خواتي العزيزات ، حبيت أشارككم تجربتي الشخصية مع هالنادي الصحي ، واللي عرفت عنه من وحدة من صديقاتي ، واللي رشحتني حقهم فاتصلوا فيني وخبروني انهم بيعطوني (تصريح دخول مجاني ليوم واحد) عشان أشوف خدماتهم وأجربها خلال هاليوم ، وآخذ فكرة عن برامجهم وأشترك إذا بغيت. المهم أنا ما كنت مهتمة في البداية وحاولت ألوص منهم وأقوللهم اني مشغولة بس هم تموا يتصلون ويغيرون الموعد لين ما آخر شي اتفقنا على موعد وسرت لهم.
يوم سرت في اليوم المحدد رحبوا فيني أحلى ترحيب وراووني خدماتهم وأجهزتهم وبصراحة استانست عالمكان والخدمات، وعقبها يلست مع وحدة من المسؤولات الي بدت تشجعني عالتسجيل وتخبرني عن المزايا الكثيرة اللي بحصلها كعضوة. عاد أنا حزتها ما كنت مستعدة وقلتلها بفكر، جان اتقوللي ان العرض مؤقت وممكن يروح علي ولازم ما أفوته ومن هالكلام، قلتلها ما عليه بفكر. عاد هي تمت تصر وتغريني بالعرض وتشخط في ورقتها وأونها بتعطيني (تخفيض) إذا سجلت الحين، وسارت داخل وعقبها ردت بالورقة موقعة بالأحمر أونها (موافقة المديرة) عالتخفيض. المهم حزتها قلت في خاطري خل نجرب أكيد بنستفيد. ودفعت ألف وخمسمية رسوم تسجيل ووقعت على أوراق الموافقة على عقد التسجيل اللي يلزمني أدفع 399 درهم شهرياً رسوم العضوية.
المهم مر شهر وأنا ما سرت النادي ، بصراحة اتهايزت لأن المكان بعيد علي وبعدين كنت أتريا يفتحون فرعهم اليديد قريب بيتنا. وخلال هالشهر اكتشفت اني حامل، وطبعاً راجعت حساباتي وشفت اني لازم أأجل موضوع الصالة لي عقب الولادة. وسرت الصالة أطلب اني أكنسل العضوية وخبرتهم بالسبب، قالولي لازم أشوف المديرة قبل لا أكنسل وعطوني موعد عشان أقابلها.
ورحت النادي في الوقت المحدد، وشفت المديرة مشغولة مع بنتين مواطنات تكلمهم عن نفس الموضوع الي أنا ياية عشانه، وهو إلغاء العضوية. بصراحة كان أسلوبها جدا وقح مع البنتين حتى غمضوني صراحة لأنهن كانوا مؤدبات والمسؤولة (الوافدة) كانت تتكلم وياهم بكل وقاحة وتقول: انتوا ما قريتوا العقد قبل لا توقعون؟ ما يستوي تكنسلون مني والدرب. وإذا بتكنسلون لازم تدفعون مال 3 شهور سواء بتستخدمون الخدمات والا لا.. وعقبها زقرت وحدة من الفلبينيات الي يشتغلون عندها وخلتها تحسب المبلغ وقالت لهم لازم يدفعون الي عليهم ومن هالكلام. وخلصت من البنات ويت عندي. طبعا سلمت عليها وقلت لها اني ياية أكنسل عضويتي ، سألتني ليش وقلتلها لأني حامل. سألتني متي بتربين قلت لها شهر خمسة. قالت لي سوري نحن ما بنكسل لج، بس يستوي تجمدين العضوية طول فترة الحمل لين ما ترجعين وعقبها تكملين عادي (تجميد العضوية يعني العضوة ما تستخدم الصالة ولا الخدمات بس إجباري تدفع 20% من المبلغ الشهري). قلت لها ليش أدفع عن خدمة أنا ما أستخدمها ، قالت لي هاي القوانين انتي ما تعرفين انج ما تقدرين اتكنسلين ع كيفج، قلت لها بس أنا حامل وانتوا ما عندكم شي في العقد عن الحمل. قالت لي سوري بس لازم تدفعين ، قلت لها سوري ما بدفع والي بتسوونه سووه. عاد وأنا طالعة ومشططة زقرتني اخت مواطنة وسألتني عن سالفتي وخبرتها ، جان تقوللي ان هي بعد متوهقة وياهم عشان موضوع الإلغاء.
