يبغي يتزوج الرابعة !!!

من كم يوم خواتي , واحد من المشايخ اللي اعرفهم , ومن امارتي , طلب مني ادور له عروس رابعة , ويبغيها بنت , وهو متزوج من 3 حريم وكل وحده في بيتها هي وعيالها , والحين يبغي يتزوج الرابعة , وخصوصا من هل دبي , وقال لي ابغي لبنانية او اردنية او اي جنسية , لان المواطنات يكابرن و يتشرطن حتى لو عنسن , ما يرضن يتزوجن متزوج , وهو تقريبا في بداية الخمسين وعنده احفاد !!!!! وقلت له المواطنه وبنت البلاد اولى من الغريبة اللي ما تبغي الا الجواز والجنسية , وعقب بتخليك اتولي انت وعيالك . .. هالريال شكلة مصر يتزوج سواء دورت له زوجة والا لا !!
وانا طبعا ما يخصني ادور له وحده من برع بلادي , لان بنات بلادي اولى في الزواج من اماراتي في نظري , وعلى قولة ريلي ( هالشيخ مستوي الحاج متولي ) لازم ياخذ 4 حريم , ولو الشرع ما حلل اربع جان اتزوج فوق ال10 . ماشالله علية
الحين اللي ابا اعرفة ليش البنت يوم توصل اواخر الثلاثين والا الاربعين اتكابر وما ترضى تتزوج المتزوج ؟؟
ليش تتشرط في الزواج ابا عرس وابا فستان وابا وابا ؟ وما تكتفي بحفلة بسيطة ؟؟
ارضي بالقليل واقنعي بما قدر الله لج من رزق , افضل من انج اتمين طول عمرج بلا زوج واطفال .
الوالد والوالده ما بيدومون لج , والوظيفة خيرتج بتتقاعدين منها , وبتظلين متلتهة في بيوت اخوانج من بيت لبيت ؟؟؟ اشكثر اخوانج بيستحملونج عندهم ؟؟
ارضي بالزواج و لو كان من مطلق او ارمل او متزوج , وخففي عالريال عسب يتم الزواج هذا على خير .
احسن من انج تحملين لقب عانس طول عمرج .
طبعا هذا رايي . انتوا شو رايكم ؟؟؟

حسبي الله ونعم الوكيل
المره مظلومه غالباً فالمجتمع حتى من أصحاب المشايخ! استغلال في استغلال في استغلال!
أحس محد فاهم الدين صح!

طرحتي موضوعين في واحد

وما فهمت الوجهة الي تبغينا نتكلم عنها

هل هي القناعـة بالمتزوج ,, أم التعدد أم الزوجات الـ 3 أم كيف شيخ اصلا لجأ لج انتي عسب تخطبين له

الموضوع بالنسبـة لي متشابك وما بقدر أرد عليه

غير ان نحن مب مسؤولين نحاسب هذا الريال

يبغى يتزوج وحدة أو 4 هذي حياته وهو المحاسب عليها

وبرايـه لو ركزنــأ على أنفسنا وتصحيح أخطائنا بنسوي في العالم خير ^^

وما يستو أختي تتكلمين عنه بالسوء بدون علمه خاصة انه ما طلب منج شي حرام !

وما يستوي تقارنينه بمسلسل أختي فيه من المحرمات الشيء الكثير

كل هالأشياء في ذمتج وبتتحاسبين عليها فانتبهي لكلامج

وهو ندعي له بالهدايـة والله يصبر حريمـه ويرزقهم طولـة البال ..

وما أحيد الي رضت انه يتزوج عليها ثنتين بتنزعج من الـ 3 ^^!

يمكن هو مرتب أموره ليش الإعتراض ! ؟

وببالنسبـة للخوات الي مايرضن بريال متعرس

الله أختي ما غصب حد على الزواج

والحمدلله ديننا عدل ومعروف ان الحرمـة ما تتزوج بغير رضاهــأ

يمكن هي نفسيتها وشخصيتها ما تتقبل المشاركـة ؟

يمكن هي جي أحلامها جي تبغى عرس ألف ليلــة وليلـة برايها ^^

الريال بدينه وخلقه نعــم لكن حتى المرأة مخيرة في الزواج مانقدر نغصب حد على شي ..

ولا نعاتبـه عليه الله ما حرم رفض المعدد فما لنا حق نحن نلومهن

كل شخص ومستوى تفكيره

في ناس تحب الماديات ( للأســـف وأكيد بيتحاسبن على هذا الشي ..)

في حريم يحبن الأحلام الوردية !

وفي خوات يفضلن الستر باي حال

الناس أجناس

وبالأخير ربي يوفقج أختي

اللهم علّمنا ما ينفعنا وانفعنا بِمَا علّمتنا وزدنا علْمًا يا رب العالمين

ليش ياختي يحق لها تفرح وتستانس حالها حال غيرها ،، العمر مب معناته خلاص نهاية العالم !
ياما حريم في كل دول العالم تصك الستين وتسوي عرس لا صار ولا استوى ،، شوه ذنب هالمسكينه
وخير وصلت لـ الثلاثين – الأربيعني إلـخ ،،،
صبرت كل هالسنين ومستكثرين عليها الفرحه !!!

الصراحه استغلال ضعفها واستغلال نظرة المجتمع لها عسب تقبل بالقليل لمجرد أنها زايده بالعمر وشوه هو العمر مجرد رقم لا يودي ولا اييب ،، الإنسان بروحه وبقلبه وبعاطفته وبمكنون جوهره هو اللي يحدد قيمته ،،،

سواء شيخ أو رجل عادي ،، الإنسان اللي يتسغل حاجة ضعيف وفرحته ليرضي رغبة في داخلة على حساب سعادة شخص ثاني ما يستحقة ،، والبنت مهما وصلت من عمر يحق لها تفرح وتفرح أهلها بعرس !

اسمحيلي أقولج ، للأسف في رجال الدين البعض منهم يخزي الدين !

وبنت عمي مطلقة وعرست مره ثانيه وسوت عرس ولا أحلى وفرحت بنفسها وفرحتنا معاها ،، واللي شاري قلب حرمه بيفرح فيها ولو ماخذ عشر قبلها ،، بس اللي في خاطره خليلة على شكل زوجة طبعا ما يبا الدق والحفلة !

صدمني ها الشيخ
بصراحة صدق الحاج متولي
بلاهم بنات البلاد على الاقل متربيات و نظاف و ريحتهم كلها عود وبخور ويحترمن الريال

ها الشيخ يباله شيخ ينصحىه

انا مب معترضة على زواجة , واعرف ان هو عادل بين زوجاته , لان ساكن قريب منا .
ومن حقة يتزوج الرابعة دام هو مقتدر بكيفة , لكن من جنسيتة مب من جنسية ثانية , يعني الثلاث حريم اللي عنده كلهن اماراتيات , ليش الرابعة غير ؟؟؟
وهو قال يبغي بنت من دبي , واعترف انه ما بيحصل اماراتية بتوافق عليه كونه متزوج من 3 حريم , وكلهن على ذمته , عسب جي قالي دوري لي من جنسية ثانية , المهم اخذ الرابعة
وزوجاته ما عندهن مانع بزواجة دام ان حقوقهن توصلهن كاملة .
انا اللي اقصده في موضوعي ليش البنت الاماراتية اذا كبرت في السن , ومحد تقدم لها تعترض على الزواج من المتزوج ؟؟

لا حول ولا قوة الا بالله