موضوع مهم لكل حامل بالتفصيل الممل ــــــــــــ تجهيزات الاربعين

حابة اكتب لكم هذا الموضوع و احصل لي اجر ان شاء الله
لاني بصراحة يوم ربيت اول مرة كرهت عمري و حسيت صدق متوهقة ما اعرف شي

فترة الحمل

1- الالتزام التام بالادوية الموصوفة مثل الكالسيوم و الفولك اسد و الحديد و الفيتامينات ………….الخ

2- في بعض الحالات الدكتورة بتقول لج البي بي عندج ضعيف او وزنه مب ف المعدل الطبيعي هذا ما يعني انج تاكلين مثل البطريق لازم تاكلين اكل صحي و متوازن
لانج لو كلتي مثل البطريق بتستوين غوريلا اما عن البيبي اللي ف بطنج ما بيزيد وزنه ابدا نتيجة كثرة الأكل !!!
لا تنسين باجر مع الرضاعه بيزيد وزن البيبي و عقب بتعطينه صناعي بيستوي اوكي لا تحاتين ابدا

3- في الشهر السابع ابدي تجهزين اغراضج و اغراض البيبي ولا تتاخرين ( ع فكرة انا ربيت ببداية الثامن و ما كنت مجهزة شي ههههههههه )

4- في الاشهر الاخيرة ابدي مارسي رياضة السباحة بس شاوري الدكتورة ( رياضة السباحة يمارسونها الممثلات الاجنبيات و تخلي جسمهم رووعه عن تجربة)

5- في الشهر الثامن خلج حركية و لا تكونين كسولة ومن تدخلين التاسع امشي بشكل يومي

فترة الولادة

1- جهزي توزيعات باسم المولود

2- جهزي مسج او بي سي حلووو عن الفرحة بقدوم البيبي

3- بعض البنات يجهزون غرفة المستشفى و البعض منهم يسووون حفلة في بيت اهلها و تزيين في البيت يعني ركزي ع مكان واحد ولا تخسرين

4- جهزي لبس حلوو و مميز مع مكياج نعومي جداااااااااا لا تكثرين

5- هالله هالله بالمشروبات الساخنة مثل حبة الحمراء الحارة و خبيص …………الخ

6- خواتي ركزوا ع ها الجملة " بعد الولادة مباشرة و بعد ما تجوفين نونوتج
لازم تشربين حبة حمراء حااارة تنزل لج كل اللي ف رحمج من وصاخة " عن تجربة

7- عطي ريلج تلميحات مباشرة انج تترين هدية حلوة و لازم تكون مغلفة لان كل حد بيزورج بيسأل شو ياب لج ريلج

فترة الأربعين

1- يوميا لازم تحطين حصا حارة ع بطنج بس لفيها بفوطه عسب ما تحترقين ( انترلوك ) و طبعا بطنج بينزل شرات قبل
++ تشربين اشياء دافية

2- يوميا تحطين مطارة ماي حارة بنفس الطريقة

3- استخدمي اي مشد او حتى شيلة عادية و لفيها ع بطنج ( عن نفسي بعد اسبوع ربطت بطني )

4- عن تجربتي الخاصة ما استخدمت ولا شي خلال فترة الاربعين ،،، و شاورت الدكتورة قالت لا تستخدمين ماي و ملح ابدا خاصة ف اول فترة الاربعين

5- استخدمت ماي و ملح ف بانيو بعد 3 اسابيع من الولادة

6- بعد ما راحت الخيوط بديت اسوي تمارين كيجل بشكل يومي ( و بصراحة ها التمارين تغنيج عن عملية تجميل او اعشاب او اي خرابيط ) و تردين بنوتة

7- بعد ما كملت 40 يوم ،، كان عندي الم و طلع عندي التهاب و توجهت لللدكتورة مباشرة و التزمت بالادوية و صرت اوكي ( لازم تسوين فحص بعد الاربعين تجيكين ع الرحم و ع تحليل البول لو كان فيه التهاب )

8- بعد شهرين من الولادة الطبيعية لازم تشتركين في جم فقط و تسوين رياضة بشكل يومي ( بس لا تنسين ممكن تسوين رياضة البطن قبل هاي الفترة لو ما تأثر ع الخياطة )

9- و تسوين رجيم عملي ما يأثر ع الرضاعه :
تستبدلين الخبز و التوست الابيض بالخبز و التوست الاسمر
تستخدمين جبن لايت
حليب قليل الدسم

الريوق: كرونفلكس + حليب قليل الدسم + عصير برتقال فرشششش
الغداء: خبز اسمر مع صالونه دياي او لحم او اي شي بس تستبدلين العيش بخبز اسمر
أو تخففين من كمية العيش بدل الخبز الاسمر
العشاء: توست اسمر مع جبن لايت و بيض و طماط + عصير موز فرش

ممكن بين ها الوجبات تشربين شوربة او تاكلين فواكه
و كثري شرب السوائل لانه يزيد الحليب و هذا كلام دكتورتي

10- نصيحة و خاصة للي تشتغل
ابدي اشفطي من عقب الولادة لان بعد الولادة يزيد الحليب بشكل كبير
فخلي معاج اكياس او علب خاصة بالشفط و حطيها ف الفريزر مع كتابة التاريخ و الساعه عليها و ارجعي استخدميها ف اي وقت

11- احسن شفاطة عن تجربتي ميديلا الاصفر شريته ب 410 دراهم ما يعور ابدا

12- لازم تقررين متى بتدين تعطين النونو حليب صناعي ؟
وتسوين سيرج عن افضل حليب !
وتاخذين كمية بسيطة و تجربينها و تجوفين لو بيتقبل الحليب او لا
مو شرط تعطينه حليب صناعي مباشرة لا لا
بس تجربين عليه يمكن يكون عندج ظرف ف المستقبل عسب ما تتوهقين
خواتي بعض الاحيان تصير ظروف خارجة عن ادارة الام : مثل السفر المفاجىء او اي ظرف

12- بالنسبة لكثرة بكاء النونو: ضروري تبتعدين عن اي شي ممكن يسبب غازات للنونو مثل الملفوف و الخس ………الخ
لازم تسوين له رياضة اول ما ينش من رقاده
لا تنسين تعطينه الدواء الخاص بالغازات

13- في فترة الاربعين افضل تكونين مجهزة غرفة خاصة لج او حتى في الميلس
في بيت اهلج و تخلين ريلج يبات وياج
ما افضل يبات بالشهور بروحه
( الريال بيحن عليج اكثر مهما كان وغد وياج )

همسة ،،، اللي عندها استفسار او سؤال ممكن تسأل و تثري الموضوع