كيف أحوالكم عساكم كلكم مرتاحين وبصحه وعافيه
بدخل في الموضوع على طوووووول
بنات ياريت تنصحوني وتحللون معاي مشكلتي مع ولدي الوحيد ..هي مشكله واحتاج بعد اقتراحاتكم وحلولكم القيمه من واقع خبراتكم كامهات وربات بيوت ..
احبائي انا عندي ولدي وعمره سنتين واربع شهور تتطوره اللغوي وايد اوكي..في البيت نشيط ويحب يلعب ويشاغب مثل كل الاطفال بس من فتره الاحظ انه اذا رحنا مكان فيه العاب واطفال ما يحب يشارك معاهم وممكن يلعب لوحده شو السبب؟؟ بصراحه انا ما اطلع وايد من البيت الا لبيت امي او والدة زوجي (عمتي) وهناك ما فيه اطفال في سنه يلعب معاهم اصغر واحد عمره ست سنوات هل هذا سبب ؟؟ انا ما اروح يمعات فيها يهال وصديقات الا فيما ندر.. في البيت انا انجزله كل شي يعني انا ابدل ملابسه انا ااكله انا العب معاه وما يحب حد غيري يسويله شي الا نادر اذا انا كنت بعيد عنه رايحه مستشفى او مب جدامه…احس صعب يتعود على الناس الي ما يشوفهم دايمن هل هذا طبيعي؟؟ وهل ياترى بيتغير ؟؟ وكييييييييف؟ ارجوكم ساعدوني اخاف ابني ايكون انطوائي وبديت فعلا افكر احمل عشان يكون فيه حد معاه فالبيت غيري؟!!
لا طنشوني 
انتظر ردودكم
اختكم حواء
من الوضع اللي شرحتيه شي طبيعي يكون الولد خجوول …
وبيتغير،، لا تخافين..
أنا ولدي ألحين عمره 4 سنين ونص..
كان نفس حالة ولدج،،
دووم لاصق بعباني..
ولو حد كلمه مستحييييييل ينسمع له صووت..
وااايد خجوول ..
بس متى تغير؟؟
يوم دخل الروضة..
تغير وااااااااااااااااااايد،، وصار يطلع يلعب ويا عيال الجيران..
ولو حد يا بيتنا حتى لو غريب يلعب ويسولف..
بس بتتعبين فالبداية..
لأني وايد عانيت يوم دخل الروضة.. وتعب نفسيا..
وصار عنده تبول لا إرادي ليل ونهار..
و (تبرز) لا إرادي فالليل !!!!!
واايد تعبني،، بس الحمدلله،، عالفصل الثاني حسيته تأقلم وتعود….
لا تخافين ولا تحاتين..
بس عشان ما تتعبين يوم بيدخل الروضة،، من ألحين عوديه يختلط باليهال،، يعني اتركيه عند عيال خواتج أو اخوانج وسيري عنه..
خليه عند أي حد موثوق ،، وابعدي عنه،، اطلعي،،
خليه يحس انه عادي يقعد فمكان بدونج…
وان شااء الله بيتغير….
مشكلة ولدج انتي حليها طلعية وووديه حدايق وخلية يختلط بالناس مب شرط يهال و ان شااء يوم عن يون بيتغير و بتشوفينا اجتماعي
الله يخليه لج
ان شالله أحاول أوديه بس ظروفي مب دايمن تسمح ما عليه بحاول كثر ما اقدر اوديه اي مكان فيه ناس حدايق ,,مولات ,,يمعات عائليه وربي ييسر وربي ايحفظ عيالكم
عندي ولد وبنت الله يحفظهم
ولدي عنده اخت متقاربين في السن ولكن يحب يلعب بروووحة دووووووم وعادي حتى اخواني يوم صغار جذااا
يحبون يلعبون روووحهم
بس انا شو سويت ما كان يتاقلم مع العيال وااايد
قمت اودي الالعاب المشتركة شرات اللي في فيستفال وااايد اتاقلم وقام يسولف ويا الصغارية ويلعب وياهم
بس ترى الموضوع عاااادي بس ودي كل مكان وياج دااام هو واااحد وخاصة اماكن فيها صغارية
