قلت له الحرامي إنسان.. حاله حالنا.. بس ما يخاف من الله وياخذ أغراض الناس بغير وجه حق.. حطيت جدامه أغراض خواتيه.. وشليت منه ع أساس أونه خواتيه ما يعرفون.. فاتي أختي تدور ع غرضها ولا تحصله.. فأطلع أنا حرامية..

شرحت له الحرامي بالكلام.. وبالتمثيل.. والحمدلله انشال عنه الخوف من كلمة حرامي..

الخطأ الثاني..

التكلم مع الطفل بأسلوب وكلمات مبهمة.. مثال.. نِلُوح نمنم؟ بدال ما تقول نروح ناكل..

ليش ترمسينه بهالأسلوب.. حتى لو هو طفل.. إذا كلمتيه جيه.. بيصير النطق عنده صعب.. وبيتأخر في النطق… أما لو كلمتيه عادي.. صدقيني بيرمس أسرع..

الخطأ الثالث..

كل من هب ودب يربي لج عيالج.. يعني اتي وحدة بيتكم وتدخل في طريقة تربيتج لعيالج.. هي ما يخصها.. كل اللي عليها تعطيج نصايح.. وانتي تاخذين منه اللي يناسبج.. إما إنها تقوم وتخوفه بضربك ولا شي..

فأتمنى أختي الام ما تستحين منها وتوقفينها عند حدها.. لأنه هالأطفال أمانة في رقبتج انتي..

الخطأ الرابع..

الضرب والصراخ.. ليش تضربين عيالج.. ما تعبتي فترة الحمال والوحام والولادة والنفاس؟؟
الضرب بيولد عندهم العنف.. وبيستخدمون هالأسلوب في المستقبل مع كل الناس..
شي أطفال من يروحون بيت ناس يبدون يضربون عيالهم.. السبب إنهم يفجون حرة أهاليهم في أطفال الغير.. وخاصة لو كان الطفل اللي مجابلنه أصغر عنه.. فالله يعينه..

الضرب مب أسلوب حضاري..

ولاتي الوحدة تقول نحن انضربنا وأحينه نحن أحسن ناس.. أسلوب التربية تعتمد ع الوقت..

قبل لو ننضرب تراه ماشي أفلام عنف تولد عندنا الغبطة والقهر والعنف..

والكل قبل كان ينضرب.. أما أحينه تحصلين وحدة تضرب عيالها بين 10.. فهالطفل بينشأ غلط.. لأنه بيكون هو غير عن الباقيين.. وبيحقد عليهم وبيفج حرته فيهم..

الخطأ الخامس..

أسلوب المقايضة.. سوي جيه بعطيك جيه..

باجر يوم بيكبر بتطلبين منه شي.. بتكون العادة متطبعة فيه.. فبيقول لج كمثال عطينيه فلوس بسوي لج.. غير جيه مافي..

ساعتها ما تلومين غير نفسج.. انتي زرعتي فيه هالطبع..

الأسلوب الصح إنج تسوين له لوحة.. تعلقين عليه ستيكر ممتاز.. ولا ترسمين له نجمة ع كل فعل صح سواه.. وجيه..

بعض أساليبي

عشان أبعد ولدي عن الكذب والعادات السيئة..

إذا جذب.. كنت أقول له مكتوب ع يبهتك كلمة كاذب.. قول الصدق عشان يتحول لكلمة صادق..
فكان ع طول يعترف لو جذب.. أو لو بيجذب كان يحط إيده ع يبهته.. فكنت أعرف إنه يجذب… وأزعل عليه.. والحمدلله ما يهون عليه.. ع طول يراضيني ويقول الصدق.. ولو مثلاً شل شي ما يخصه.. كنت أقول له مكتوب سارق.. فيستحي ويرد الغرض..

الأسلوب الثاني اللي أتبعه.. أكلمه عن الجنة ونعيمها.. وشو الأشياء اللي تخليه يدخل الجنة بإذن الله.. وأول هالأشياء الأعمال الصالحة.. تحصلينه بروحه يسوي الشي واييني فرحان يعلق نجمة ولا كلمة ممتاز ولا شي ع اللوحة اللي مسويته له.. ويقول هالشي بيدخلني الجنة ولا لأ؟؟ يعني بدال أسلوب المقايضة.. اتفقنا نرمس عن الجنة ونعيمها..

الأسلوب الثالث.. ما أحرمه من شي في خاطره.. ولا أمصخها معاه..

يعني لو كان في خاطره شي معين.. ندرس الأسباب اللي تخليه يريد هالشي.. وهل هالشي ضروري ولا لأ.. والحمدلله إنه ما يعاند إذا توصلنا لأنه هالشي مجرد مضيعة للوقت والفلوس.. وإنه في أشياء ثانية أهم.. كل هذا ليش.. لأنه من البداية علمته..

الأسلوب الرابع.. الثقة.. عطيته الثقة وهو الحمدلله واثق مني.. ما أجذب عليه.. إذا بطلع مكان.. أقول له وين رايحة.. في حال قال بيي معاج شليته لو كنت أقدر.. وفي حال ما أقدر أفهمه ليش ما أقدر أشله معاي.. فيقول لي بكل ذرابة شو الأغراض اللي يباها وأييبهم له..

يعني معظم الامهات يشكون إنه عيالهم يباغمون يوم يظهرون للسوق.. السبب إنج عودتي عيالج تشردين عنهم.. تخشينهم وتظهرين.. من البداية عوديهم إنج تلبسين عباتج وتقولين لهم.. أنا رايحة المكان الفلاني.. لا تشاغبون وكونوا مؤدبين.. صدقيني مع مرور الوقت بيتعودون..

الأسلوب الخامس.. أشتري له كتب وبطاقات وأشياء تسليه وتملأ وقت فراغه.. وتفيده..

يا أم.. عطي حنانج كله للطفل.. ما بينشأ دلوع.. بالعكس.. باجر هو بيعطي من هالحنان لعياله.. أما لو ربيتيه ع الضرب.. فبيضرب عياله.. فاقد الشيء لا يعطيه..

وأحينه كل وحدة تحط لنا مشكلة تواجه ولدها.. والأخوات يعطونا الحل..

أو وحدة تحط مشكلة كانت تواجه ولدها وكيف حلتها.. عن نفسي كان ولدي يغار من أخوه.. فقمت أشتري اشياء يحبها وأعطيه ع أساس من أخوه.. وطبعاً اللوحة.. إذا عطى شي لأخوه أشله عشان يختار الشي اللي يبا يعلقه ع اللوحة.. أنا لوحتي مغناطيسية فيها كل شي جاهز.. صورة النجمة والسمايل فيس وكل شي.. بس كل وحدة تروم تسوي لوحة عادية وتكتب عليها..

وهذا الموضوع من مجهودي الشخصي..

أتمنى أي وحدة تنقله تذكر المصدر

منتدى سيدات الإمارات

وهذا مثال للوحة اللي تشجعين فيها ولدج وتحطين له نجوم

reward chart