التفكير ذابحني

السلام عليكم ورحمة

عندي وايد مشاكل في الحياة واكبر مشكلة اني وايد افكر في كل صغيرة وكبيرة !!!!!!!!

في كل شي في كل شي ..حتى ولو مريت بمشكلة صغيرة افكر فيها وايد وما ارقد الليل خليجية..
افكر في المرض اللي فيني …افكر في المستقبل …!!! حتى ساعات افكر في الزواج واخاف منه ..!!

وشخصيتي وايد ضعيفة …ما اقدر اغيرها …مثلا لو كنا نتكلم بين مجموعة ..الكل يتكلم بس انا اتم ساكتة ولو تكلمت محد يسمع رايي ..وكله يقاطعوني ..!!!!!

وما عندي ثقة الكبيرة في نفسي …اي وحدة تعلق علي ،، على طول اصدقها وحتى لو التعليق ما عيبني خليجية…وما اقدر ارد عليها لاني مب متعودة ارد برد يسكت خليجية ..

نفسيتي وايد تعبانة ما عرف شو اسوي …شوروني بحل..حقي مآكول

ما اعرف والله ارد عليج؟؟؟؟

حبيت ارفع الموضوع بدعوة

الله يريح بالج ويقويج

انت لم تكن ذئبا اكلتك الذئاب

لازم تزيدين ثقتج بنفسج عن طريق ذكر الله والدعاء انه يقويج

وقراءة الكتب اللي تحلل الشخصيات والدورات المفيدة حتى لو عن طريج النت

نحن في زمن صعب

والتفكير ما بييب لج غير ويع الراس والهم والمرض والصياح بليا سبب مقنع

خلي عنج سوالف الشلة اللي ما تعيبج وافرضي رايج عليهم وخليهم يسمعونج

مثلا اذا قاطعوج قولي لهم بكل ثقة –يبالها جراة — اظني انا ارمس وعيب تقاطعوني وانا ارمس

او قاطعيهم شرات ما يقاطعونج وشوفي شو ردة فعلهم وعقب قولي لهم انتوا بعد تقاطعوني وما تسمعوني

هالشخصية انتي لازم تبنينها في نفسج

وقفي جدام المنظرة ورمسي عمرج بكل ثقة

وابدي اول شي من البيت واللي معاج في البيت قوي شخصيتج شوي شوي –طبعا مع احترام الاهل والاصدقاء

وعقب الكل بيحسب لج الف حساب

واذا هم ما عيبهم الوضع

انتي بشخصيتج اليديدة تقدرين تكونين صداقات يديدة

واقري مواضيع منوعة

وشوفي شو اهتمامات البنات اللي وياج دوم عن شو يرمسن وحاولي تبحثين عن اللي رمسوا عنه

مثلا يحبون الميكب والملابس شاركيهم اهتمامهم بس مع فرض شخصيتج

حتى لو قالوا لج مب حلو ذوقج

قولي عايبني وحتى انتوا انا ما احب ذوقكم

بس الشخصية القوية ما تعني

قلة الأدب ورفع الصوت بالعكس اجذبيهم بسوالفج واسلوبج المرح

واهم شي الدعاااااااااااااااااااااااء ان ربي يقويج

أنا أعتقد ان الموضوع مرجعه للخجل
اكيد انتِ خجولة بالإضافة لقلة الثقة بالنفس

انا بيوم من الايام كنت مثلك
لا وبعد كنت اذا حد قاللي كلمة مب حلوة اصيح جدام الناس تخيلي

بس مع الوقت والاحتكاك بالناس بتشوفين نفسك صرتي افضل وأقوى
ولكن .. أنصحك بتعزيز ثقتك بنفسك عن طريق القراءة في مواضيع تعزيز الثقةب النفس
والاختلاط بالناس وبالمثقفين وأصحاب الخلق والدين
وكل ماتشوفين صفة حلوة وخلق جيد من شخص حاولي تقليده
وكل ماشفتي عاده سيئة وتصرف قبيح من شخص تجنبي هذا التصرف

آخر اليوم قبل ماتبدئين تفكرين
صلي ركعتين واقرئي قرآن وادعي ربنا بأي شيء من خير الدنيا والآخرة

وقولي :
توكلت على الله ولا حول ولا قوة إلا بالله

واكثري من الاستغفار

اذا شغلتِ عقلك وتفكيرك وذهنك بالذكر والتسبيح والقراءة بالكتب المفيدة والنشاطات المفيدة
وقتها عقلك ماراح يلاقي فرصة عشان يقلب عليكِ أحداث اليوم .. ومواقفه التي مضت وانتهت .

