الوسم: Mall

شو اخباركم وشو الطلعات والرحلات وياكم…ماشاءالله اجازات وامطار واجواء جميله…

اليوم راح اخذكم برحله لدبي مول الجديد في دبي..اكيد في دبي يعني وين بيكون هههههه.الصراحة رووووعة وكبييييير جداا(مكان المول بجانب برج دبي …)

.ومن كبره طبعا يباله كذا مره اتزورينه عشان اتلفينه كله

واللي حاب يزوره يسير من الصبح لين العشاء ..خخخخخ ويرقد عشان يكمل اليوم الثاني خخخ

.بس افضل يقسم الاماكن على عدة ايام..يعني يوم للاكواريوم ويوم للسوق ويوم للالعاب وهكذا..

انا عن نفسي كانت حلتي سريعة وقاصدين الاكواريوم ( حوض السمك)..ومركز الاستكشاف

رحلتي او رحلتنا انا وزوجي وعيالي..كانت بعد الغداء ..ريلي من النوع اذا قصد يسير مكان ما يسوي شي غيره اتخيلو حتى ايس كريم ما كلنا بس دخلنا حوض السمج ولفينا كم محلبس انشوف ما نشتري عداله ورجعنا المغرب..

وكانت في شهر 11 كان ودي انزل التقرير قبل بس لكثرة انشغالي ما قدرت..بس ان شاءالله تستفيدون

ما بطول عليكم اكيد متشوقين للمكان الجديد الجمل ..

واخليكم ويا الصور..

واول ما بتدخلين طبعا ما بدلين مكان بس هناك دليل الكتروني ..الصراحة شي جميل

ومثل ما قلت نحن قاصدين الاكواريوم ..فكان هذا على دربنا حبيت النعال العملاق

ومشينا …

ووصلنا..هذي مناظر من الخارج مجانا..هو عباره عن نفق .

ودخلنا النفق وسعر الدخول 15 درهم للشخص..واذا بغيتي اتروحين فوق لمركز الاستكشاف الشخص ب 50 درهم والاطفال مجانا تحت السنتين يعني النفق +مركز الاستكشاف 65 درهم للفرد
وهذذه بعض الصور من النفق

صورة السمج فوقي منظر رائع وكانج في قاع البحر

صورة اخرىمن اعلى

وبعد النفق تطلعين وهناك دري متحرك للطابق العلوي ..لمركز الاستكشاف

يتبع…>>>

وفيه احواض سمج والاحياء البحريه ..مكان جميل واستانسو الصغاريه عليه والكباريه..
وهذه الصور..

صور..اظن يسمونه ثعلب الماء..ما انتبهت للاسم

للاسف كلهم منزلين روسهم ..يستحون منكم..

وهذه اسماك كبيره ..

وهذه سلحفاة البحر..تسبح

وهذه اللخمة اللي ما اتخليني اصورها عدل حبيتها لونها علىالموضه..

وهذه الثانيه سريعات ما يخلوني اصور

ورجعت للاولى وصورتها من فوق

وبعدين في مكان تشترين طعم للسمج ب 5 دراهم وتطعمين السمج من اعلى..وهذه صورتهم

وهذا روبيان

يتبع…>>

عاد اتخيلوني بنقابي داخله والله شكلي يضحك واظن في هندي صورني

وهذا نيمو الصغير ..

وهذا المكان الجميل تقدرين تلمسن اي نوع من المحار والمرجان ونجم البحر …

وسبحان الله اشياء غريبه وعجيبه وملمسها ناعم ولين وخشن سبحان البديع

وعقب ما تتمتعين بملامستهم …فيه مغسله اتغسلين ايدج عنهم …بس للاسف ما صورتها كانو ناس يستخدمونها..

وهناك مناظر جميله …السمك الدوار انا سميته دوار يدووووور ولا يوقف

وهذا من الحجم العائلي

وشي فقمه بس يمكن عددهم 3 بس لكن اتسوي حركات تتبع ايدج وين اتحطينها..

واتسوي حركه دائريه بس قطعت راسها ..

وهذه بطاربق بس ما تتحرك ولا اتسوي شي ..

يتبع….

