صالونة الدياي بالروب .

هو فيه طرقتين اذا تبون الصالونه ناشفه والا فيها مرق ؟ انا بكتب لك الهنتين تمام ؟

يالله بسم الله تراني يايبتلكم الطريقه والاغراض

طبعا بعد ماتغسلين الدياي وتقطعينه بطريقتج ,,

الطريقه الاولي :
تفركين الديايه بثوم وزنجبيل وفلفل مطحونين + حبه طماط + قبضه من البقدونس والكزبره+ حبتين بصل متوسط +2 روب مخفف بنصف كاس ماء + بهارات وملح ولاتنسون الكركم وبس تحمين الزيت وتقلين بهارات حب كم حبه من كل نوع مب وايد "هال + سنوت+ جرفه + فلفل اسود + مثيبه+ مسمار "على نار هاديه لين تطلع الريحه وبعدين تضيفين الدياي لين ينضج واذا تبون ممكن تحطون مكعبات بطاط ,, يكون لون الصالونه مايل للاصفر وغليظه

الطريقه الثانيه :
طريقه الصالونه العاديه والاحلي الدياي فيها يكون مقلاي قبل ,, قبل عن تبندين بعشر دقايق تضيفين الروب بس لازم تكونين خافقتنه لو بمعلقه علشان مايعقد عندج في الصالونه ومايكون بارد من الثلاجه تطلعينه قبل بوقت ,, يكون لونها تقريبا برتقالي

الطريقه الثالثه :
هاي علي البيعه هههههه ,, لكن هذه مب بالروب هاي بجوز الهند ولذييييييييذه وايد وبعد نفس طريقه الصالونه العاديه لكن تضيفين لها جوز الهند البودره وبكميه نوعا ما كبيره فيستوي لونها فاتح وهاي طريقه هنديه وحلاتها تكون حاره يعني تكثرين فيها الفلفل الاخضر وورق البرياني

لاتنسون تزينون الويه بالكزبره والبقدونس

وبس يالله قولوا ماشاء الله عليه