الجزء الأول
تذكرت لما ظهرت نتيجتي في الثانوية العامة ،طرت من الفرحة، نسبتي كانت 98 % قسم علمي ، الحمد الله رب العالمين ، اول شي سويته اني قدمت اوراقي عسب اكمل دراستي برى
البلاد ،كان ف خاطري ادرس طب اسنان، و ارجع دكتوووورة اعالج الناس و اعالج اخوي الصغيرون اول شي لان دوم ضرووسه مسوسة .
لقيت معارضة من اعمامي بس طنشت قلت اهم شي ابوي وامي راضيين علي و اخواني راضيين علي ، وخلاص ما يهمني شي ثاني، قدمت ع التوفل و امتحنت و نجحت و قبلووووني بسير كندا خلاص بودع اهلي و ربعي ، سرت المطار ما لقيت غير دموع من الوالدة اللي ما خلت نصيحة ما نصحتني وطبعا كنا قروووب فوق ال 6 بنات قررنا نكون مع بعض و على قلب واحد ، كل وحدة تساعد الثانية وكل وحدة تخفف عن الثانية وكنا شرات الخوات و أكثر.
كنا بصراحة ما نعرف شي عن الدنيا ، كنا نحب نشووف رسوم كونان وهاي السوالف ، ما نحب الأغاني ما نحب خرابيط البنات ، كان عمرنا 17 سنة بس اللي يدش غرفتنا و يشوف القنوات اللي نشوفها بيضحك كلها رسوووم ودباديب ، اشتقنا للبلاد ، على قولة ربيعتي " اشتقت للدواوير وخاصة دواوير عيمان و الشارجة و راس الخيمة " طبعا لان ف كندا اشارات ما شي دواوير خخخخخ
كانت الغربة صعبة اول اسبوووع ، ربيعتي مريوم كانت دوم تصييح وكنا نصيح وياها بس بعدين لما كنا نرمس اهالينا ما نبين ان نحن زعلانات اونه عادي مستانسات و ندرس و مرتاحات ، مع ان العكس صحيح .
كنا متفقات خرابيط ممنوع حب ممنوع اعجاب ممنوع << اوكي ارباب
كل وحدة تدرس و بس اكثر عن جي ما نبغي ؟
ما بتعمق وايد ف السوالف اللي صارت لنا ف الغربة لانها بصراحة كانت اموور عادية او قصدي كان ولا شي بالنسبة للي صار لي عقب ما تخرجت من الجامعة و رديت البلاد؟
بعد سنتين من الدراسة و الغربة كنت ارجع البلاد بعد كل سمستر ، تصدقون كلما ارجع اهلي يتحروني برجع لهم متبرجة ، بدون عباية بدون شيلة لابسة بنطلون ضيق ولا شوورت ، وكنت كل مرة ارجع بعباتي و بشيلتي وحتى عباتي كانت مصكرة لاني ارتاح فيها اكثر يوم امشي ف الجامعة ، وولو تلاحظون حتى عقب ما درست ف الجامعة رمستني اختربت احس اني نسيت لهجتي ما اعرف ارمس عدل ( ما ادري لاحظتوا ولا لأ) ؟
المهم بعد ما وصلت ال 19 سنة رجعت الإمارات و يا ليتني ما رجعت بتعرفون السبب ؟
اول ما وصلت المطار شفت اخوووي البووووس يترياني و يضحك علي
حمود : فطووووووووم اشوفج غديتي عظم بدون لحم
فطوم : بدل ما تقول الحمد الله ع السلامة اختي الغالية العزيزة ابغي اعرف مع منو تضارب الحين والله انا اللي مسوية لك جووو ف البيت ؟
حمود: والله الجو اوكي بدونج
فطووم : انزين ما ادري وين شنطتي اصبر ويا ويهك
حمود: وين ربيعاتج ما اشوووفهم ؟ ( وهو طبعا يدور يمين و يسار )
فطووم : بسك تطالع بنات الناس افففف منك مفشلني ف كل مكان حتى ف المطار .
