نداء اغاثة للعضوات – الشيف بس

السلام عليكم

اولا: كل عام وانتو بخير.. مبروك عليكم شهر رمضان المبارك.. الله يبلغنا اياه ويتقبل صيام وصلاة جميع المسلمين ويغفر لنا ويرحمنا دنيا واخرة.. قولوا امين

ثانيا: من فترة وانا داقة في راسي اسوي خبز خمير..(ناقع العرق الوطني..لول)
وبما انها تجربتي الاولى.. دخلت النت وسويت بحث من عدة مدونة ودورت افضل الطرق وشمرت عن ســــاعدي… وركضت للمطبخ

وقبلها سرت اشتريت ماكينة الخبز

وقلت.. بس..اليوم بخلي اللي في البيت يتخبلون

وحطيت المقادير اللي هي:
فنجان سكر
فنجان زيت
ملعقة طعام خميرة
ربع ماعقة طعام بيكنج بودر
4 ملاعق حليب نيدو
ما دافي للعجن

ويالله يالزووز اعجني ورويهم العجب..
وعجنت وعجنت لين طلعت لي عضلات.. اظن حرقت الف سعرة حرارية لول

وخليت العجينة تتخمر يمكن 4 ساعات
ورديت وكانت العجينة متخمرة وشكلها جنان..

قلت لاااااااااا هذي هي العجينة اللي بسكت فيها كل الطباخات.. لول

وفردت العجينة ومسحت على الوجه بالزيت والسمسم وحطيتها في الماكينة او جدر الخمير بس ما انتفخت الخبزة!!!

وجربت في الخبزة الثانية.. بعد احترقت وما انتفخت.. والثالثة والرابعة..
المهم كل الخمير ما استوى معاي..وطعمه كان مر

جان اعصب وارد اعجن بس هالمرة قللت الخميرة وماحطيت بيكنج بودر وخليتها تخمر ساعة ونص

ونفس الحالة..ما انتفخت.. طلعت كانها بان كيك محروق مثل ما انتو شايفين بالصورة (لا تضحكون علي..اي ويهي)

[IMG][/IMG]

الحين ابا اعرف وين الغلط وليش ما انتفخت الخبزة؟

وهل ممكن اي وحدة من الشيفات.. تسوي الخمير بالصورة المفصلة.. خصوصا المقادير..

وشو هي الجيلة؟.. هل هي علبة السميد؟
هل الجيلة وزنها 500 جرام؟

وبــــــارك الله فيكن جميعا

ملاحظة: ارجو من الاخوات الكريمات..اللي ماتعرف او ماعندها الطريقة.. لا تحط كلمة للرفع او up او تقول البنات بيساعدونج او انا ما اعرف اطبخ..او من هذي التعليقات..الخ

اهلا اختي الزووز عندي مقادير خبز الخمير والمقادير مظبوطه جداً لني اسويها دائماً والله يوفقش ويظبط عندش واذا ظبط خبريني وادعيلي الله يشفي مرضاي
المقادير:
كوبين طحين رقم 1 (مقاس الكوب الجبن الي بسبع دراهم تقريبن كان)
نصف كوب حليب بودر
ربع ملعقه صغيره خميره
ربع ملعقه صغيره بيكنج بودر
ملعقتين اكل سكر
ذرة ملح
ملعقتين اكل زيت
الطريقه:
تعجن المقادير مع بعض ما عدا الزيت جيدا وما تكون قاسيه جدا ثم تضعين الزيت وتعجنينها مره ثانيه وتتركينها اقل شي 3 ساعات بعد اول ساعه تعجنينها مره ثانيه وتقطعينها دواير وتحطين تحتها شوي طحين عشان ما تلتصق في الصحن والكميه تسوي 8 خبز وبعد التخمير تفردين العجين باليد وتدهن بالبيض وترش بالسمسم وتحطينها على القدر من فوق حتى تتحمرمن تحت و بعدين ادخلينها في القدر الجه الى فيها السمسم من فوق وتراها تتحمر بسرعه راغبيها واسفه لني طولت عليش تراني احب التفاصيل……وبالتوفيق

جي الطريقه تخلينها قطع لين تتخمر يمكن ماي مب دافي وايد

قبل كل شي اخلطي ماي الداااااااااافي واخميره والبكنج باودر والشكر ويا بعض يخليها تتخمر عدل جي عقب حطيها للمواد الناشفه

دوم بكل عجينه تسوينها اخلطي المواد اللي فوق ويا بعض عقب حطيها ع الطحين والحليب و الملح

ترا اخر شي الزيت وتمي اعجني من خاطر كثر عجن تخلي اكل زين

وادهنيها ببيض مخلوط يا بخل او فانيلا عن الريحه وسمسم جان تبين او حبه البركه

وشوفي حراره يمكن وايد عاليه لازم تكون زينه لان كثر الحراره تخليه صخر مايتاكل

وشوفي قسم امعجنات الاخت ورده دبي احيدها حاطه الطريقه

وخبرينا بالنتيجه

كيف تتحمر من فوق الجدر وكيف اندخلها في الجدر؟

بارك الله فيج.. حتى لو ما ضبطت معاي.. بعد بدعي لج
الله يشفيج ويشفي جميع المرضى يرزق الجميع الصحة والعافية..
والله يسر امورج ويسعدج ويحقق مرادج.. امــــين

بجرب وبخبرج كيف صارت.. (يارب تضبط)
انتي تقصدين جبن الجلاسات.. اللي هو كرافت صح؟

لوول.. في حد فشل غيري.. مب بس انا.. لول

شخبارج؟

شكرا حبوبة.. بجرب واذا ما ضبطت.. بحرق المطبخ وبطلع.. لول