السلام عليكم الغاليات
اشحالكم ان شا الله بخير ,,,
ما اعرف شو اقول والا من وين ابدأ ,,, على العموم انا وزني كان قبل فترة 147 كيلو واتوقع انه وصل الحين لين 150 او اكثر بعد لاني ما اسوي شي اصلا عسب ينزل يعني عادي لو زاد ,,, وطولي 166 سم تقريبا ,,, يعني تقريبا يبالي من 55 الى 60 كيلو انقصهم ,,, وممكن تشوفون هالموقع للي حابين يحسبون حق عمارهم
https://www.sehha.com/diseases/obesity/bmi.htm
المهم اللي لاحظته شو ان اغلب المواضيع تتكلم عن الاكل ,, ومشكلتي انا مب اكل لان كل اللي يعرفني ويعرف شو اكل وشو ما اكل يقول اني ممكن اخربط لكن اصلا اكلي مب واااايد صح انه مب صحي لكنه مب واااايد يعني اقدر اتحكم فيه يعني ما عندي شراهة في الاكل المشكلة اللي عندي اني في يوم من الايام كنت اعتبر من الناس الرياضيين لكن يوم عرست تعرفون ما شي حركة + حمل وولادة الله يخلي ما شا الله انتفخت وصرت ديناصور بعد الفيل يعتبر اضعف عني ,,,
فحبيت اني افتح هالموضوع للناس اللي يعانون نفس معاناتي او اللي عندهم نفس مشكلتي ,, (( عدم الحركة وليس الشراهة في الاكل )) …
اليوم شو : الاحد – 24/ فبراير / 2024
اوكي شو رايكم كل وحدة حابة تشترك طبعا في حملة الحركة السبيل الوحيد لجسم صحي ,, كل وحدة تاخذ قياس خصرها ولو تحب تكتبها هنيه اوكي ولو ما تحب بعد اوكي على راحتكم اهم شي انج تكتبينه لنفسج في دفتر خاص عسب يكون كمرجع لج ,, وكل اسبوع ( 7 ايام ردي قيسي مرة ثانية ) وكتبي حق نفسج نقصتي حتى لو عشر سم والا ما شي نقص ,,,
الحملة هاي اهم شي فيها هو شريط القياس مال الخياطين مب الميزان مال الكيوااات ,,, الغرض من هاي الحملة هو محاولة انزال الكرش عن طريق الرياضة مب عن طريق الحرمان ,, حتى الناس اللي عندهم شراهة يقدرون يشاركون بدون ما يقللون اكلهم او اي شي ,,,,
التمرين اللي المفروض انكم تسووونه هو تمرين ضغط البطن اتوقع ان الكل يعرف ( وهويوم تكونين ممدة على ظرج وحاطة ايديج ورا ظهرج لكن مب شابكتنهم ويا بعض يادوب الاصابع في كل كف تلامس اللي في الكف الثانية وترفعين راسج وظهرج وتمطينهم لناحية ريولج اقصى مطة ترومين عليها لكن مب وايد شوي شوي على عماركم عسب العمود الفقري وحليله لا ينتحر ,, !) سوري على الشرح اعرف اني ما اعرف اشرح بس اتمنى ان الصورة تكون واضحة ولو اي وحدة فيكم عندها موقع او رسم يشرح التمرين اتمنى انكم ما تبخلون علينا به ,,
ها هو التمرين الوحيد اللي راح نسويه لمدة شهر ,, يعني عقب شهر 24/ مارس /2017 كل وحدة تكتب هنيه كم نقص قياس خصرها طبعا لو نقص ولو ما نقص بعد تكتب ,,
واللي يحبون يشاركون مشاركات مشجعة للاخرين ممكن انها تدش كل يوم وتكتب كم مرة سوت التمرين في كل يوم ,,,
وانا راح ابدأ ,,
قبل شوي سويت التمرين ( 20 مرة ) اول عشر مرات وعقب استراحة شوي وبعدين كملت العشر الثانيات ,,, وبصراحة انا اعتبرته انجاز بعد 9 سنوات انقطاع عن الرياضة ,, صدق يعتبر انجاز بالنسبة لي ,, وان شا الله انه يكون دفعة لي اني اكمل ,,
وعن موضوع قياس خصري ان شا الله باجر بحطه ,,, والله يوفقني ويوفقكم ان شا الله لما يحب ويرضى ,,,
وعساكم على القوة ,,,
@ اختكم في الله @
ام ناصر ..
تم قياس الخصر وطلع 56,5 انش يلله بنشوف عقب اسبوع جم بيطلع ..
بنات ملاحظة :
حاولوا تشربون على الاقل كوبين ماي قبل لا ترقدون والصبح قبل لا تفطرون بساعة ,,,, ( عسب تنظيف المعدة ) ,,,,
المشاركة الأصلية كتبت بواسطة عيون الغلا نو 