حمود : شوفي ها البنات يأشرون عليج ( كان يقولها بكل حب وبكل هدوووء )
فطوووم : اوكي يأشرون علي مب عليك لا تطالعهم بليز فضحتني يا ويهك والله بفتن عليك عند مامي
حمود : لا مطورة الاخت و تقول مامي ههههههههه ضريبة الغربة، تعالي يا طبيبة الأسنان احس لوعة جبد والله شوو بتعالجين ضرووس الناس وع عليج تخيلي تعالجين شايب و الله ع ريحة حلجه خخخخخخخخ عذااب
فطوم : الله يلوووع جبدك بس خلني اوصل البيت عقب ارمس وع عليك
حمود: خلاص خلينا نسير عن نتأخر أمج تتصل بي و تسأل متى بنرجع
بعد هذا" الديالوج" ما ادري "المونولوج" وصلت البيت ، و ف الطريج حمود قطعني بتعليقاته علي و على ربيعاتي ، بس كنت اضحك عليه لانه صدق اموت عليه و على تعليقاته ، أول ما
دخلت باب الصالة ولا أشوف اخوي الصغيرون سوافي يربع عندي و مستانس.
سوافي: فطوووم والله ما أدانيج ليش ما توديني وياج أنا ما اروح الكيجي أبغي ادرس وياج ما يستوي ؟
عبود: ما ادري أنت شو بتدرس هناك ليكون طب اسنان ، اول شي فرش ضروسك ولما السوسو يخوووز عن ضروسك عقب بيخلونك تدرس عندهم
سوافي : والله خلاص بفرش اسناني دوم بس تخليني أسير وياج ؟؟؟؟؟
فطوم : ان شاء الله حبيبي فديتك والله انا اموت فيك
فطوم : سوافي وليش مطول شعرك مب عيب
سوافي : ابغي اشترك في الميدان لازم اطول شعري
فطوم : هههههههههههه الريال ما يطول شعره الشعر الطويل للبنات وانت ريال تسمعني ؟
سوافي : اففففف اقص شعري و أفرش اسناني اختاري واحد منهم
فطوم : تراني انا تعباااااااااااااااااااااااااااانه ابغي ارقد ومحد يوعيني يا ويلكم
ما اسمع إلا وحدة تيبب كلوووووووووووووووووووووووووووووووش منو هي
فديتها هي نضر عيني قصدي امايه او مامي انتوا اختاروووا <<
عبود : بلللللللل هاي بعدها ما تخرجت و تيبيبين عيل لو تخرجت شو بتسوين بتنعشين ؟
مامي : هى لازم بنعش بنتي دكتووووووووورة فديتج يوم رفعتي راسي بين العرب و فديتج يوم رجعتي لي بالسلامة
فطوم : فديت روحج يا قلبي يا عيووني و عمري
عبود : بس فالحة للكلام الحلووو الله يعين اللي بتاخذينه بتقصين عليه بس انا بفتن عليج بقوله ان اختي خريطه وكلامها بس عسل والله انتوا البنات شياطيين بالكلام الحلووو تقصون علينا
فطوم : انزين انا ابغي ارقد بااااااااااااااااي
ما لقيت نفسي إلا وانا عاقة عباتي و شيلتي و رقدت
المهم نشيت من رقادي بسبة وحدة ملقووووووفة هي خالتي
طخ طخ طخ طخ طخ طخ طخ
خالو مريوم: نشي يا الدكتورة ابغيج تعدلين ضرووسي
فطوم : ( وأنا أشخر و في سابع رقادي … ما برد عناد )
خالو مريوم: فطوووم نشي بسج رقاد حشى ها الكثر راقدة ؟
فطوم : ( نشيت من ع سريري و فتحت الباب ) انتي شو فيج ملقوووفة اف منج خليني ارقد!
خالو مريوم : تعالي ف الأحضان ( وهي تحضني قرصتني الدبة ؟)
فطوم : يالدبة عورتيني ؟
خالو مريوم : يالعظمة بقرصج يمكن اصير دكتورة
فطوم : احيد اللي تعرس يقرصونها مب اللي تدرس ( الحمد الله و الشكر بس )
خالو مريوووم : ريلي يسلم عليج وايد يقول لج ااول شي تسوين له تبيض اسنان
فطوم : ما اسوي حق شواب سووووري اللي عمره ما بين ال 20 – 20 بسوي له اكثر نووو .
