حد فيكن جربت لعبة نينتيندو وي ؟
ايي معاها جهاز اسمه Wii Fit
شكله يكون مثل الstep مال الايروبكس
تحطونه جدام الجهاز مال العبة و ايي معاه دي في دي مال الجهاز
بصراحة رهيب
اول ما تشغلونه يسوي لكم شخصية وهمية اللي هي انتي و تعطينه كم معلومة
مثل الطول و العمر و عقب توقفون على الجهاز و هو يحسب كمية الدهون في الجسم و التوازن عندكم
و يخليكم تسوون خطة مثلا باخسر 5 كيلو في اسبوعين
و يخبركم هل انتوا فيكم بدانة زايدة و الا مجرد زيادة بسيطة في الوزن
و عقب ما تخلصون تبدون في الرياضة
عندكم اليوغا و التوازن و الايروبكس و تمارين تقوية الجسم
و كل ما قضيتي وقت على اللعبة يحسب لج الوقت اللي قضيتيه في مثل ما يسمونه في اللعبة fit bank
كل ما كملتي اعتقد 10 دقايق تفتح لج لعبة يديدة
بصراحة شي حلو
انتي تستانسين و تستمتعين و في نفس الوقت تسوين رياضة و تحرقين سعرات حرارية ^_^
انا بادية عليه من اسبوع و بصراحة كل يوم العب فيه صح ما ايي التقييم في كل لعبة مثل ما تشتهي الانفس و يصيبني احباط من السكور مالي
بس الحين بديت اتحسن
التوازن عندي صار احسن شوي ^_^
و يوم شيكت على نسبة الدهون استانست لانها نازلة شوي عن الاسبوع اللي طاف
فيه بعد سي دي خاص نفس الشي تعطون المدربة بياناتكم
الطول و الوزن و قابليتكم لبعض التمارين و عقب تحددون مثلا انا كل يوم ربع ساعة ايروبكس
و هي بصراحة وايد ممتعة و ما اتعب <– اقصد المدربة اللي في اللعبة
يعني 3 دقايق push up وراها دقيقة راحة
و كانكم في نادي رياضي
هو ما يكلف بصراحة
اعتقد سعر اللعبة الحين ما بين 900 – 1000 درهم و الWii Fit ب 350
و الدي في دي اغلبهم يحصلونه تقليد ب 15 درهم
الحين بديت ازيد الوقت اول شي كان ربع ساعة الحين
خليته نص ساعة … العب و لا احس بالوقت و اعرق و احرق سعرات حرارية
اللي جربته تخبرني عن تجربتها ^_^
و صح ترى الجهاز يتحمل الاوزان لين وزن 135 كيلو
و هالشي حلو فيه ^_^
في عيمان و راس الخيمة بتحصلينه اعتقد ارخص شوي
في بوظبي اعتقد في حامد سنتر بعد بتحصلين ^_^
في كارفور بعد صوب قسم الالعاب
اسالي عنها و بيخبرونج ^_^
ريلي وايد شجعني
انا حاليا بما اني طول اليوم في الدوام و ارد البيت قريب المغرب
فاسوي رياضة قبل ما انام بشوي
بديت اول شي بربع ساعة و الحين اكمل نص ساعة كل يوم
و الويك اند ساعة
نص ساعة الصبح و نص ساعة قبل ما انام
على فكرة اي حد يقدر يستعمله
انتي او عيالج او ريلج حتى
انا اخواني يستعملونه
لانه ساعات نرجع من الدوامات تعبانين و ما عندنا وقت او شدة عشان نروح نمشي
هو مجرد بديل للي ما يقدرون يروحون النادي او يمشون
و الوزن ما بيخف الا اذا خففنا الاكل و واظبنا على ارياضة
مب بس عشان يخف وزنا … عشان بعد تكون صحتنا زينة ^^
