السلام عليكم ورحمة الله وبركاته
عندي لج أفكار بتخلي ريلج فرحااااان وبتشوفين فرحة الطفل فعينه ^^
وأنتي بتكونين فقمة الوناسة , حصلت هالأفكار وان شاءالله بتنصدمون من نتايجها واللي سوت أتمنى
ترد للموضوع وتخبرنا عن الموقف اللي صار مع زوجها يعني كيف فرح وكيف هي أستانست وشو
كانت ردة فعلة بعد ماستوعب , أنا بجربها وبخبركم بعد ^^
اول شي ياجوليت لازم تعرفين شنو يحب روميو صح ؟؟ وشنو ناقصه ؟؟ وأشتريه له
تشترين ورده وحده طبعاً مغلفه ..ومربوطه بشريطه …ويكون لونها احمر ….وبعدين اشتري بطاقه ويكون معها ظرف اوكي … خرمي الشريطه واربطي بداخلها الظرف …
شنو تكتبين في الظرف … اكتبي اسمه عليه
وداخل الظرف ضيفي لها بطاقه صغيرونه فيها كلمات معايده ..
"أنت ورودي وشذاها وبسمة شفاتى وأنت ربيع الربيع يا ورد ورداتى"
" كل عام وانت حبيبي
كلمات الحب لو نطقت….
ابيات الشعر لو غنت..
لو جفت الاحبار……وعلا صوت الاوتار..وفصحت الاشجار…
لتجد تعبيرا يبوح بتلك المشاعر التي يصوغها لك قلبي خلال……..اعوام مضت… لما وجدت….
فحبي لك اسمى من كتابته على ورق..
حبيبي…
كل عام وانت حبيبي..
كل عام وانت سعادتي…
كل عام وانت عالمي الملئ بالامل…
احبببك..ساظل ارددها دائما مهما طالت الايام ..ومهما طال عمرنا معا… لك حبي وحناني
كل عام وانت بخير ياجنتي "
"حبــــــي الأبــــــدي
لو ان الانسان يهدى قيمته لأهديتك الدنيا ومافيها ولكن عذرا ايها الغالي
فهديتي متواضعه ولكنها تحمل اسمى معاني الحب واجمل التهاني والتبريكات بمناسبة……….
فقبلها مني تذكارا يبقى مابقي من الزمان
العاشقـــــــــــــــــــــــــــــــه"
أشتري عطور عربيه ..مخلط أو دخون معجون الشيوخ اللي تخببببل ريحته وتحطينها بعلبه على شكل قلب وتعبينها بأشياء يبيعونها للهدايا بكل مكان … ويكون البوكس لونه احمر
وتقدرين تشترين له بلاي ستيشن 3 اليديدة طبعاً كل الأزواج يحبون يلعبون فيها مهما كبر سنهم , لاني لاحظت هالشي
واذا عنده هاللعبة أشتريله سي دي أسمه call of duty 5 هذي اللعبة مب بيطير فرح فيها
الا بيلصق فيها واذا عنده هالسي دي تقدرين تشترين له بطاقات playsation network card
هذي بطاقة فيها فلوس ويقدر يشتري فيها العاب اونلاين عن طريق البلاي ستيشن بتنفعه وايد
وبجذي أنتي تعطينه مجال أنه هو يختار شو من الالعاب اللي يحبها ويبغي يشتريها بدال مايشتري من السوق وأسعارهم أغلى من الألعاب الموجودة اونلاين
هالبطاقات متوفرة عندي اذا في وحده حابة تشتري في بطاقة تحتوي على عشرين دولار درهم وفي بطاقة تحتوي على خمسين دولار ,
وتقدرين تشترين له علبة فيها شامبو وشاور جل ورش للجسم براوائح معينة مع عطر بنفس الريحة ,
وتقدرين تشترين له تلفون أو بزم أو جاكيت حلو للشتا أو عقال وغتر بس خلي اخوج يشتري لان هو ادرى فالجودة او فصلية كندورة من نفس قياس كندورته اللي يلبسها دوم فصلي له 3 حق الشتا و2 عاديات وخلي اخوج يختار الخام وتقدرين تشترين له شنطة حلاقة وطبعاً أخوج أدرى فالنوع اللي يحتاجة الريال