بنات أنا أعرف ان في خوات مستانسات من الصالة ودايما يسيرولها، بس بغيت أوضح أمور مهمة عن العضوية حق البنات الي يبون يشتركون عشان ما ينخدعون مثلي ويقرون العقد عدل قبل فوات الأوان. ترى معظم البنود (مجحفة في حق العضو) ولازم كل وحدة تفكر انها تشترك في الصالة تكون متأكدة من انها ما بتتضرر من الشروط قبل لا توقع العقد. وهذي بعض شروط وأحكام العضوية (واللي عددها 17 شرط !!):
1) رسوم الانضمام والرسوم الإدارية ورسوم العضوية غير مستردة في حالة الاستقالة أو الانهاء لأي سبب مهما كان.
2) يجب دفع الاشتراك الشهري في اليوم الأول من كل شهر من خلال ترتيبات الدفع بواسطة بطاقة الائتمان كما هو مشار بموجب توقيعك على نموذج طلب العضوية. إن الإخفاق في استخدام مرافق النادي أو عدم استخدامها لا يلغي الالتزام بدفع جميع رسوم العضوية في الوقت المحدد.
3) يجوز للأعضاء "تجميد" عضويتهم بواسطة الاستمرار في دفع رسوم تجميد تبلغ 20% من الرسوم الشهرية. ويجب على العضو إعطاء إخطار خطي لا تقل مدته عن شهر واحد إلى النادي قبل اليوم الاول من الشهر الذي يتم فيه التجميد ويجب ألا تقل فترة التجميد عن 3 شهور ولا تزيد عن 12 شهرا، ولا يجوز استخدامها فيما يتعلق بمدة الإخطار الخاصة بإلغاء العضوية. ولا يجوز للأعضاء استخدام النادي خلال هذه الفترة وسيطلب من الأعضاء تسليم بطاقات العضوية إلى النادي خلال فترة التجميد.
4) لا يمكن للأعضاء إنهاء العضوية خلال أول 12 شهراً للعضوية. وبالنسبة لأعضاء بريمير فلا يجوز إنهاؤها خلال أول 3 شهور للعضوية
5) لا تتحمل ليجر أنليميتد المسؤولية عن أية خسائر أو أضرار تلحق بممتلكات الأعضاء أو ضيوفهم أو عن حالات الوفاة أو الإصابة التي قد تحدث أثناء وجودهم في مقر النادي. ويوافق الأعضاء وضيوفهم على عدم تقديم أي مطالبات ضد الشركة أو أنليميتد أو الإدارة أو الموظفين لأي سبب مهما كان.
خواتي العزيزات، يشهد الله اني ما أقصد من موضوعي هذا التشهير بالنادي أو الانتقام، ولكني حبيت اني أوجه رسالة تحذيرية وأوضح صورة ممكن ما تكون واضحة بالنسبة للكثير من الخوات. والله من وراء القصد.
لكن صدق قهرتني ،،
وزين يوم نبهتي البنات
هاي لو في امريكا وجي ترمس جان رفعوا عليها قضيه وسولهاا سالفه ..
مب هني ماكلينا حقنا ونسكت عنهم !!!!
جان قلتليها ماشي قانون ف الدوله يقول مايستوي تردين البيزات !! على كيفها تسن قوانيين الا Fitness Center !!
وها غير انهم يخلون المسؤوليه لو استوابج اي شي !!!!
مستحيل اسير نادي شرات هذا !
نادي السيدات واايد ارقى من ناحية التعامل
والله يعييينج ،،
بس اهم شي انج تعلمتي اختي من هالتجربه واشكرج انج وضحتي للبنات
بس عندي استفسار هم بس اعتمادهم ع الاجهزه والا فيه كلاسات ايروبكس وهالسوالف ..!
لأنه اذا فيه عادي تقدرين تسيرين تحضرين الكلاسات .. بس حركتج اتكون خفيفه ماتناقزين
انا اروح لنادي وكانت بنيه ويانا ماشاء الله عليها كرشتها بين عيونها واطامر ويانا هههه
