عندي ربيعة لها فترة متغيرة هي انسانة ماعليها رمسة ولكن عندها قلق من ناحية المستقبل تفكر باهلها وايد وتفكر بنفسها بعد
اشتغلت من يوم كانت صغيرة ولها سنين وكبرت ما شا الله الحينه ربيعتي تفكر تترك وظيفتها لانها تعبت لكن تفكر بخواتها وما شا الله هن وايد وامها لانهم اعتمدوا عليها بالمصرف تعرفون لبس البنات كيف والدلع وحتى مرات يوم يسوون رحلات مطعم او شي عليها هي الحينه الي متعبها انها تبي وظيفة ثانية يكون بملغ اكبر طبعا ربيعتي مب مواطنة عمانية قلت لها استقيلي وفكي عمرج بس ماتقدر لانه تفكر بامها وخواتها وعندها ماشا الله اخوان يشتغلون بس تعرفون يعطونهم مصروف مايقصرون بس مب الي يسد حسب ظروفهم والاب مايقصر بس هم بعد على قده حتى مسألة الزواج ماتبي تعرس تفكر فيهم لانها من يوم وهي صغيرة تشتغل وتكد
ربيعتي تقول الحينه الغيرة دشت قلبي واحس اني بديت احسد انه البنات عرسن وهن صغار لا مسؤولية ولا كراف حياتهم حلوة وعندهم عيال لكن انا ولدت وانا اكرف ابي يكون عندي فلوس اشتري بيت لهلي وما اخلي خواتي وامي محتاجين
حسيت من رمستها انها تعبت من المسؤولية وتبي تشوف حياتها بس ماتقدر لانها تحب هلها وايد وتفكر من بيسوي لامها ولخواتها تعرفون الرياييل مصروف وحدهم لكن سوالف الحريم من عزايم ومجاملات ومطاعم على حسب بعض الرياييل بالحسرة او ينسى خواته وامه ويظهر مرته
للعلم : ظروفهم كانت تعبانة جدا جدا بيتهم الله يعلم كيف كان طبعا اجار لكن بعد ماهي اشتغلت الحمدلله قامت تلبس احسن لبس هي وخواتها وامها وحتى بيتهم انتقلوا ماشا الله لبيت احسن بوايد من بيتهم الاولي بس شكلها تعبت من المسؤولية
هل هي خطبها واحد ورفضته وعشان جي متحسره؟؟!!
اذا هي فيحقلها تزعل وتتحامق وتفكر
لكن اذا لا
عيل على شو تستبق الاحداث ؟؟!!!
يمكن لين حزتها ربي يكرمهم من حيث لا يحتسبوا
ويمكن يرزقها بانسان مقتدر يعيشها ويعيش اهلها حياة كريمة
ويمكن
ويمكن
ويمكن
عيل شو بتقول لو هي ام وعندها عيال واشتغلت شرات وايد حريم عسب تساعد ريلها
وودها تيلس بالبيت اليوم قبل باجر
عسب تتفرغ لعيالها ولبيتها وعمرها
على الاقل الحين هي متفرغة لنفسها
لازم ربيعتج تحمد ربها على فرصة الشغل اللي حصلتها
واللي الف غيرها يتمنوها
واللي يوم تستقيل من شغلها مليون وحده وواحد بيتراكضون على مكانها
ولازم تكون فخورة بالمستوى المادي اللي اهلها الحين وصلوله بسبة رب العالمين وثم بسبتها وجهدها وتعبها
ويكفي ان عندها ام راضية عليها وتدعيلها
واللي مراضي اهله وبارنهم
لازم يكون على يقين ان رب العالمين بيكتبلة احسن مما سوا وعمل لاهله
هاي الفئة المضحية اعرفها
انا اعرف وحده نفس الموضوع
ابوها توفى وهي في الثانوية العامة وعندها خوان تقريبا ثلاثة وخوات بعد وامها
هي تحملت المسؤولية واشتغلت اشغال بسيطه في البداية لان ماعندها شهادة جامعية على قولتهم
من مدرسة الى مربية الى اشياء كثيرة
بالاخير بالمساعدات درست في الجامعة واشتغلت وجي ودرست خواتها بس اخوانها الشباب مايعتمد عليهم يعني كل واحد يشتغل بالحظ
في الاخير شكلها هي كانت مكتئبة وجي وماهتمت بعمرها لا بجسم ولا بشعر ولا بشي بس تراكض عشان لقمة العيش لييييييييين ماخربت بنفسها والحين هي بمنتصف الثلاثين
والحين هي اي شي يحتاجنه خواتها رغم انهن فوق 24 سنه هي تسوية لهن ولا وحده تدور شغل ولا وحده تريد تعتمد على نفسها بس اختهن الكبيرة وبس
والام عوده وقلنا ماتقدر على الشغل
والمصيبة الحين هي حاقده على اهلها وتقول بعاقبكم ومابعطيكم مصروف وانتوا دمرتوا حياتي
وهي البنت مافيها شي بس العناية بالنفس يعني محتاجة تخصص فلوس من راتبها عشان تعتني بنفسها وجي
بس هي كل الراتب يروح على البيت
فصارت تصارخ حتى على امها وتلومها
!!!!!!!!