تمنياتي لكِ بالتوفيق

مرااااااااااحب يالغالية……..
حبيبتي أكبر غلط انتي يالسه تسوينه الحينه هو تفكيرج انج مب أهل ان الناس تسمعج ولا تنجذب بآرآئج مجرد تفكيرج انج انتي مالج شخصيه وحقج مسلوب هذا أكبر غلط اختيه خلج قويه لاتحطين ابالج انج ضعيفه ومحد يسويلج سالفه…اذا تميتي جي تفكرين صدقيني بتتحطمين اكثر وأكثر خلج وااثقه من كل شي تسوينه…. وعن التفكير يالغالية شغلي عمرج بأشياااء تنفعج لم تحسين عمرج انج بديتي تفكرين اناااا معاج ان الواحد لابد انه يفكر بحياته بس بالاشيااااء اللي تنفعه يعني مثلاًكيف اطور من ذاتي كيف أقوي شخصيتي وأخلي عمري محبوبه عند الكل جي يكون التفكير الصح مب بالاشياااء الصغيره فديتج…..حاولي انج تتحكمين بتفكيرج انتي اللي تمشينه انتي اللي تحكمين عقلج بشو الحينه أفكر مب كل سالفه مريتي بها خلااااص بتمين طووول اليوم تفكرين بهالموضوع ترااا بعد كثرت التفكير تييب الأمراض ربي يعافينااااا…..وعن اربيعاتج والتعليقات وعدم مقدرتج انج تردين عليهم شوفي يالغالية حااولي انجادربين عمرج على كيفيه الرد بدون أي تجريح وبلباقه وبأتيكيت يعني يعني قالتلج شي اربيعتج بس ماعيبج ردي عليها بابتساااااااااامه لطيفه وقوليها كلاااام يسد….وبعدين لم اربيعاتج مايسمعون لج ولا حد يعطيج سالفه لأنج انتي اللي مخليه من عمرج جي واسمحيلي يالغالية هيه انتي … يمكن انتي تيلسين ع الزاويه وتخلين مجرى الحديث كله لهم ولم ترمسن محد يسمع رمستج يمكن صونج يكون مب مسموووع ومب عالي لدرجه ان حد يستمع لج….واذااا افترضنا انه كان عالي بس هم ماعبروووج يمكن لأنج بمجرد انهم ماعبروج تصخين وتسكتين ماتعيدين كلامج ولا حتى تكمليه حتى هم ينصتون لج اختيه حطي ابالج ان اربيعاتج مب أحسن عنج والكل بهالدنيااااا سوااااااسيه محد يتعالى على حدولا حد يتكبر على الثاني…بس انتي خلي تفكيرج يسير على انج مب أقل عنهم ومان شخصيتج مب ممسووحه وانج بتقوين منها……………. والسموحه يمكن طولت عليج بالرمسه….

بسم الله الرحمن الرحيم

عزيزتي جوفي ، وايد من البنيات الي يعانن من مشكلة فقدان الثقة بأنفسهن ، و الشخصية الضعيفة …

صدقيني ف هالدنيا كل انسان يبا يكون راعي شخصية قوية و راعي ثقة كبيرة بنفسه جدام الناس و جدام نفسه حتى ، و الثقة نحن ما نتعلمها عشان نوصل لها ، لا عزيزتي ، بالعكس ، الثقة شرات الحلم الي تتعبين طشونة عشان توصليله…

انتي ثقتج بنفسج كبيرة وايد ، و شخصيتج قوية ، و اترومين اتردين على اي حد يقولج كلام يجرحج او يظايجبج ، عمرج لا تقولين انا ضعيفة شخصية و ما عنديه ثقة باللي اسويه و بنفسي ..