وهذه ام الروبيان

وهذا مثل الثعبان بس راسه سمكه لاحظو يوم ايواج..

شوفي جسمه..سبحان الله!

وخلصنا من رحلة الاستكشاف وبعد ما تطلعين بيكون في محل يبيع اغراض بحريه من هالسوالف بس اظن اسعارهم غاليه

وعقب اتمشينا شوي انشوف المول بس طبعا مشينا مشينا ودخلنا هذه بعض صور للمول

وفي صالة تزلج ..

ودخلنا هذا المحل للالعاب ..

وحبيت حركة البيت..

يتبع…

ووصلنا جهة المطاعم كان قسم مرتب..

وهاي صوره للمول ظهرت عويا لاني على الدري المتحرك..ونحن راجعين

وهذه محلات خارج المول قبل الباركات يعني تابعه للمول بس من غير سقف مثل اب تاون

ورجعنا للبيت وهذا منظر برج دبي

وفديت دبي وشمسها..

وان شاء الله تقريري عيبكم

واما عن المحلات كانت اغلبها مسكره بس ما يمنع اتزورين حوض السمج ومره ثانيه اتزورين المحلات
وكانت محلات لبس الاطفال اغلبها فاتحه..وطبعا انا ما لفيته كله فما اعرف شو المفتوح

واظن الحين فتحوا لانه مر شهر..

وبس

المشاركة الأصلية كتبت بواسطة ummohamed1

رووووووووووووووووووووووعه كملي نحن وياج عالخط

هلا اختي مشكووورة على المتابعة وحياج

بغييت اعرف فتحووه ولا؟؟ والفندق اللي فيه فتحووه ولا ؟؟ واايد اسأل صح؟؟ اخر سؤال…. فتحوا كل المحلات ولااااااااا؟؟

والسموووووووحه

وين مكانه ما عليكم أمر …؟

بغيت اسألكن عن المطاعم اللي في "دبي مــــول "
المفروض اسميه عالم دبي مول ما شاء الله من كبره

بغيت اجرب مطاعم مثل رد لوبستر وغيرها مابا سلسلة المطاعم ابا المطاعم الخاصة … ابا احسن المطاعم في دبي مول والطبق المفضل اللي جربتيه بنفسج ..

حاجزة ليلتين في The address Hotel اللي في المول وابا انتهز الفرصة ..
وبعد لو في اي مكان في المول نفسه تنصحيني اروح له بليز خبروني ابا افصفصه ..

جربي المطاعم اللي تحت حذال الاسكيتنج المطاهم نايس
وفي مطعم هندي عند الفود كورت اكله حلوا بس واااااااايد حار
والفاست فود اغلبيته حلوا
وفي المطعم البناني اللي حذال الاثاث اظن اسمه الحمام شيء من هالقبيل هالمطعم شكل حلوا بس الاكل هب ذاك الزود بصراحه يعني عادي

جوفي سوي شراتي انا ريلي من عشاق سلسة فنادق ذا ادريس ليش ما اعرف ؟؟
المهم نحن يوم نحجز في الفندق بالذات اللي احذال دبي مول ما نحجز مع الفطور
لأن الصبح بتلقينا نفطر في واحد من الكوفيات اللي في المول وبصراحه شيء نايس والمول يكون هادي مافيه غير الاجانب
والغداء في مطاعم المول والعشاء بعد .. بهالطريقه انكون جربنا كل شيء اهناك ما نفوت فرصه

اخر مطعم صوب السكيت عدال لافييت

اذا كنتي اتحبين الباستا و البرجر و النيوتلااا و الخفايف انصحج فييييه وايد روعة و ديكوره مميز

و مطعم برج الحمام لبناني وايد حلوو و كل ماسيرله يكون زحمه

و الحلاب حلو بعد لبناني

الفود كورت شكله فيه مطاعم حلوه بس سرت له مره وحده ف رمضان و كان زحمة لدرجة انه فيه ناس ياكلون و هم واقفين و ظهرت منه من غير ماجرب شي

بما اني ما احب المطاعم الي ما مجربتنها او سامعه عنها ما ادخل

وخاطري اروح سويتش يمدحونه

ناطرين تجاربكم

وبعد مدحت لي وجبات معينه من عندهم