,وتقدرين تفصلين له نظارة شمسة طبية اذا هو يلبس نظارة طبية أو نظارة شمسية حلوة اذا هو نظره سليم ,
لو ماتعرفين تختارين روحي معاه محل النظارات سوي خطه .. قولي بتشترين لأخوك أو الوالد نظاره اوكي وتبينه يختارها له لأن ذوقك حلو لعبي عليه هههههه وشوفي شنو تعجبه إختياره اهو وخليه يجرب النظارات بنفسه اللي تعجبه وحاولي قد ماتقدرين انج ماتتفوهين باي كلمة تشككه بالسالفة …. اوكي ..بعدين غلفيها وليله العيد قدميها له
واذا يلبس سوع خذيله سوع ماركات تقليدية رقم واحد اذا ميزانيتج ضعيفة
وروحي محل الساعات اللي بنفس الماركة وشوفي اذا تقريباً نفس الشي , وتقدرين تاخذين له مسباح حلو يعلقة بسيارته بعد
واذا يلبس بناطلين وقمصان , خذيله طقم رجالي حلو وستايلش وأسألي البايع شو الموضه اليديده
وتخيلي اللبس على ريلج وأهم شي تعرفين اذا يحب ليبس بأكمام طويله وله قطيرة وله بدون أكمام
أخر فكره …. دخلي صورتج بسكنر " ماسح ضوئي " بالكمبيوتر وصممي له بطاقه فيها صورتج تطلع احلى بطاقه بالدنيا … وكتبي فيها كلمات ودلعيه … وارفقي معاها الهديه …حلوه هالفكره عجبتني وايد
وآخر شي تشترين بلونات حمرا وداخلها غاز الهيليوم اذا صح تعبيري عشان أطير وأربطي قاعده حبل البلونه بشي صغير وثجيل ووزعيهم على أرجاء الغرفة وأنثري الورود على السرير وهو نايم وعلى الأرض وحطية وردة جدام ويهه بس مسافة بسيطة منه عشان من يفتح عينه يشوفها
وهذي فكره وحده لقيتها بمنتدى يمكن تعجبج افكارها …
بالعيد
فصلت له كم دشداشة ألوان يعني بني , رماي..
و شريت له غترة لكل دشداشة..
و كم بدلة رياضة>> يموت فيهم
و فصلت له جلابيات للبيت
و خذت صندوق راقي به كوبين للقهوة بنفس نقشة الصندوق >> كان وده يشتري واحد عادي للمكتب بس ما كنت أخليه
خذت من الصندوق كوب واحد و حطيت مكانه شوكولاته
و خذت له بعد نعال مندوس
و علبة عطر dunhill
و قرآن صغير غيرت تغليفته بنفسي بالدانتيلات و الخرزات بشكل حلو
و حطيت القرآن بصندوق كريستال
و حطيت عليه ورد مجفف و بطاقة صغيرة كتبت فيها " لم أجد خيرا من كتاب الله ليحفظك"
و صنعت له بطاقة من نفس تغليفة القرآن.. و كتبت فيها عبارة العيد
وحطيت كل الأغراض بصندوق حجمه يناسب و رشيت الأغراض بعطر يحبه ما عدا أحلا دشداشة و غترة .. و النعال
و حطيت الصندوق بكبت ملابسه من تحت و علقت الدشداشة و الغترة ( بعد ما عطرتها و دخنتها)عند دشداشة العيد اللي فصلها هو.
و حطيت النعال عند الباب و بداخله وردة
و نش بو الشباب الصبح و عيونه متورمة و تفاجأ بلون دشداشة غريب بكبته و فرك عيونه يتأكد.. و يسألني عن اللون>> المسكين مو عارف شالسالفة.. عاد أنا طنشت و قلت له ما أدري ……
(ما راح أطول عليج )
و بعد شوي يطلع ويشوف الحلويات و الورود بالصالة و يندهش أكثر .. و شوي يطلع يبي يلبس نعاله و يشوف النعال تغير !!!
و عيبته الحركة واايد و استانس عليها..
و كان أحلى عيد
واللي عندها أفكار ثانية تحطه هني فالموضوع =) وخلوني أشوف رايكم ومشاركاتكم والمواقف اللي صارت بعد تنفيذ هالحركات