طريقتي في البيتزا —> مع الصــور

اليوم بحط لكم طريقتي الخاصة في البيتزا ..

البيتزا اللي أسويها فيها بعض الأشياء المختلفة عن البيتزا العادية .. فانا مثلا أضيف لها صلصة .. خلونا نقول مب صلصة .. لا خلطة بسيطة تعطي البيتزا نكهة مميزة حلوة..

خلونا نشوف مع بعض المقادير والطريقة

مقادير العجينة:
3 أكواب طحين – 4 ملاعق طعام حليب بودرة – رشة ملح – 2/1 1 ملعقة طعام خميرة – 4/1 كوب شاي زيت – 3 ملاعق طعام سكر – ماء دافئ للعجن

مقادير الصلصة:
نص بصلة متوسطة (لأنه مقدار الصلصة شوية ما بنحتاج بصل وايد)– نص فلفل رومي – حبة طماطم متوسطة – بهارات (أنا استخدم: ملح – ربع م.ص فلفل اسود – رشة صغييييييرة فلفل احمر – نص م.ص بزار "ما استخدم كركم أبدا")

مقادير الحشوة:
نص دجاجة مسلوقة ومقطعة مكعبات صغيرة – نص بصلة صغيرة – بهارات (ملح – ربع م.ص فلفل اسود – رشة صغييييييرة فلفل احمر – نص م.ص بزار "ما استخدم كركم أبدا")

للوجه:
كاتشب – فلفل رومي مقطع مكعبات – حبة طماطم مقطعة قطع صغيرة على شكل مثلثات – زيتون اسود مقطع حلقات – شرائح مشروم (فطر) – جبنه موزا ريلا مبشورة

هاذي صورة للمقادير.. طبعا أنا مجهزة الصلصة وحشوة الدياي قبل

الطريقة:

طريقة العجينة:
تخلط جميع المقادير وتعجن العجينة كالمعتاد .. ونخليها تتخمر لمدة ساعة على الأقل

طريقة الصلصة:
– تقلى البصلة في قليل من الزيت حتى تصفر قليلا
– يضاف الفلفل الرومي ويترك حتى يذبل مع التقليل باستمرار
– يضاف الطماطم ويقلب قليلا ثم تضاف البهارات
– تقلب المقادير لمدة دقيقة أو حتى يبدأ الماء في الجفاف ويبقى قليلا منه فقط.. ثم يبعد عن النار
– ملاحظة مهمة: مقدار الطماطم لازم ما يكون أكثر من الفلفل الرومي ولا بتكون الصلصة سايلة وايد وما بينشف منها الماي.. خلوا المقدارين متساوين.

طريقة الحشوة:
– تقلى البصلة في قليل من الزيت حتى تذبل وتصفر قليلا
– يضاف الدجاج المسلوق ويقلب باستمرار حتى لا يلتصق المقدار بقاع المقلاة (يضاف قليل من الماء عند ملاحظة التصاق الدجاج بالمقلاة) ثم تضاف البهارات ويقلب قليلا ثم يبعد عن النار

بعد ما جهزنا كل المقادير .. الحين لازم نييب العجينة ونبدأ الشغل

أول شي نسويه نفرد العجينة حتى سمك نص سم تقريبا ونقطعها دوائر أو على حسب الرغبة ممكن ما نقطعها:

نصفها في صينية مدهونة بالزيت وندهن وجه الدوائر بالكاتشب:

نحط قليل من الصلصة على كل دائرة من الدوائر:

الحين نحط قليل من الدياي ثم الفلفل الرومي:

بعدها نضيف الطماطم والمشروم وحلقات الزيتون الأسود:

آخر شي نحط الجبن المبشور:

وأخيرا ندخلها الفرن لمدة نص ساعة تقريبا أو حتى تحمر من تحت بعدين نشغل عليها من فوق لحد ما تطلع بعض النقط الصفرا على الجبن ونطلعها من الفرن (انا ما أحب أحمر الجبنة وايد لانها يوم تبرد يسمر لونها)

وهاذي صورتها بعد ما نطلعها من الفرن:

أتمنى ما كون طولت عليكم

وأتمنى تكون عجبتكم البيتزا ..

واهم شي تجربونها .. وصدقوني بتعيبكم

انتوا ممكن تشوفونها صعبة وتحتاج شغل .. بس هي سهلة ما تأخذ أكثر من نص ساعة أو اقل حتى.. بس لأني كتبتلكم بالتفصيل الممل تشوفونها صعبة ^__^

وسمحولي إذا الصور مب واضحة وايد .. لاني صورتها بالتلفون ..

أختكم
سامرية الليل