خالو مريوم : يالشيطانة ادري بج اونه يمكن ينعجب فيج و يخطبج بس ما تبغين الشواب عسب ما تتوهقين فيهم
فطوم : والله اصلا خسي اسوي لرياييل ها اللي ناقص بعد بس انا اتمصخر !
خالو مريوم : تعالي اتصل ابوج ؟
فطوم : اسكتي بس الله يخليج عمره ما اتصل ولا سأل عني الحين بيتصل ؟
خالو مريوم : يعني هو رضى انج تدرسين كيف ما بيتصل فيج ؟
فطوم : يا عيووني هو رضى لان المصاريف كلها ع الحكووومة هو ما يدفع ريال واحد من جيبه ، بس يالله الله يصبرنا و يعوضنا .
خالو مريوم : ان شاء الله تتزوجين واحد متييييييين يعطيج كل الحنان اللي فقديه
فطوم : وانا ناقصة متين بروحي عظمة بس خليني الحين ميته من اليووووع تدرين خاطري ف مندي
خالو مريوم : اول شي مشطي شعرج و قبله اغسلي ويهج و عقب تعالي بسوي لج احلى بيض و خبز و جبن بعد شو تبغين زيادة ؟
سرت تسبحت و تعدلت و تكشخت لان قووم مامي بيزوووروني والله يعيني ع التعليقات الحلوه و التعليقات البايخة !
الجزء الثاني
المهم تكشخت و تعدلت و مكياجي كان خفيف و استشورت شعري ، احلى شي فيني كان شعري ناعم دقيقة و استشوره قولوا ما شاء الله .
سمعت حد يدق الباب
خالو مريوم : يالله اطلعي مب يايين يخطبونج ؟ الحريم بيسلمون عليج و بس اظهري من حجرتج بسرعه.
فطوم : ثواني و بفتح الباب.
خالو مريوم : وااااااو شو ها الزين ؟ شو ها الفستان الغاوي ؟ و ليش ما اشتريتي لي شراته ؟ والله انج بخيلة ما ادري ظاهره ع منو ؟ اكيد ع اهل ابوج ؟
فطوم : والله شو اسوي كل السايزات حق الرشيقات مب حق المتان ؟ بابا خلاص راحت عليج اضعفي اول شي و بشتري لج فساتين تخبل والله.
خالو مريوم : والله ياييبه درزن عيال شو اسوي يعني.
فطوم : حبيبتي يوم ريلج يشوف بنات الشارع و التلفزيون عقب قولي ليش يغازل ؟ تسمعين لا اتيين عندي و تشكين الحال ، الحقي على عمرج .
خالو مريوم : خلاص ابغي اسير النادي ؟ ولا تعالي انتي ضعيفة بعد ليش اسير وياج ؟
فطوم : فديتج انا مب ضعيفة يسموووني رشيقة الحمد الله فيني شوية لحم مب عظام بس ، ومب شرط الرياضة للمتان بس الرياضة وايد زينه تحافظين ع جسمج و على صحتج.
خالو مريوم : انزين سجلي ف اي نادي وانا وياج بس ع العصر لان الصبح دووووووووووووام.
فطوم : اووووكي دير اجلبي ويهج خليني انظف حجرتي وارتب اغراضي و اظهرها من الشنطة، ما يندرى يمكن وحدة ملقووفة تدخل حجرتيه ههههههه و تشوف الحقيقة المره
بعد ما سارت خالوووتي
كل اهلي وصلوا من عماتي و خالتي خالات مامي و عماتها الخ ..
احس انهم ما زاروني بس عسب يشووفوني لا ؟ يبغون يشوفون كيف بيكون شكلي هل بكون فطوم الكتكوتة الهادية الحلوة ولا وحدة ثانية ؟
سلمت ع الحريم و تحمدوا لي بالسلامة ، كل حد اتصل فيني و سلم علي يعني حتى بشكارة قوم عمتي متصلة فيني و تسلم علي ؟ خخخخخخخخخ اسميني مشهورة وانا ما ادري ، االمهم شخص واحد ما اتصل فيني ، انكسر قلبي بصراحة ، تدرون منو قصدي قصدي ابوووي "بو حمود " .
