بسم الله الرحمن الرحيم
مرحبا خواتي شحالــكن ..؟؟
ما بطول عليكن بدخل ف الموضوع على طول وياليت كل وحده تحدر ترد عليه ولو بدعوه الله لا يهينكن
قصتي بدت من قبل 5 سنوات ,,, انا بنت عمري 24 سنه خريجة جامعه ممتلجه وعرسي جريب
تعرفت على ريلي قبل كم سنه ف مكان الدراسه والصراحه انا قبل لا نملج كنت ارمسه بالتيلفون
بس ما كان بينا شي غير الاحترام والود وكنت احبه وهو يحبني بيني وبينكم انا من دوله وهو من دوله ثانيه
طبعا طريقة التواصل بينا كانت غالبا عالمسن تمينا نرمس بعض اكثر من 4 سنوات لين ما صارت
الصدفه واشتركنا انا وياه في مشروع واللي هو يخص المكان اللي اشتغل فيه حاليا
الحمدلله الله عطاني نعمة الجمال ومن عايله معروفه باخلاقها وطيبتها اولا وثانيا اهلي مكانتهم حساسه شوي
وانا ما اقولكم عشان اتخقق لا والله بس عشان تفهموني اكثر وان هالشي كان سبب من الاسباب لمشكلتي
ريلي صارت له مشكله وقضيه وانسجن اكثر عن 8 شهور وطلعوه من دوامه وتم في البيت لا راتب
ولا شي وفوق هذا صارتله ديون ما يقارب ال 4 ملايين درهم وهو عمره 25 سنه بس ,,,
هالكلام صار قبل لا يتقدملي ,,,
تقدملي وبحكم ان المسافه كبيره بين منطقتنا ومنطقتهم صارت الامور صعبه ومادري ليش هالشي
صار بس سبحان الله سالوا عنه والكل يمدحه ولا احد ياب طاري السجن ولا غيره جدام اهلي
وانا طبعا ما صارحتهم لاني كنت اباه ما تهمني مشكلته ولا دوامه وغيره ..
تموا سنه كامله لين ما وافقوا عليه ماجذب عليكم امايه كانت الوحيده اللي رافضه كانت تقولي دووم
حبيبتي انا حاسه ان هالريال ما يناسبج وان فيه شي وكانت تصيح جدامي وانا اقولها لا دام انهم
سالوا عنه وعرفوا انه ريال زين معناته خلاص ها مجرد خوف وبس !!!!!!!!!!!
سوينا خطوبه والملجه صارلنا الحينه اكثر عن 8 شهور وعرسنا عقب شهر
بالرغم من حالته الصعبه قالي اباج تظهرين من الدوام وتيلسين في البيت وسمعت كلامه قلت ريلي
ماروم اعصيه حاولت اقنعه بس ماشي فايده وطلعت ويلست في البيت ,,,
عموما من قبل لا نملج ونحن علاقتنا في دمار ما نتفاهم انا وياه موول وكله نزعل ونضارب على اتفه شي
كانت تصير اشياء انا ماعرف منو الغلطان ومنو الصح ما قدرنا نفهم بعض وملجنا ونفس الحاله
تعرفون انا صدق احبه وكل ما يسويلي شي اقول والله كله يهون بس كان في شي يصير ما كنت اعرفه شو
زادت مشكلته واضظر انه يطلع من بلاده بسبب قضيته وانا طبعا ما خليته يروح مكان وخبرت اهلي
بكل شي ما اخبي عليكم الوحيده اللي ما قدرت اواجهها هي امايه ولين الحينه ما انسى اليوم اللي ياتني
وقالتلي انا قلبي مب مرتاح لهالريال … المهم هو يا بيتنا وعطيناه قسم خاص من البيت له وحطيناه بعيونا
