اليوم المغرب والحمد لله وصلنا من صلالة من مطار دبي الدولي ..
سافرنا يوم 16/8/2017 ..
والحمد لله الرحلة كانت وايد روعة .. والجووو وايد حلووو …
وصورت كل التفاصيل .. وبرجع احطها ان شاء الله
لان الحين راسي داير من الطيارة وحاسة بدوخة ..
بس تابعوني وان شاء الله تسترجعون ذكرياتكم وياي ..
و في انتظار التقرير
^_^
ننتظر صور صلالة ارض الاصالة
والحمدالله على السلامة
هاه كلتي المضبي
على كثر ما سمعت عن صلالة …بس ما صدقت لين ما شفت بعيني ..
سبحان الخالق خلق فأبدع … جنه الله في أرضه .. طبيعة بكر مثل ما يقولون ..
رحلتنا كانت يوم السبت .. الظهر .. 16/8 2024 ..
الخطوط: طيران الجزيرة
المطار: دبي
سعر التذكره تقريبا 1200 درهم للشخص.
مدة الرحلة: ساعة ونصف
فرق التوقيت: نفس توقيتنا بالضبط
العملة: الريال العماني .. ويعادل عشرة دراهم امارتية او اقل بقليل ..
احنا سبع أشخاص اربع كبار وثلاث صغار …
طبعا وصلنا المطار في وقت مناسب جدا وكانت لنا فرصة اننا نتمشى في السوق الحرة في دبي ..
وما شاء الله السوق كان ضخم وكبير جدا ..
اشترينا بعض الأشياء الخفيفة من الكاكاوات واقلام والوان لليهال ..
ورحنا خلصنا امورنا كلها وقعدنا نتريا الطيارة .. لين ما وصلت ونزلوا منها الركاب ..
ويا دورنا ..
الطيران كان على الجزيرة للطيران ..
الطيارة نوعا ما كانت صغيرة .. لكن الحمد لله مريحه ..
وبالنسبة للوجبات لازم تشترونها على الطيارة ..
وكانت اسعارها غالية .. فيفضل تاخذين خفايف لليهال احسن من المشترى على الطيارة
وبعد فترة بسيطة طارت الطيارة ..
وشفنا مشاهد روووعة جدا جدا .. لما الطيارة تدخل في الغيوم … ولما تطير فوق البحر والبر ..
بس احلى شيء لما ندخل في الغيوم مع مطبات جوية خفيفة بسبب كثافة الغيوم ..
ولما وصلنا صلالة شفنا الطبيعة الجبلية من فوق روووعة جدا ..
بس للأسف كاميرتي تعيسة في الزوم ..
والحمد لله وصلنا لصلالة على العصر وخلصنا من المطاار بسرعة ..
وكان في فرق شاسع جدا بين المطارين .. والله يعزج يا بلادي ..
ولما وصلنا هنااااك ..
المطاار كنا مسوين حجز فندق وحجز سيارة ايجار ..
وكانت السيارة واقفة تتريانا .. حطينا اغراضنا في السيارة ..
وكانت فورويل قير عادي بـ 30 ريال عماني في اليوم والليلة .. يعني 300 درهم امارتي ..
وما رجعنا الفندق لا ..
قلنا نستغل الوقت شوي وندور في الخضااااااار والطبيعة العجيبة ..
ورحنا صوب اليبال شوي …
وهذي صور من اول ما وصلنا ..بصراحه كنا منبهرين … من الجمال .. وروعة الطبيعة ..
لأننا كلنا يايين اول مرة ما عدا اخوي دايما يروح ويا الشباب .. بس احنا الحريم اول مرة ..
طبعا في الصورة الضباب كثيف .. وكان في رذاذ والجووو روعة وبارد تقريبا
وكان الجو قريب المغرب ..
يتـــــــــــــــــــــبع ..
وشفت صور وعيبتني ..^_^
بس بصراحه ما افكر اروح لووول
نتريآآآ التكمله حبيبتي
ونرقب اليديد & المميز
لما الدنيا ليلت علينا وكنا تعبانين من السفر ..
رحنا الفندق .. وكنا حاجزين من الأمارت ..
فندق بيت الحافة .. وهو قريب جدا من المطار مسافة كيلو متر واحد فقط ..
وجنب دوار النهضة على طول ..
الفندق : بيت الحافة
التصنيف: 3 نجوم
سعر الليلة: 80 ريال عماني يعني ما يقارب 800 درهم امارتي
تقييمي: جيد .. بس الرطوبة عالية …
والخدمة ما لحقوا يخدمونها ..
في الفندق عيادة وصيدلية وملاعب وصالة رياضة .. بس كلها عاديه وبسيطة ..
اما المصعد ضيق جدا ..
وهذي التفاصيل
اول ما دخلنا الفندق ريحه الرطوبة العالية ضربت روسنا .. وقلت الله يستر من
الياي . .. طبعا حجزنا غرفتين …
غرفتنا كانت زوينه .. ونظيفة ..
طبعا انا من النوع اللي احب اصور تفاصيل للذكرى ..
فصورت بعض اللوحات المعلقة في الغرفة ..
بصراحه حسستني اني رايحه مصر مو عمان …
كلها لوحاات فرعونية ..خخخخ ..
شوفوا معاي .. لوحتين والباقي مظلمات في الصور ..
الغرفة الثانية ما صورتها .. بس كاااانت تعيسة والفراش معفن
وريحته الرطوبة تضرب الراس من الخاطر
.. وتحسين بصعوبة بالتنفس .. ولأننا كنا واصلين بالليل ..
عدينا الليلة الأولى وراح اخوي الصبح مباشرة واحنا رقود خلانا
وراح حجز مكان ثاني ورجع خذنا لهناااك ..
قمت الصبح … واسمع صوت بقر ( الخوار )
قلت لأختي مب صوت بقر هذا ؟؟ قالت شو بيب البقر عند الفندق من صباح الله خير ..
ولما فتحت الدريشة لقيت سيارة البقرة في باركنات الفندق .. ويغردووون خخخ
بس بيني وبينكم مدري ليش حبيت المكااان الأول ..
بس الفندق الثاني كان يديد وتوه من اسبوع مخلص بنائه ..
يعني نظيف نظافة تامة .. واحنا افتتحنا الغرف
واول من يسكن فيه على ذمة صاحب الفندق ..
وشلنا قشنا وسرنا للفندق الثاني ..
فندق الهــنــــــــــــــــــــــــــــاء
نزل الشنط هو ويا العمال وما خلالنا ننزل ..
قال انتوا الحريم تعطلونا … خلونا نستغل الوقت ..
وركبنا السيارة وتوكلنا على الله ..
طبعا عندنا الجهاز هذا مرافقنا في كل مكان في الدولة وخارج الدولة ..
في حلة الضياع .. يحدد لنا الأتجاهات ونخزن فيه مكاننا علشان يحدد لنا
ويساعدنا في الره بعدين ..
وقال بيودينا لشاطئ المغسيل .. وكهف المرنيف ..
وهذي بعض الصور قبل الوصول للجهه المقصودة أعلاه ..
لاحظوا الكهووف …
وطبعا الطريج فيه عدد كبير من الحيوانات كالأبل والأبقار الأغنام … ولازم تكونون حذرين جدا جدا
..