الريال متزوج حرمة ثانية و عنده درزن عيال ، حرمته وايد زينه وطيبة و حبوووبة و عسل ع القلب ، مب شرات باقي الحريم خرابات بيوت ، فديتها طيبة طيبة طيبة الوحدة لما تقول زوجة ثانية تتحرى ان الزوجة الثانية تكون وغدة و نذلة بس هي كانت غير ما شاء الله عليها .
المهم ابوي ما اتصل ولا سأل طبعا هو ما كان يدخل بيتنا ابدا ، بس فالح يتخقق يدام الشواب ان بنته دكتورة .
ما حسيت عندي ابو شرات باقي البنات بس مجرد اسم و لقب الشخص اللي يمكن اكره ف حياتي هو هذا الانسان ، الحين انا كبيرة مب مشكلة اخوي الصغيرووون يحليله دوم يقولي ليش انا مب شرات باقي اليهال ، فلان سار المول و لعب مع باباته وانا لا ليش انا غير ، بس شو نقول حسبي الله ونعم الوكيل ، ما ادري ليش قلبه ما يحن على عياله و يتصل يسأل عنهم ؟
المهم بعد ما سلمت ع الحريم و شفت بنات خالتي و عمتي و حضنتهم و اللي تقولي ضعفتي واللي تقول صرتي كندية هههههههههههههه الحريم لازم يعلقووون بس عادي ما في شي يزعل خذت كل التعليقات بروح رياضية.
وحدة من بنات خالتي اشوفها تتطالعني بنظرة مب حلوه ابدا
عويش : اشوفج محلوه ما ادري شو مسوية بويهج ؟
فطوم : قولي ما شاء الله فديتني دومي حلوه ( بنات فديتكم لازم كل وحدة فيكم تكون واثقة من نفسها هذا اهم شي مرات اشوف بنات وايد حلوات بس دوم تقول عن نفسها خسفة )
عويش : ما ادري على شو بحسدج تعالي شو الجو هناك ؟ شباب وبنات ؟
فطوم : اكيد شباب و بنات ، هاي كندا مب مكان ثاني ، الحمد الله و الشكر بس
عويش : تعالي شو سالفة اللي يحبج ؟ ( قالتها بصوت عالي و متعدمة عسب الكل يسمع )
فطوم : أأأ منو هذا بعد ؟
عويش : انا وصلني خبر واحد يحبج ف كندا وهو خليجي شو سالفته ؟ ( حشى ما ادري منو مخبرنها )
فطوم : فديتج انا دوم عندي معجبين بس انا ما اعطيهم ويه لاني سايرة ادرس فديتج مب رايحة اغازل ؟ وانا ما اخذ إلا ولد بلادي ؟
مامي: ( كانت تتطالعني بنظرات حقيرة ) فطوم منو هذا بعد ؟
فطوم : هذا واحد خليجي بس مرة خبرني ابغي اخطبج ورديت عليه تراني مخطوووبة عسب ما اكسر بخاطره ولا تصير حساسية بينا .
مامي : مسكين الريال اكيد زعل .
عويش: انا عمري ما رمست مع شباب حتى ف شغلي و في الجامعة ولا واحد تجرأ يقول انا بخطبج ( تقصد اني ارمس شباب )
فطوم : المهم شخباركم منو عرس منو طلق منو اشتغل ههههههههههههه ( غيرت المووضوع لاني شوي و بكسر راسها )
عقب تمينا نسووولف لين الفير وما خلصنا من سوالفنا رمسووني عن البلاد شوو التطورات واهم شي عن السناتر خالتي وعدتني توديني بجولة ع السناتر اللي ما شفتها ؟ اهم شي العشاء على حسابها وانا راضية اظهر وياها
الجزء الثالث
تصدقون كنت وايد مترددة أكمل القصة ولا لأ بس قلت بكمل بكمل ان شاء الله
شرات ما خبرتكم تمينا نسووولف لين الفير وكل وحدة من عماتي و خالاتي شلت قشها و شلت عيالها و سارت بيتها ، كل وحدة فيهم كانت سالفتها سالفة ، ولو بكتب من اليوم لين 100 سنة ما بخلص من مشاكلهم ، الله ايسر امرهم ان شاء الله .
