الوسم: الشاور

مرحبا بكل وحده نورت موضوعي طبعا احب ادخل دايركت في الموضوع بدون مقدمات طويله

هذي طريقتي في الشاور اليومية والحمد لله مرتاحه عليها وايد نظافه ونعومه وسريعه ما تاخذ وقت

بشرة جسمج تحسين فيها جفاف عدم توحد خشونه ذبول بهالطريقة بترتاحين وهي يوميه وسريعه للسريعـــات والمشغولات وما عندهم وقت مثلي حاليا

اول خطوة تدخلين الحمام تقولين ( اللهم اني اعوذ بك من الخبث والخبائث )

تدخلين تحت الشاور الدافي دقايق لين يدفى الجسم وتتفتح المسام

بندي الشاور (حرام الاسراف )

وخذي بايدج من الصابونة المغربيه وادهني كامل جسمج مع الفرك على الجسم بالايد عشان الصابون يتغلغل داخل الجلد

تاخذين ليفتج الي تحبينها وتعز على قلبج وتبللينها بماي ( خليها تشبع ماي ) عشان تسهل عليج الفرك
وتبدين فرك من تحت لين فوق باتجاه القلب وهذا بروحه ينشط الدورة الدمويه ويشل الجلد الميت وينظف الجلد ويزيل السموم
خطوة وايد مهمه طبعا تفركين جسمج زين ما زين وركزي على المناطق مثل الخلفيه طول وياها في الفرك والفخوذ من ورا لان هالمنطقه يطلع الشعر تحت الجلد
وبين الفخوذ والركب والكوع والايد والريل > ما خليت شي

ومن وجهة نظري هذي احلى ليفة للجسم

من بودي شوب

او تاخذين الليفة الطبيعيه من عند العطار حلوة للاستخدام اليومي وصدق تنظف بضمير وسمحولي ما حصلت لها صور

بعد الفرك المستمر تاخذين سكراب للجسم وتدهنيه فيه كل الاماكن الي انتي مب راضيه عنها لا بالنعومه وتحسين انها اسمر عن جسمج

انا عن نفسي احط السكراب على ايدي كامله وبين الفخوذ والخلفيه والمنطقه الحساسه والركب والرقبه

تبدين تفركين بشكل لطيف وطبعا السكراب بتحصلينه في الجمعيات ماركة ستيفز ولا اي ماركه تحصلينها في الجمعيه وبسعر حلو

او الي عندها مقشر الجسم من بودي شوب بعد حلو لانه بالفعل استخدامه لطيف ومريح
وفيه طرق لصنع سكراب للجسم من النت باغراض طبيعيه مكونه من كريمات وزيوت وكركم وسكر وهذي طبعا رقم واحد بالنسبة لي لانها طبيعيه وفايدتها احلى

الحين تغسلين جسمج كامل وتنظيفينه عدل بالماي وتاخذين صابونتج الحلوة الي ريحتها تجنن وتفركين جسمج كامل وتغسلين بالماي ويفضل يكون ابرد عن الي استخدتيه في النهايه
الي حابه تضاعف النتيجه تستخدم صابونات مبيضه مثل البابايا او الكركم او الكبريت ( كلها للتنظيف العميق والتقشير والتفتيح )

والي حابه الترطيب المضاعف تستخدم صابونة دوف

والي حابه ريحة حلوة ممكن تستخدم لوكس وصدق هالصابونة لها ريحة منعشه وريحة نظافه

والي بشرتها حساسه وايد تستخدم صابونة جونسون للاطفال

اخر خطوة والاهم بعد التنشيف بالفوطه او الروب

تستخدمين هذا الكريم المرطب زبدة الكاكاو من فازلين من تجربة جدا رائــــــــــــــــــع وممتاز من اول مرة بتحسين بالنتيجه نعومه

انا عن نفسي ادهن فيه جسمي كامل واتريا ينشف ثواني ما بيبطي عليج وبعدين وزعي على جسمج كامل ببودرة الجسم لانها تساعد على امتصاص الرطوبه

اذا تبين بودرة سعرها حلو خذيها من الجمعيه

واذا ريحة واو انصحج من باريس غاليري

وفيه بودرة الدهن عود من اجمل بعد حلوه

وبودرة جونسون لرائحة مثل الاطفال ولكن عيبها انها تروح الريحة بسرعه

افضل بودرة من نظري هي بودرة انشانتر من الجمعيه ولها روايح وايد ( حاولت انزل لها صورة ) ما ضبطت

وريحتها تثبت وايد وتعطيج ريحة حلوة لطيفه وناعمه جربوها وما بتندمون

اخيرا

صدقوني اذا تعودتي على الخطوات بالسبوح بتصير عندج عادة يوميه وبالفعل العيوب الي بالجسم بتخف تدريجيا وجسمج بيصير واضح عليه النظافه والنظاره وبيشع من يديد بخطوات بسيطه جدا ويوميه لان صدق الشاور وايد يلعب دور في لون الجلد ونظارته

اتمنى انكم استفدتو من موضوعي الي هدفي الاول والاخير انكم تستفيدون منه

ادعولي ربي يسهل ولادتي

ويشرفني الردود الطيبه منكم يا بنات منتداي الغاليات