السلام عليكم بنات شخباركم وكيف أصبحتم // أمسيتم
سلمكن الله هذي أول تجربه لي مع السينامون مع اني ما أحبه واايد بس الأهل طلبوا مني أسويه على أساس ايدي شاطره في الحلويات بسم الله ما شاء الله….
المهم نبدا بالمقادير:
تخلطين بيضه وحده مع نص كوب سكر خشن وتضيفين لهم كوب واحد من الزبده الغير مملحه انتبهن لازم تكون الزبده لينه يعني مش صلبه ولا سايحه ….اوكي
تضيفين للخليط السابق شوية ملح + ملعقة صغيرة من الخميرة + كوب ونص من الحليب السايل بس يكون الحليب دافي مش حااار وايد ولا بارد يعني مسخن شوي بس عسب يساعد الخميره
شفتوا كيف ان المكونات سهله وااايد …وآآخر شي عاد تضيفون خمس أكواب من الطحين الفاخر طبعاً الخاص بالحلويات أنا استخدمت طحين ماستر بيكر المتعدد الاستعمالات والصراحه هذا الطحين فن في كل شي في الخبز وفي الموالح وفي الكيك أنصحكم تجربونه
لما تخلصون من عجن العجين تحصلون عجينه ملسا قابله للفرد اتركوها ترتاح ساعه كامله وخلاف افردوها على طاولة كبيره بشكل مستطيل بسماكه معقوله تقريباً 1 سم وادهنوها بالزبده السايحه لاحظوا نحن استخدمنا الزبده في العجين نفسها وبعد رجعنا نستخدمها قبل الحشو وهذا سر الطعم اللذيذ والقوام الهش
الحشوه عباره عن :
( جوز مجروش مش مطحون + سكر أبيض + سكر بني + سينامون أوالقرفه المطحونه)
وزعي الحشوه على كامل العجينه المفروده وابدي باللف وطريقة اللف معروفه على شكل رول وهني عاد المرحله الصعبه بنظري واللي هي قص العجين لا تغلطون نفس غلطتي وتقصون العجين بالسكين أحسن طريقه انج تعقدين حول العجينه الاسطوانيه خيط وتقصينها بهذي الطريقه عشان ما يخترب شكل الرول ويروح تعبج على الفاضي
ألحين ادهني الصينيه بالزبده وصفي السينامون وخلي مسافه من بينهم عشان الحجم راح يتضاعف مرتين داخل الفرن ودخليها الفرن ولا تسيرين بعيد تراها ما تاخذ أكثر عن 5 دقايق داخل الفرن يعني من تحت 5 دقايق سكري عليها من تحت وشغلي من فوق وشوفي الوجه متى ما احمر طلعيها على طول
وهذا السينامون اللي سويته وفرحاااانه فيه ههههه مش مصدقه رووحي
[IMG]
[/IMG]
[IMG]
[/IMG]
وهني شوفوا كيف منفوخه ومرتفعه
[IMG]
[/IMG]
وهني من داخل طريه وايد شرات الكيك الاسفنجي وتذوب في الحلج يم يم
[IMG]
[/IMG]
وهذي حق اخوي فديته يتحراها كب كيك قاال لي حطي لي من الكريما البيضا فووق هههه
[IMG]
[/IMG]
وبخصوص الصوص اللي على الويه ترا أنا حطيت نوعين من الصوص
الأول كان التوفي وأكيد تعرفون طريقة عمل التوفي والثاني كان الصوص الخاص بالسينامون بس شغل بيت عدل بس ما بخبركم كيف سويته ……..نذاااله صح؟؟
لا لا بخبركم ..شوفوا هاتوا طاسه غزيره واخلطوا فيها المقادير التاليه::
3 ملاعق طعام من جبن فيلادلفيا
ملعقة طعام من الزبده السايحه
كيسين دريم ويب
حليب بااارد الأفضل يكون فريش تقريباً مقدار كوب الشاي
نصف ملعقة صغيرة من البيكنغ باودر وهذا اللي يعطي الصوص الأبيض كثافه
اخلطي المكونات اللي ذكرتها مع بعض حتى تتشكل عندج كريمه بس ثقيله شوي وهني انتي ورغبتج تبغينها كثيفه خففي من الحليب أو قليلة الكثافه زيدي من الحليب حبتين هذا الشي راجع للذوق الشخصي أنا عن نفسي خليتها وسط والطعم مسكت ما شاء الله
ملاحظه:: العجينة بنفس هذا المقدار سوا لي 34 حبة سينامون بالضبط
أتمنى اني ما طولت عليكن بالكلام واسمحولي عشان الصور ماااال بسرعه بسرررعه واللي عندها اي استفسار لا تستحي عااادي ….نحن حاااضرين للحلوين
المشاركة الأصلية كتبت بواسطة أم صوغة 
