الوسم: Velvet

اليوم يايبتلكم طرريقة الRed Velvet Cake وانا من زمان احاول اسويها بس كل مره احس في شي في المقادير ما عرفه .. وحاولت ادخل مواقع اجنبيه بس ماشي فايده

اليوم يايبتلكم طريقة الكيكه وضبطت عندي .. وللامانه منقوله من منتدى وصاحبة الموضوع اسمها "أم ثاني" يزاها الله الف خير

وانا شوي عدلت في الطريقة بس طعمها خبااااااال .. لذيذه

المقادير:
2 ونص كوب طحين
1 م.ص بيكن باودر
1 م.ص ملح
1 م.ص فانيلا
نص كوب زبدة لينه او مذوبه
زجاجة وحده من الصبغ الاحمر وهاي صورته

1 كوب ونص سكر مطحون
2 بيضتين
1 كوب لبن ثاخر ( انا حطيت حليب المراعي )
2ملعقة كبيره كاكاو بودرة ( انا استخدم ها الماركه )

1 م.ص خل ابيض
1 م.ص بيكربونات الصودا

الكريمة:
علبة فيلادلفيا 300 جرام اللي في الصورة 200 بس الطريقة حق 300 جرام

3 ارباع كوب كريمة الخفق

1 كوب سكر ناعم مطحون
رشه ملح
1 م.ص فانيلا
شوي جوز الهند مبشور

للامانة : صور المقادير من النت يايبتنهم

الطريقة

– نسخن الفرن على حرارة 180م ونجهز القالب ( نمسحه بزيت او زبده ونرش طحين ) عشان ما تلصق الكيكه
– ننخل الطحين +البيكن باودر +الملح + وبودرة الكاكاو
– نضرب الزبدة + السكر حتى نحصل على خليط ناعم
– نضيف البيض واحدة تلو الاخرى مع الفانليا ونخفق
– نضيف ملون الطعام الاحمر + الحليب+ الطحين بالتبادل ونخفق لدقيقة
– في وعاء صغير نضع البيكربونات والخل ونحرك ثم نضيفهم الى الخليط ونخفق على سرعة متوسطة
– نصب العجين في القالب
– تدخل الفرن لمدة 30 – 45 دقيقة وتترك لتبرد تماما

طريقة عمل الفرن :: للي ما يعرفون
أول ما ادخلون الكيكه خلوه من تحت بس .. لين تنتفخ الكيكه .. تقريبا بعد مرور 15 – 20 دقيقة
بعدين شغلوا فوق وتحت عشان تبدا تنضا من داخل ..
واخر 5 او 10 دقايق من فوق بس .. وحاولوا ادخلون عصا خشبيه عشان تتاكدون انها نضت كامل من داخل ..

ملاحظه يمنع فتح الفرن في اول 20 دقيقة عشان ما تهبط الكيكه

– لعمل الكريمه:-
– نخفق الجبنه حتى تصير ناعمه نضيف باقي المقادير و نخفق حتى تصبح ناعمه و هشه
– نزين الكيك بعد ان تبرد تماما واخر شي ننثر جوز الهند

بعض صور من تطبيقي المتواضع ..