ميونخ واحلي الاماكن الطبيعيه القريبه منها

يعتمد على تاريخ رحلتكم ، لان في الشتا معظم البحيرات تكون متجمده و الزحلاقية الصيفية ما يشغلونها ( اللي ذكرتها في تقريري )

عموماً انا أفضل التمشية في المدن فالشتا و الشوبينغ و يلسات الكافيهات و الملاهي و القصور لان الطبيعة تكون كلها بياض من الثلج و بررد مووت يعني ما تشوفين شي

بس على كل حال انا بعطيج اسماء المناطق اللي اعرفها و ان شاء الله تستانسين ^_^

1- جولة في بحيرة تيجرنسي مع قريتها ( حلاتها في الصيف لانها في الشتا متجمده )

2- بحيرة شلرسي ( شي قريب منها منتجع يجنن و فيه تلفريك و مطعم فوق اليبل و ألعاب حق اليهال و زحلاقية صيفية و مطل على مناظر طبيعية ترد الروح ) .. يسمونها بيس اوف برادايس يعني قطعة من الجنة ^_*

3- بحيرة كيمسي ( على الدرب و انتي سايره سالزبورغ .. وايد كبيرة و فيها قوارب شراعية )

4- قرية قارمش + التلفريك و القمة الثلجية (ما تنفع في الشتا) + بحيرة آيبسي > كلهم في منطقة وحده

5- مدينة سالزبورغ النمساوية ( تبعد ساعة و نص عن ميونخ بالسيارة ) .. واايد حلوة حق التمشية و الشوبينغ و فيها حدايق متنوعة و قلعة فوق اليبل و جولة بالحنطور ، يعني ستايلها كلاسيكي و رومنسية على ذوقي

6- حديقة اوروبا بارك ( أكبر حديقة ملاهي في اوروبا ) .. تبعد عن ميونخ من 3 ساعات و نص إلى 4 ساعات بالسيارة .. الحديقة روووووعه خباااال تجنن و عيبتني أكثر عن ديزني لاند ، يعني نصيحه لا تفوتينها و تستاهل المشوار

7- حديقة ليغو لاند Lego Lang .. حلوة حق الصغار بس مافيها وايد وايد العاب حق الكبار ، الحلو فيها ان كلها مجسمات بالليغو عن كل مدن العالم و تصميمها مميز و ممتعة حق الصغار ، نحن بعد استانسا فيها لكن أسعارها غالية حبيتن

8- شوفي البروشورات السياحية ( عندهم كتيبات بالعربي )،بتحصلين فيها وايد قصور و أماكن حلوة مع عناوينها.. اختاري اللي يعيبج و زوريها و استكشفي