السلام عليكم ورحمة الله وبركاته
اولا حابه اشكر ربيعتي للأنها سمحتلي استعير نكها.
بدش بالموضوع على طول
بليز اذا انا غلطانه علموني
بنات اولا انا كنت اشتغل صيفي في الكورنيش وانا ساكنه في الشامخه.
المهم دوامي يبدا 7 واخلص 3 وانا كنت متحمسه وايد وايد
كانت عندي مشكله في المواصلات وحليتها. تعاملت ويا تكسي باكستاني على اساس انه الصبح يوصلني ايني الساعه 6 وربع الصبح عشان اوصل الكورنيش 7 بالضبط والظهر ارد ؤيا الوالد.
المهم داومت اسبوع ووقفت توني اليوم وقفت لأني ماحسيت براحه من ناحية التاكسي. يعني كله يسأل
يسولف
يشغل اغاني
وغير جيه دوم يطالع من المنظره الي جدام
يعني صح لازم يطالع المرايا الي فوق بس يبين ان نظراته علي
واسألته وايده وايده وانا ابين له اني مضايقه من زود الاسئله حتى احيان اطنشه اوني ما سمعته
ثانيا احس مالي لزمه في الدوام
المسؤوله علي هنديه ولازم تعلمني الشغل واساعدها لكن هي مول ماتعلمني الا كم من شيء اشيا بسيطه جدا وما تخليني اسوي شيء الا نادرا ارد على التليفونات يعني احس اني ولا شيء مول ما اسوي شيء كله يالسه على الكرسي لا اتكلم ولا اسولف ولا اي شيء كأني زينه
هي عندها شغل واتروم تعطيني لكنها ما تعطيني اقولها خليني اساعدج اتقول لا ما يحتاي وايلس ثماني ساعات وانا لا شغله ولا مشغله ومحد مواطنات في قسمي وهاي. الهنديه كله اتسولف بالهندي ويا ربيعتها وانا ولا اسوي ولا شيء. كلهم مشغولين الا انا يالسه ماعرف شو اسوي. والله ادمع احس ان مالي قيمه. انا اشتغلت عشان ابي اتعلم ابي اسوي شيء مب زينه في القسم. اكون مخنوقه في القسم واحس من نظرات الهنديه (كأنها اتقولي مالج لزمه عندنا).
بصراحه وايد مخنوقه وبسبت هالشيئين انا طلبت منهم اوقف السمر ترينينغ وبدون ما اشاور احد.
ورديت البيت بدري.
خبرت امي وقلتلها امي وايد زعلت علي وقالت ليش وقفتي. قلتلها ما احس براحه من ناحية هالسواق دوم يشلني من الطرق البعيده وايد وانا في الشامخه واتعرفون كيف الطرق هنأك هاديه واتخوف.
قالت بسبج بسج اونج عاد. وسمعتني رمسه تقهر. اصلن انتي فاشله وبنشوف اذا بتكملين دراستج ووايد اشيا. وانتي مب ويه دراسه وانتي مب ويه شغل. على شو هذا كله؟ يعني ما تخاف علي اظهر بروحي ويا باكستاني. ؟ قالتلي ليش مب من البدايه ماقلتلي ان هالباكستاني يخوف. قلتلها اول يومين محترم وبعدين بدا ايني من طرق طويله ويسأل ويغني ومدري شو. قالت ابوج بيوصلج الصبح. قلتلها ابويه ما بينش ساعه 6 ومب حلوه كل يوم في الدوام اتأخر. وللحين مول مب معطتني ويه ولا اترمسني. وتوني كنت في الجمعيه اسأل اذا يبون شيء للبيت قالت ما نبي شيء وبعدين وانا مستانسه قلتلها انا الي سقت السياره( تراني ادرب عشان اخذ ليسن) قالتلي مبروك بنشوفج باجر يا فاشله وبندت بويهي!!
والله صدمتني اول مره امي جي! معقوله لهدرجه همها البيزات؟ نحن حالنا مستور والحمدلله ولكن اهلنا وقوبنا يلبسون ويكشخون احسن عنا فأمي تبا ان نصير شراتهم يعني اكيد امي من محبتها لنا ما تبانا اقل من اهلها. بس بعد سمعتي ونفسي اهم من كل شيء. ونحن مو محتاين لدرجة ان بنموت من اليوع.
للحين ماترمسني عدل وقالبه ويهها علي
والله مقهوره واصيح. اقولها اتخيلي لو سوا فيني شيء التاكسي شو بتنفعج البيزات ولا لبسنا. تصد عني وتتأفف
وايد مقهوره
لهدرجه ما اهمها ولا سمعتي تهمها
على فكره لما الصبح انزل للدوام الكل يستغرب مني. كيف بنيه صغيره تركب تاكسي. انا عمري صغير وشكلي صغير فالكل يستغرب في الشارع لما يشوفوني
اختنقت صراحه مارمت.
هل انا غلطانه؟ وكيف بقدر اراضي امي؟
المشاركة الأصلية كتبت بواسطة سيدة كوول 