رغم ان صراخها على الفاضي لان مافي حد اتقدم لها حقيقي وجي بس تظن انها لو عاشت فترة الشباب وكان عندها دخلها كانت سوت الي تباه وتزوجت
رغم انه مب ضروري يعني في بنات وكشخة وكل شي بس ماتزوجن للحين
بس المشكلة ان الناس الي متحملين مسؤولية من هم صغار وجي يوم يكبرون يحطون اللوم على حد
يعني يعتبرون انهم ضحيه رغم انهم مب ضحية بالمعنى الحقيقي بس هم يشتغلون مثل غيرهم من الناس حتى الغني يشتغل ويفكر بحياته ومستقبله! ولكن هم مب متحملين
لانهم ماعاشوا حياتهم رغم انهم تقريبا احسن من غيرهم وايد بس هم يحسون انهم مب طبيعين خاصة لو مالقوا حد يساعدهم بالاخير
خاصة لو كانت بنت تظن ان اي تاخر في حياتها هو بسبب المسؤولية وجي لانها تحس نفسها مثل ريال
فماشي بيغيرها الا اذا امنت بالواقع مالتها وتوكلت على الله
مثلا قصة ربيعتي صح تحملت مسؤولية وجي بس مشاكلها مب من تحمل المسؤولية ولكن سوت اسقاط على الاهل صح امها كانت مفروض تساعدها لو بشي بسيط بس في الاخير المشكلة مب كلها من الاهل لانها كبرت وتعلمت وشافت الدنيا كيف هي ماتحملت مسؤولية نفسها
بس هي نفسيات
فلا تتحسر وتندم
ممكن تتحسر إذا يتها الفرصة كذا مرة ورفضتها
وان شاءالله رب العالمين بعوض تعبها وبيي يوم وترتاح فيه
ولاني كنت سبب في سعادة ابوي الله يرحمه قبل لايموت
بس احيان اقول لو جاني نصيبي ماراح اقدر لانه علي قروض تجاوزت المليون ريال
ومع هذا بعض اخواني وخواتي مو مقدرين هالشي
السيارة حقتي كل فترة يصدموها وغير مخالفات تجاوز السرعة على راسي
والسبب ان السيارة باسمي وعندنا ممنوع السواقة للحريم
واخواتي هم 3 تخرجوا ماجاتهم وظايف للحين وانا اطلع من الصبح للعصر
وارجع البيت القاهم كل وحدة مسكت شغلة وتركوا شغلة لي لين ارجع من الدوام
ويوم امي تتكلم يقولوا اليوم دورها مو شغلنا وامي المسكينة تسوي شغلي
هذا جزاتي اني اقترضت وورطت عمري علشان يعيشوا ببيت عدل ويركبو سيارة عدلة
ثلثين راتبي في القروض وثلث للمقاضي ولي
الله يأجرني ويعوضني
المشاركة الأصلية كتبت بواسطة الياسيه20 
