عندي بنوتة وحدة وعمرها سنتين و4 شهور وانا مطلقة من تقريبا سنة ونص والبنوتة الصبح اخليها مع الخدامة والظهر يوم ارد اكون انا معاها بس هي وايد متعلقة بالخدامة وانا انقهر منها يوم ماتي صوبي والخدامة تقهرني وايد تستانس يوم تشوف بنتي ماتي عندي احس انها تتشمت فيني شو اسوي معاها قبل كانت الخدامة تساعدني في سبوح بنتي الحين ماخليها ابدا وبديت اسحب بنتي منها شوي شوي ودايما مجابلة بنتي 24 ساعة يوم تلعب ويوم تتطالع رسوم متحركة ونبهت عليها وقلت لها لاتلصقين فيها وايد حتى هي كانت ترقدها بالليل الحين ماخليها احط الالعاب في حجرتي واخليها بالسرير بعيد عن الخدامة ياربي شو اسوي ويا هالخدامة انفدها واسفرها ولا اخليها لانها هي تعرف حق بنتي وهي زينة بس مشكلتها جي وايد تلصق في بنتي وانا انقهر منها .
وانا ساكنة بشقة وبنتي تمل وايد وكله طفرانة وعنيدة وراسها يابس وكله تصرخ وماتروح عند حد وماتخلينا نلبسها وتفرفر كل شي طبعا انا شاورت ابوها في الموضوع لانه هو مايشوفها الا بالاسبوع مرة وكم من ساعة بس وماخليها تبات عنده لانه متزوج وحدة ثانية وماباها تتعلق فيهم وايد وطبعا ابوها اقترح علي انه يشلها في الاسبوع ثلاث مرات ووافقت على اساس يرفه عن نفسيتها ويشل المسؤولية معاي وهو يحبها وايد ومايصدق انه ايي صوبنا .
والحين يوم بديت اشاوره في موضوع بنتي يطنشني كله يتحسب اني لاحقتنه ( طبعا كله مسجات مافي رمسة وياه ) وهاي روحها مشكلة ثانية وانا يوم اشوفه جي خلاص ماطرش مسجات مرة ثانية ماحب اكون ثقل عليه .
والحين لجأت لكم انتو خواتي اباكم تشوفون لي حل مع هاي البنية انا اباها تحبني انا وتتعلق فيني انا مب في الخدامة ومع اني والله ماقصر عليها بشي ابدا كل شي متوفر لها ومرات ابخل على نفسي واعطيها مابا احسسها انها بدون ابو ومابا هالشي ياثر على نفسيتها .
هذي اللحظات اللي تبين لي دور الام والابو في حياة عيالهم
البشكاره الحين لازم يتحجم دورها بمعنى انها ما تتدخل في تربيه البنت
انا ماعرف وضعج الحالي لكن اذا في احتمال انج تخلينها عند امج او اختج او خالتج او اي وحده فالعايله بيكون اوكي وايد
وعندي اقتراح وايد حلو .. وديها الحضانه خليها تتعلم وتتعامل ويا الصغاريه .. منها تفتكين من البشكاره ومنها تعودينها على الروضه مستقبلا
لانه بهاكي السن الصغير ما عنده الولاء .. و الحكم الصائب للأمور
الي يلعبه و يطلعه و يشتري له .. بيكون المفضل عنده .. لو مب امه و ابوه
فا انتي سوي جدول لبنتج .. كل يوم سوا شىء .. مره بالبيت و مره خارجه
بس لا تدخلين الشغاله وياكم و لا تشلينها .. بس لا توضحين هل الشغله للبنت
لانه عادي توقف على الباب و تيس تصارخ و تصيح تبا الشغاله .. فكله يوم تطلعون .. خلي الشغاله تكون بعيده
بس لا تكرهين الشغاله او تسفرينها .. زين لقيتي شغاله تتعامل زين مع بنتج .. الواحد يدورهن هل الايام
و بعدين فكري فيها اختي .. لو بنتج حبت الشغاله؟ مردها الشغاله بتسير .. و يمكن تصيح اول فترة بس بعدين بتنسى
وايد صارت لناس نعرفهم .. و تم الياهل يصيح بعدين نسى ..
فا انتي خلج طبيعيه .. و اكسبي بنتج شوي شوي .. حتى ابوها لا تدخلينه بالسالفه .. بالنهاية الموضوع يصير ببيتج مب عنده
الله يعينج الغاليه
انتي اكليها انتي سويلها كلل شي طلعيها وديها اماكن تحبها
ولا تنسين انتي امها وما تصبر عنج يعني بسهوله بتتعلق فيج
يعني الياهل يتاثر دايمن بمن حوله وبهالسن بالذات الياهل يحتاج امه معاه
رايي لو تيلسينن ويال البنوته وايد وتكلمينها وتحكيلها قصص وتطلعين وياها من دون البشكاره
وتسوين وياها كل شي تحبه من دونها
الله يوفقج اختي