ترا عزيزتي انا اباج اتحطين ف بالج شي مهم وايد ، (( اي شي سلبي اتفكرين فيه او تنطقينه بلسانج ، في مجموعة كبيرة من الايحاءات و الاشارات السلبية الي توصل للمخ على حسب التفكير الي اتفكرين فيه و الكلام الي اتقولينه ، ف كلامج و تفكيرج لو كان ف شي ايجابي ، الايحاءات الايجابية بتوصل لمخج و بتلاحظين انج تقبلين على هالشي بكل سهولة و حماس ، و لو كنتي اتفكرين ف شي سلبي ، الايحاءات توصل لمخج بشكل اسرع و اكبر ، و بتبدين اتحسين بهالشي السلبي الي فكتي فيه او قلتيه ، ف عشان جذه غناتيه دوم قولي انا شخصيتي قوية و ثقتي بنفسي كبيرة و انا اقوى من الي يطنزون عليه ))

اثبتيلهم هالشي من خلال تصرفاتج ، اذا في اي نقاش او حوار ، عطيهم رايج و ووظحيلهم وجهة نظرج من هالشي و قوليلهم كلام مقنع و اي حد يسكتج ردي عليه بأنه انتي لج الحق كله انج تتكلمين شرات ما هم يتكلمون و يتناقشون و يتبادلون الآراء فيما بينهم…

بس عززي ثقتج بنفسج شوي شوي ، يعني كل شي يكون خطوة بخطوة ، لا اتخططين للكلام الي بتقولينه ف هالموقف ، لا بالعكس ، خلي الموقف و خلي الكلام يظهر منج بشكل بديهي بدون تخطيط مسبق له…و بتلاحظين انج بديتي تثبتين نفسج ، بس هالشي محتاي صبر منج طشونة…

خليني اقولج ، انا عنديه بنت خالتيه ، معرسة ما شا الله عليها ولا شي قاصرنها ، لكن شخصيتها ظعيفة ، و ريلها يحبها وايد لكنه على اي شي بسيط يقول لها انتي شخصيتج ظعيفة و ما تعرفين تتصرفين و من هالكلام الي يجرح و يحبط و يثبط المعنويات…

كلمتني بخصوص هالموضوع ، كانت تسالني وايد و تتكلم وايد و فيها ظيجة من هالشي ، قلت لها الحل بسيط وايد و انتي ما يحتاي اتكبرين السالفة…

قلت لها يلسي ع الكمبيوتر ، افتحي الوورد ، و عطيتها كم جملة تكتبهن ، و خلاف تطبعهن ، و اتعلقهن ع الكبت او ع الشبرية او ف اي مكان بحيث انه عينها اطيح دوم ع هالمكان عشان اجوف الي علقته و بالاخص تقرا العباراات..

خليتها تقريبا شهر كامل او شهر و نص بليا ما اتصل بها و اجوف حالها شو من بعد هالفكرة الي عطيتها اياها…

ف ذمتيه انها قامت روحها و سوتلي تيلفون و تمت تشكرني وااااايد على اني زرعت الثقة ف نفسها بمجرد فكرة الاوراق…

و الاوراق طبعن مكتوب عليهن مجموعة من العبارات شرات : (( اانا شخصية ناجحة في المجتمع )) ، (( انا صاحبة شخصية قوية )) ، (( انا ثقتي بنفسي كبيرة )) ، (( انا اقوى من كل المواقف الي امر بها )) ، (( انا اقدر اتحدى الي يتحداني )) ، (( الابتسامة باب مطلق للسعادة الزوجية )) >>>> قلت لها تكتب هالعبارة لأنها متزوجة..

حاولي اتسوين هالشي ، و علقي الاوراق ف مكان بحيث انج دوم اتشوفينهن ، يعني اول ما اتنشين من الرقاد تطالعينهن بحيث تتجدد نية تغيير شخصيتج…

و باذن الله بيتغير كل شي ، طبقي الي قلتلج عنه ، و خبريني بالنتيجة و باذن الله بيتحقق الي ف بالج….^^

سعادتج تكمن في شخصيتج و اثباتها جدام الكل من خلال كل الي اتسوينه و اتقولينه…

بارك الله فيج عزيزتي ، الله يحفظج من كل شر….

اختج :

/

د.حصــــــة الظـــــاهــــري

الله يعينج

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.