نشيت اليوم الثاني ومروا علي بنات خالتي و خالتي مريوم ام الحووواطة والله لو يوم تيلس ف البيت نستغرب ؟ لانها متعودة تحب تحوط و تدور سنتر خياط صيدلية مستشفى بحر فندق شاليه هي و ريلها شرات بعض ، وما تحب تقر ف البيت ههههههههههههه لو سمعتني الحين يا ويلي يا سواد ليلي.
اونها ياييه بسيارة ريلها الاستيشن عسب يصير مكان بس اتعصرنا بصراحة خخخخخخ زين المخفي 70 % ولا صدق بنتفضح يمكن عددنا فوق ال9 بنات تخيلوا اشكالنا ف المووتر ؟ و سرنا موووووول الإمارات ، يالله يوم التفليس العالمي بصراحة ريووولي تورمت من المشي اهم شي خمينا السنتر و طلعنا تدرون عاد تنزيلات الصيف وانا خذت لي اغراض للسفر ،و عقبها تعشينا ف مطعم و رجعنا البيت .
طبعا كان ف فصل الصيف و عندي اجازة شهرين بالضبط وعقبها ارجع كندا ، كنت احس نفسي تعبانه ما اروم اكمل دراستي مع ان دراجتي كلها امتياز قولوا ما شاء الله ، بس حاولت اضغط ع نفسي و قلت يالله الحين عندي اجازة و برتاح شوي عقب برجع للكراف و سهر الليالي.
اليوم الثاني نشيت من رقادي و حسيته احلى يوم ف حياتي ما ادري ليش ؟ تصدقون مع اني نشيت من وقت بسبة الحمام مب حمام عزكم الله قصدي طيور الحمام ههههههه الله يغربل بليسهم واقفين صوب دريشتي وما ادري شو يسوون ياكلون ولا يسون شي ثاني الله اعلم ؟
غسلت ويهي تراني استخدم غسووول كلين اند كلير وايد احب ها الغسووول << دعاية
وعقبها ركبت سيارة اخوي وكانت عندي مشاااااااااااااوير قد شعر راسي ، ابغي اروح افصل لي عبي للعيد مرة وحدة و عبي للجامعة تكون خفيفة و حلوة ، ابغي اشتر لي جاكيتات و سوالف البرد ، و ابغي اشتري لي وايد اشياء : كريمات لوشنات عطور دخون الخ …. صح اني خميت مول الإمارات بس بعد ابغي اشتري ههههههههههههه .
كنت رايحة سنتر من السناتر بروحي ، تدرون أحلى شي عندي يوم اتسوق بروحي يا سلاااااااااااااااااااام اتسوق ع راحتي ، شريت كل الأغراض اللي ابغيها تقريبا ، تمنيت مرات اني ما دخلت ها السنتر بس شو اقول النصيب ، وكل شي مقدر و مكتووب ؟
الله يسلمكم وانا امشي و ماسكة ها الاجياس ، سرت صوب باسكن روبنز خاطري ف اسكريم يم يم يم ، يوعانه والله لا تريقت ولا تغذيت ، وما لقيت إلا" شنغل و منقل " على يساري ، اكيد تعرفون رسوم "شنغل و منقل" ، اول ما شفت واحد منهم تذكرت انه يشبه مغني ليكون هو المغني الفلاني ؟ ما بقولكم الاسم هههههههههه
طنشت و كملت دربي ، و ركبت سيارتي ، و "أشوف شنقل و منقل" وراي ، طنشت وكملت دربي و أسوووق و شغلت السيدي و عليت على الصوووووووووووووووت اظني لو حد صارخ ما بسمع ؟ كنت مشغلة نشيدة كنت اموت فيها " يا أهيل الحب جودو مغرما وافي إليكم أيا احباب عودوا كل هاماتي عليكم " اكيد تعرفون هاي النشيدة ؟ كنت دوم اسمعها .