فلس واحد ما ناخذ من عنده وكل شي يباه يلقاه موجود امايه خلته شرات ولدها وابويه نفس الشي
صارله كم شهر وتعود عالمكان بس المشكله كانت بيني وبينه
كنت اشوفه بعيني ملاك وبريء ما يحب حد غيري ومستحيل يخوني انا بحياته كل شي
بس للاسف كل ها كان مجرد اوهام وانا كنت اقص على عمري بهالكلام …
اكثر من مره ازخ عليه شي بنات من كل مكان وعلاقات حب وغرام وجات ومسن وايميلات وتيلفونات
خليت كل شي بقلبي لين يا اليوم اللي حسيت اني خلاص مب قادره اتحمل اكثر منه
طلعنا مكان وبالغلط التفت ع واحد بدون قصد سوالي سالفه وعصب وسبني وما خلى كلمه ما قالها
يوم ردينا سرت ورمسته قلتله قلبك محترق لاني التفت ع واحد وبدون قصد ..؟؟؟
عيل انا شو تقول عني مليون بنت وبنت ترمسهن وكل وحده احبج واموت فيج واتيب طاري حرمتك عند
اخوانك وتغلط على اهلها ,, اهلها اللي رحبوا فيك وانت حالتك لله ما قصروا عليك بشي
انا اللي ضحيت بكل شي عشان خاطرك شو تقول عني ..؟؟؟؟؟
ما عيبه كلامي وشل بعمره يبا يطلع من البيت بس القهر اهلي هم اللي يردونه لييييييش
لانهم ما يبون الفضايح يقوولولي لو طلقج شو بيقولون الناس العيب من البنيه مب من الريال
وعقبها رجع واعتذر وحلفلي انه ما بيرمس ولا وحده …
ورديت مره ثانيه واكتشفت انه بعده يرمس وحده مطرشلها ايميل يقولها فلانه ولهت عليج بتريا اموري تتعدل
وبرمسج واحبج موت ,,, انا خلاص من الصدمه ما عرفت اضحك ولا اصيح ولا انتحر
خليت لابه مفتوح عالايميل اول ما رجع شافه ودخلت عليه ارمسه عادي واضحك جني ماعرف شي
وهو مستغرب مني يبتله العشى قلتله يلا حياتي ناكل واضحك وياه واسولف وهو حتى اللقمه ما رام يبلعها من الصدمه
خلصنا ياني وباسني على ايدي قالي سامحيني الشيطان لعب بعقلي وتم يترجاني
قلتله عادي انا مب زعلانه لانه مب شي يديد وتعودت على خيانتك وعادي كمل وانا مسامحتنك
مب منك اصلا ها قلب ما تروم تتحكم فيه يمكن تحبها ما بلومك مني انا اللي رضيت فيك وصدقتك
بس ليش جيه حكمت عليه بالاعدام لا انك خليتني اكمل حياتي ويا غيرك واعيش مرتاحه ولا انك حبيتني
واحترمتني وقدرت اللي سويته عشانك ؟؟؟؟
انا الحينه حرمتك قولي شو نهايتي وياك شو اللي تترياه ان مشكلتك تنحل وعقبها تفرني ؟؟
وتغير صار يعاملني باحترام ويرمسني باسلوب حلو بس تبون الصدق كله كان تمثيل <<<<
عشان بس ما ينحط في موقف محرج مره ثانيه وعشان يفك عمره من الصدعه
والدليل انه بعده يرمسها ورجع يكلمني بنفس الاسلوب يقولي انتي ما منج فايده لا وظيفه ولا شي
ويقارني بفنانات شوفي هاي كيف حلوه وشوفي شعرها وشوفي جسمها كيف !!!!
