عروسة مثل القمر
سبحان ربي اللي أمر
وعطاني هدية العمر
وبقدومها هل البشر
الله يحفظها لنا طول الدهر
ببدأ أسرد عليكم قصة ولادتي،،، اللي كانت بتاريخ 30/3/2017
من دخلت التاسع انتظمت بمواعيدي بمستشفى دبي، وكان موعد ولادتي 27/3 وطبعا طوفت الموعد بس مخبريني إذا طوفت بيعطوني مهلة اسبوع،،،، بس تأتي الرياح بما لا تشتهي السفن ،،، قبل نهاية التاسع بأيام يتني حساسية فظيييييييعه بكامل جسمي سرت طوارئ دبي عطوني أدوية وقالت الدكتورة عادي يستوي بالحمل جيه، بس الأدوية ما فادتني، وعقب زادت واإاإاإايد، وطوفت يومين على تاريخ ولادتي فسرت موعد مراجعتي عادي بس حصلوا ضغطي مرتفع والحساسية زادت فالدكتورة قالت لازم أترقد واليوم الثاني بتسويلي طللللللق خفت بس قالت مافي حل ثاني،، فترقدت وعلى فكرة طول التاسع ما كان فيني ويع مووؤول، حتى يوم ترقدت بالمستشفي. واليوم الثاني الساعة 8:30 دخلوني قسم ما قبل الولادة، وسوولي تخطيط وعقب عالساعه 9:30 سوولي الطلق وبدأت الالام بس بشكل بسيط كل 10~20 دقيقة، وفتح عندي 2.5سم لين العصر شيكت الدكتورة قالت بعده نفس الشئ بس الألم يزيد فقالت خلاص ماراح نزيد الطلق بس عملت تحفيز للاغشية فزاد الألم لين المغرب، وأنا كله أمشي وأرقد ويسوولي تخطيط لين الحين أموري كانت تمام أسولف واضحك مع ريلي وامي، بس عقب اااههه….، يابتلي الممرضة كورة كبيرة نفس مال الجيم وقالتلي اتنططي عليها تميت اتنطط واضحك،،، عقبها على طول عالساعه 7:30 انسدحت وماحس إلا بالعواإاإار الشديد ويزيد، عطوني الاكسجين المخدر،،، حلوووو ،،، وشيكو حصلوه 5سم فقامت الممرضة وفجرت كيس المائ وعطتني إبرة مخدر ومغذي لأني مب ماكله شي،،، وتميت أتويع والألم يزيد كل شوي بس الحمدلله ما اصارخ مووؤول، لين الساعه 10:45 شيكو قالو فاتح فل (ما أعرف كم كان)،،،
وخلاص ودوني غرفة الولادة ،،، بس هناك بدت المشاكل ،،، رأس البيبي كان متعلق لفوق شوي مب راضي ينزل لتحت ( للفتحة) ، والحبل السري ملتف على رقبتها فديتها،،،، كانن عندي دكتورتين وممرضتين وما عرفن شو يسون، فزجرن الاستشارية، وقالت ييبو الشفاط،،،أنا خفت، بس عقب هيه لفت الحبل عن البيبي بأيدها وتسهلت الأمور وكل شوي يقولولي بوش بوش وأنا أحاول بس ما أعرف وتقولي الدكتورة أنتي ما تساعدينا عشان نساعدج،،والبيبي نبضة تعبان،،، وأنا طووول الوقت صابرة وساكتة اخر شيء انفجرت فيها وقلتلها أنا أحاول ما تشوفيني أنا بمووووت بموووووت (كل هلي اللي برع سمعوني) هههه… بعدين شرحت لي الممرضة اني لازم أخذ نفس واكتمه واسوي بوش!!! بعد شو!!!سويت جيه وطلعت ميثوه… عالساعه 11:30 المساء، بس ما حطوها فحضني ودوها غرفة الانعاش لأنها ما صاحت،،، وسمعت أمي تصيح برع وتتكلم عن بنتي … أنا هنيه تخبلت يلست اضارخ عليهم بنتي شو فيها ليش ما صاحت ليش ما يبتولئ اياها قالولي بنطفها وبنيبها ،،، عقب شوي سمعت تبريكات أهلي وضحكاتهم برع عرفت ان ميثاني بخير،، وبدو فالخياطة اللي هيه بروحها ولادة ثانية، تميت ساعه ونص يخيطون فيني !!! ومليون ألف مخدر عطوني،،، طبعا خياطتي هاي بروحها سألفه ما ابغي أزيغ الكروشات (سوولي خرايط)،،، وعالساعه. 1:30 خلصو خياطة ودخل ريلي ويابولي برنسيستي {ميثاني} فديتها ،،،، والله نسيت كل معاناتي يوم شفتها حسيت اني ملكت الدنيا،،، وتمينا نتصور شوي أنا وابوها (لأنهم خلوني تحت الملاحظة لمدة ساعه) ودخلو أهلي يباركولي،،، وعقب راحو، فقالت لي الممرضة ياللا بنطلع فوق يابتلي كرسي نقال وأول ما يلست عالشبرية حسيت بدوار وطحت غشيانه فحأولو يوعوني قمت ويلسوني شربوني عصير وكنت بطيح مرة ثانية بس رقدوني ويابولي سرير نقال وحطو ميثاني بحضني وطلعنا عالدور العاشر،،، وطول الليل رقدتها بحضني ،،،،
أنا اعتبر ولادتي الحمدلله نوعا ما متيسرة …. وفيه اشياء سهلت ولادتي،،، منها:
# التوكل على الله وعدم الخوف والتفكير انج داخلة حرب ترا هالشي طبيعي والكل يمر فيه
# قراءة القران والادعية
# الهدوء والاسترخاء والتنفس العميق
# تمر العجوة وماي زمزم والعسل،،
# ربي يسر لي دكتورة ما استعيلت عليه تمت على راحتها ويايه وأيدها خفيفه، ويوم خلص شفتها بعد يتني دكتوره زينه، من غير دكتورة الولادة (مواطنه عسل)
# 3 ممرضات لو اشكر فيهن ماراح أوفيلهن كل وحده بدورها وشفتها ما قصرن
# كنت بروحي فالغرفة طول اليوم و وقت الولادة كنت الوحيدة اللي تربي ؛-) فالكل مهتم فيني
الله يبارك لي فيها ويحميها من كل شر ،،، اللهم أمين
ويرزق كل محروم بالذرية الصالحة ،،،، اللهم أمين
ويسهل على كل حامل وتولد بالسلامه ،،،، اللهم أمين
مبرووووووك عساها تتربي في عز والديها
الله يبارك لج فيها ويحميها من كل شر ،،، اللهم أمين
ويرزق كل محروم بالذرية الصالحة ،،،، اللهم أمين
ويسهل على كل حامل وتولد بالسلامه ،،،، اللهم أمين
وتتربى بعزج
اله يحفظها