المهم عن " شنقل و منقل " الحبايب ما يأسوا ، وتموا يلحقوووني لين ما وصلت فريجنا ، و حاولت اني اخفف السرعه وعقب فجأة شخطتها و دخلت الفريج ، و النتيجة السيارة انشخطت لاني شوي دعمت الرصيف بس دعمة عادية ههههههههههههه
عقب شفتهم مصخوها عاد شو قلت الأدب هاي ؟ اتصل في اخويه حمود ولا شو اسوي الحين اضيعهم ؟ وعلى قكرة حمود صح يضحك و يتمصخر بس ف هاي السوالف فيها دم و قبايل ، ترددت وايد قبل ما ارمسه بس قلت يالله خاربه خاربه !
طلع اخوي برى البيت و سار صوب " شنقل و منقل " وانا قلبي خلاص بيوقف من الخوف طبعا بركنت داخل البيت << سبحان الله اكيد بركنتي ف الكاراج عيل فوق السطح
تصدقون طلعوا " شنقل و منقل " ويههم لووووح وما شردوووا ، واحد منهم رمس اخوووي حمود ، وان احاول اراقب اشوووف شو السالفة ، معقووولة حمود ساكت ولا كفخهم ولا مد إيده ؟ اووووووووووويه ليكون يعرفهم ولا من اهلنا ولا من ربعه وانا ما ادري ؟ يا ويلي فضيييييييييييييييييييييييييييحه الله يستر بس .
الجزء الرابع
المهم وانا اتريى على احر من الجمر و قلبي يدق بسرعه لدرجة حسيت بيغمى علي ، أشوووف اخوي حمود ياي صووبي و تقولون شيطاطين الانس و الجن فيه ، سحب مني الشنطة و خذ موبايلي ؟؟؟؟ ودخل داخل حجرته و صك الباب ؟؟؟ والله انك ما عرفت منو هي فطوم يا حمود؟
حسبي بالله و نعم الوكيل ف شنقل و منقل ظهرت برى الحوووش و شفتهم
فطوم : خير ان شاء الله شو بغيتوا ؟ ما أدري متى بتستحون على ويهكم ؟ وصدق شباب العين معروفين بصياعتهم ما يبغي له رمسة بوووويه ردوا العين وين يايين الشارجة حق المغازل ورب الكعبة بتصل ف الشرطة الحين .
عقبها دخلت داخل البيت .
سلوم : فيصل خلنا نشرد قبل ما تفلعنا.
فيصل : لا والله العظيم ما يظهر من فريجهم لين لما اشوف ابوها أبغي اخطبها قسم بالله بخطبها .
سلوم : شو تبغي بأهل الشارجة قوم " هى لا " "قوم الدنقوو" ( والله لو كنت ادري انه قال جي ف نفس الوقت كنت بفلعه بنعالي)
فيصل : شوف انا ما عندي خرابيط انا ريال سيده ابغي اتزوج ع سنة الله و رسوووله
سلوم : الحين شو دراك بأصل البنت يمكن مب عربية ؟
فيصل : وخير يا طير راضي بس يرضون علي و يأشروووون بس
سلوم : خلني اشوف حرارتك اظني حرارتك مرتفعه اخووووووووووويه صكيت ال 30 سنة و تبغي تحب بعد
عقبها فيصل و سلوووم ردوا العين ؟ و خلوني ف مشاكل أنا في غنى عنها ؟
مامي: فطوم شو مسوية شو صاير شو يخربط اخوج ؟؟؟؟؟؟؟؟؟؟؟؟؟
فطوم : قسم بالله ما سويت شي
مامي: كيف ما سويتي شي ، و خذ موبايلج عنج ؟ لا تسودين ويهي يدام العرب؟
فطوم : والله العظيم كنت طالعة و توي رجعت و في سيارة لحقتني و عقب اتصلت ف حمود خبرته ان شباب لاحقين وراي وبعدين شفته عادي يسولف مع الشباب ؟
مامي : الله يستر شكلها مصيبة
فطوم : قسم بالله ما اعرفهم ولا عمري شفتهم ، انا اصلا ما اعرف حد من العين
تراني تعبت بكمل لكم القصة عقب ^..^
واتريى رايكم شو رايكم بالشخصيات لين الحين؟ شو تتوقعون يصير ؟
رايكم بكل صراحة و بدون مجاملة ؟
تصبحون على خير فديتكم
المشاركة الأصلية كتبت بواسطة فديتني ياربي 