منو منكن تروم تتحمل ان ريلها يقولها هالكلام ؟؟؟
حاولت باي طريقه اكسب هالانسان بس للاسف يوم عن يوم يزيد كرهي له
اللي مب فاهمتنه ليش كل ما ابتعد عنه يخاف ويتغير فتره بس ليش كل ما اسفهه يعصب
ليش متعلق فيني ويخوني حاولت اعرف شو اللي مب عايبنه فيني بس ولا مره قالي انتي فيج شي مب حلو
مع انه تعود يعق عليه الكلام بالعكس كان يقولي انتي خقاقه وايد حلوه وبنت ناس معروفين ومن هالكلام
والله اني مب مقصره وياه لا بالكلام الحلو وولا باي شي اخدمه يعيوني بس ما فهمت شو اللي يباه مني
صارت حالتي صعبه وايد لدرجة اني قررت اكلم دكتور عن حالتي وفعلا كلمت دكتور قالي سالفتج غريبه
تصدقون مع كل هذا قالي انتي الغلطانه مب هو حط اللوم كله عليه انا
قالي انتي ذليتي عمرج وااايد عشانه وما عرفتي ان الريال يركض ورى الشي لين ما يملكه وعقب
ما يملكه خلاص ما يهتم فيه وانتي نفس الشي كان يباج وعقب ما حس انج ملكه خلاص ما اهتم فيج
شرات قبل هو من داخله يحبج ومستحيل يفرط فيج بس يقول هاي حرمتي ما بتشرد وكل اللي كان يسويه
هو هروب من معاملتج له كل ما خانج صحتي ورديتيله وكل ما زعلج رضيتي بكل سهوله !!!
كان المفروض هو كل ما يشد انتي ترخي وكل ما يرخي انتي تشدي ..
كان المفروض تحسسينه انج مب مهتمه لسوالفه وانج اكبر من هالشي ولج مكانتج اللي ما تسمحلج
انج تذلين عمرج حقه بينتيله انج عرفتي سوالفه خلاص سوي روحج ما يهمج وكملي حياتج عادي
ابتعدي عنه شوي قللي من اهتمامج له اهتمي بشي ثاني وتعلقي فيه واشغلي نفسج فيه وشوفي شو بيستوي
وبالفعل هذا اللي سويته رديت لدوامي وبرضاه سرت ولقيتله شقه قلتله اسكن فيها انت لازم ما تشوفني وايد
لين العرس عشان تشتاقلي وطلع والحينه موجود في الشقه بروحه …
عشاه وغداه كله من المطاعم واوقات اتعمد اني ارقد بدون لا ادقله اقوله كنت تعبانه
وربيه انه تغير تيلفوني ما يسكت مسجات واتصاالات وكله يطرشلي حبيبتي ليش ما تسالين عني
ما اقولكم اني نسيته لا انا كنت ارمسه بس بحدوود اوقات افج ايميلي القاه مطرشلي ايميل
يطرشلي هدايا لين البيت والحمدلله المشاكل كلها راحت وصرت ما اهتم اذا هو يرمس غيري ولا لا
اللي يهمني طاعة الله ورضى اهلي و دوامي وكيف انا اكمل حياتي مرتاحه وهو خليته اخر همي
بنات انا غلطت في حياتي كان المفروض ما اكلمه من البدايه لين ما يتقدملي
كان المفروض ماخبي على اهلي شي هاي غلطه غلطتها بروحي تحملتها بدون ما اذل عمري لحد
تصرفت كلمت دكتور راجعت نفسي وعرفت غلطتي وين ودورت على الحل
صدق اني تعبت واااايد صحت واضيجت وحسيت اني اتعس وحده في الدنيا بس عقبها ارتحت
عرفت اني انا الغلطانه مب هو وعقب الله وابويه وامايه رجعت لنفسي وحليت مشكلتي بنفسي
الانسان ما يعرف لين متى بيعيش المفروض يحاول يستغل كل ثانيه بحياته عشان يرضي ربه
وانا غلطت بحياتي وتبت وخير الخظاؤون التوابون ..
الزواج نصف الدين والحياه الزوجيه حلوه حلو انج تكونين ربة بيت واسره ويكون عندج عيال وبيت
لا تحاولين تكبرين المواضيع اذا صارتلج مشكله قولي لي رب كبير ,,
السمووحه عالاطاله ودعواتكن الطيبه
لا اله الا انت سبحانك اني كنت من الظالمين
حبيبتي والله . . الله يهدي ريلج ان شالله و يحن قلبه لج 
المشاركة الأصلية كتبت بواسطة مجرد انثى 
